തിരുപുരം പകല്‍പൂരം ഇന്ന്

തലയോലപ്പറമ്പ് : തിരുപുരം ശ്രീകൃഷ്ണ സ്വാമി ക്ഷേത്രത്തിലെ പകല്‍പൂരം ഇന്ന്. പേരുകേട്ട 15 ഗജവീരന്‍മാരുടെ തലയെടുപ്പില്‍ നാട് ഇളകിമറിയും. പുലര്‍ച്ചെ നാലിന് പള്ളി ഉണര്‍ത്തലോടെ ചടങ്ങുകള്‍ ആരംഭിക്കും. രാവിലെ എട്ടിന് ഗജവീരന്‍ മീനാട് വിനായകന് ഗജരാജപ്പട്ടം നല്‍കി ആദരിക്കും. 8.30ന് ഗജപൂജയും ആനയൂട്ടും നടക്കും. തുടര്‍ന്ന് വലിയ ശ്രീബലി. പൂരത്തിന്റെ മാറ്റൊലി വിളിച്ചോതി ചേരാനെല്ലൂര്‍ ശങ്കരന്‍കുട്ടി മാരാരുടെ നേതൃത്വത്തില്‍ പഞ്ചാരിമേളം ആരംഭിക്കും. ഉച്ചക്കുശേഷം മൂന്നിനാണ് പകല്‍പൂരം. താന്ത്രിക കുലപതി ചന്ദ്രശേഖരന്‍ നമ്പൂതിരിയും മോന്‍സ് ജോസഫ് എം.എല്‍.എയും പൂരമൈതാനിയില്‍ ഭദ്രദീപ പ്രകാശനം നടത്തുന്നതോടെ പൂരം ആരംഭിക്കും. പൂരത്തിന് കൊഴുപ്പേകാന്‍ പെരുവനം കുട്ടന്‍മാരാരുടെ നേതൃത്വത്തില്‍ പാണ്ടിമേളം നടക്കും. മേളത്തിന് ദൃശ്യവിരുന്നൊരുക്കാന്‍ കുടമാറ്റവും മയിലാട്ടവുമെല്ലാമുണ്ട്. ഗജരാജന്‍ പാറമേക്കാവ് ശ്രീപത്മനാഭനാണ് പകല്‍പൂരത്തിന്റെ തിടമ്പ് ഏറ്റുന്നത്. ഗജവീരന്‍മാരായ ഈരാറ്റുപേട്ട അയ്യപ്പന്‍, അന്നമ്മനട ഉമാമഹേശ്വരന്‍, കുന്നത്തൂര്‍ രാമു, മാവേലിക്കര ഗണപതി, കാഞ്ഞിരക്കാട് ശേഖരന്‍, തിരുനക്കര ശിവന്‍, ചെറായി പരമേശ്വരന്‍, മധുരപുറം കണ്ണന്‍, മഞ്ഞക്കടമ്പില്‍ വിനോദ്, ചൂരൂര്‍മഠം രാജശേഖരന്‍, പ്ലാത്തോട്ടം കണ്ണന്‍, ചിറക്കര ശ്രീറാം, ഇടക്കളത്തൂര്‍ അര്‍ജ്ജുനന്‍, ഉഷശ്രീ ദുര്‍ഗപ്രസാദ്, മീനാട് വിനായകന്‍ എന്നിവരാണ് പൂരത്തില്‍ അണിനിരക്കുന്നത്. തുടര്‍ന്ന് രാത്രി 7.30ന് ദീപാരാധന, എട്ടിന് വെടിക്കെട്ട്, രാത്രി പത്തിന് വലിയവിളക്ക്, തുടര്‍ന്ന് ദീപക്കാഴ്ച, കാണിക്ക എന്നിവ നടക്കും.