സ്വന്തം ലേഖകന്
കണ്ണൂര്: കണ്ണൂര് സര്വ്വകലാശാല സിന്ഡിക്കേറ്റ് അംഗങ്ങളുടെ നിയമനവുമായി ബന്ധപ്പെട്ട് ഭരണാനുകൂല അധ്യാപക സംഘടനക്കകത്ത് വടംവലി ശക്തമെന്ന് സൂചന. കഴിഞ്ഞ 7 നാണ് സിന്ഡിക്കേറ്റിലെ 11 അംഗങ്ങളുടെ കാലാവധി പൂര്ത്തിയായത്. കണ്ണൂര് സര്വ്വകാലാശാല സിന്ഡിക്കേറ്റ് അംഗമാകാനായി ഭരണാനുകൂല അധ്യാപക സംഘടനയിലെ നിരവധി പേര് രംഗത്തെത്തിയതായാണ് അറിയുന്നത്. ഇതാണ് പുതിയ സിന്ഡിക്കേറ്റ് അംഗങ്ങളുടെ നിയമന ലിസ്റ്റ് ഗവര്ണ്ണറുടെ അംഗീകാരത്തിനായി സമര്പ്പിക്കുന്നതിന് തടസ്സമായി മാറിയിരിക്കുന്നതെന്നറിയുന്നു. നാലു വര്ഷമാണ് സിന്ഡിക്കേറ്റിന്റെ കാലാവധി. ഏതാനും മാസം മുമ്പ് തെരഞ്ഞെടുക്കപ്പെട്ട മൂന്ന് ഡീനുകള് മാത്രമാണ് നിലവില് ഉളളത് ഇവരുടെ കാലാവധി തീരാന് നാലുവര്ഷമുളളതിനാല് ഇവര് അംഗങ്ങളായി തുടരും. സിന്ഡിക്കേറ്റ് നിലവിലില്ലാത്ത സാഹചര്യത്തില് വൈസ് ചാന്സിലര്ക്കാണ് തീരുമാനങ്ങളെടുക്കാനുളള അധികാരം. എന്നാല് സിന്ഡിക്കേററ് രൂപീകരണം വൈകിയാല് പല നിയമ പ്രശ്നങ്ങള്ക്കും വഴിവെക്കും. പ്രധാനപ്പെട്ട കാര്യങ്ങളില് തീരുമാനം എടുക്കാനും വൈസ് ചാന്സിലര്ക്ക് തനിച്ച് തീരുമാനം എടുക്കാന് നിയമ പ്രകാരം സാധ്യമല്ല. നാക്ക് അക്രഡിറ്റേഷനു വേണ്ടിയുളള ശ്രമങ്ങള് സജീവമായി നടക്കുന്നതിനിടയില് സിന്ഡിക്കേറ്റ് രൂപീകരണം വൈകിയാല് തിരിച്ചടിയാകുമെന്ന് വിദഗ്ദര് ചൂണ്ടിക്കാട്ടുന്നു. നിലവിലുളള പല സിന്ഡിക്കേറ്റ് അംഗങ്ങളും വീണ്ടും സ്ഥാനത്തെത്താന് ശ്രമം നടത്തുന്നുണ്ടെങ്കിലും കോണ്ഗ്രസിനു പുറമേ വിദ്യാഭ്യാസ വകുപ്പ് കൈകാര്യം ചെയ്യുന്നമുസ്ലീംലീഗ് ഉള്പ്പെടെയുളള ഘടകക്ഷികളിലെ പല സംഘടനകളിലെ അധ്യാപകരും സിന്ഡിക്കേറ്റ് അംഗത്വം അവകാശപ്പെട്ട് രംഗത്തെത്തിയാതായി സൂചനയുണ്ട്. ചുരുക്കത്തില് 11 അംഗങ്ങളെ തെരഞ്ഞെടുക്കുന്നത് ഭരണമുന്നണിക്കകത്ത് വിലിയ കീറാമുട്ടിയായി മാറിയിട്ടുണ്ട്.
സര്വ്വകാലാശാലകളുടെ ഭരണത്തിനായി വിദ്യാഭ്യാസ മേഖലയില് പ്രാഗത്ഭ്യം തെളിയിച്ചവരും ഭരണപരിചയവുമുളള വ്യക്തികള് തെരഞ്ഞെടുക്കപ്പെടണമെന്നാണ് നിയമമെങ്കിലും എല്ലായ്പ്പോഴും സംസ്ഥാനം മാറി മാറി ഭരിച്ച ഇടത്-വലത് മുന്നണികളിലെ ഘടകകക്ഷികളുടെ അനുഭാവികളായ പ്രഫസര്മാരായ അധ്യാപകരാണ് സംസ്ഥാനത്തെ സിന്ഡിക്കേറ്റുകളുടെ മെമ്പര്മാരായി എത്താറുളളത്. അതുകൊണ്ടു തന്നെ പലപ്പോഴും ഭരണ കക്ഷിയനുകൂല തീരുമാനങ്ങളാണ് സര്വ്വകലാശാലയില് നടപ്പാക്കപ്പെടാറുളളത്. ഇത് പലപ്പോഴും യൂണിവേഴ്സിറ്റിയിലെ ഭരണ -പ്രതിപക്ഷ അധ്യാപക അനധ്യാപകര ജീവനക്കാരും വിദ്യാര്ത്ഥി സംഘടനകളും തമ്മില് സിന്ഡിക്കേറ്റ് തീരുമാനത്തിന്റെ പേരില് സംഘര്ഷവും വാദ പ്രതിവാദങ്ങളും പതിവാണ്. അംഗങ്ങളുടെസിന്ഡിക്കേറ്റ് രൂപീകരണം വൈകിയാല് സര്വ്വകലാശാലയുടെ ദൈനംദിന പ്രവര്ത്തനങ്ങളേയും വിദ്യാര്ത്ഥികളുടെ പരീക്ഷ, സര്ട്ടിഫിക്കറ്റി വിതരണം എന്നിവയെ ഉള്പ്പെടെ പരോക്ഷമായി ബാധിക്കലാകും ഫലം.
