സിറിയ: ഇസ്ലാമിക് സ്റ്റേറ്റ് ഭീകരര്ക്ക് 42 രാജ്യങ്ങളിലെ ചെറു ഭീകര സംഘടനകളുടെ പിന്തുണ ലഭിക്കുന്നുണ്ടെന്ന് പഠനം. ആഗോള ഭീകര പ്രവര്ത്തനങ്ങളെ കുറിച്ച് ഇന്റര്നാഷണല് ഇന്സ്റ്റിറ്റിയൂട്ട് ഓഫ് എക്കണോമിക് ആന്ഡ് പീസ് (ഐഇപി) കഴിഞ്ഞമാസം നടത്തിയ പഠനത്തിലാണ് ഇതുസംബന്ധിച്ചുള്ള വിവരങ്ങള് പുറത്തുവന്നിരിക്കുന്നത്.
ഫിലിപ്പീന്സ്, ഈജിപ്ത് തുടങ്ങി 42ഓളം രാജ്യങ്ങളിലെ ഭീകര സംഘടനകള് ഐഎസുമായി സഹകരിച്ച് പ്രവര്ത്തിക്കുന്നുണ്ട്. ഇതില് 30 സംഘടനകള് ഐഎസില് ലയിച്ചിട്ടുള്ളവയാണ്. ലോകത്തില് ഇന്നുള്ള ഭീകര സംഘടനകളില് ഏറ്റവും കൂടുതല് സമ്പത്തുള്ളതും ആക്രമണകാരികളും ഐഎസാണ്.
അതുകൊണ്ടു തന്നെ വിദേശീയരെ ഇതിലേക്ക് ആകര്ഷിക്കുന്നതിനായി ഇന്റര്നെറ്റിലൂടേയും മറ്റും പദ്ധതികള് ആവിഷ്കരിക്കുന്നുണ്ട്. അന്സാര് അല്- ഷാരിയ(ലിബിയ), ഒക്ബ ഇബ്ന നാഫ ബറ്റാലിയന്(ടൂണീഷ്യ), അന്സാര് ബിത് അല് മഖ്ദിസ് (ഈജിപ്ത്) എന്നിവയും ഉസ്ബക്കിസ്ഥാനിലെ ഇസ്ലാമിക് മൂവ്മെന്റ്, ഇന്ഡോനേഷ്യയിലെ അബു സയ്യഫ് തുടങ്ങിയ ഭീകര സംഘടനകള് നിലവില് ഐഎസുമായി സഹകരിച്ചാണ് പ്രവര്ത്തിക്കുന്നത്. ഇതു കൂടാതെ അള്ജീരിയ, ഗാസ എന്നിവിടങ്ങളിലും ഐഎസ് പ്രവര്ത്തകര് ഉള്ളതായി റിപ്പോര്ട്ടുകളുണ്ട്.
അന്താരാഷ്ട്ര തലത്തില് ഭീകര പ്രവര്ത്തനം ദിനംപ്രതി വര്ധിച്ചു വരികയാണ്. ഇറാഖ്, സിറിയ, അഫ്ഗാനിസ്ഥാന്, പാക്കിസ്ഥാന്, നൈജീരിയ തുടങ്ങിയ മുസ്ലിം രാജ്യങ്ങളിലാണ് ഭീകരാക്രമണങ്ങളും പ്രവര്ത്തനങ്ങളും കൂടുതലായുള്ളത്. 2014ല് നടത്തിയ പഠനത്തില് ലോകത്തിലെ ഏറ്റവും വലിയ ഭീകരസംഘടന ബോകോ ഹറാം ആയിരുന്നു. ഈ വര്ഷം അത് ഐഎസാണ്്. കഴിഞ്ഞ ഒരു വര്ഷത്തിനുള്ളില് വിവിധ ഭീകരാക്രമണങ്ങളിലായി 18444 പേരാണ് കൊല്ലപ്പെട്ടത്. ഇതില് 74ശതമാനം പേരും ബോകോഹറാം, ഐഎസ്, താലിബാന്, ഫുലാനി, ഷബാബ് എന്നീസംഘടനകളുടെ ആക്രമണങ്ങളില് കൊല്ലപ്പെട്ടവരാണ്.
