ന്യൂദല്ഹി: നാഷണല് ഹെറാള്ഡ് തട്ടിപ്പ് കേസില് ‘വാശി’ ഉപേക്ഷിച്ച് കോടതി നടപടികള്ക്ക് വിധേയരാകാന് കോണ്ഗ്രസ് അധ്യക്ഷ സോണിയാഗാന്ധിയും മകന് രാഹുല്ഗാന്ധിയും തയ്യാറായി. ഡിസംബര് 19ന് 3മണിക്ക് ഇരുവരും പട്യാലഹൗസിലെ ദല്ഹി മെട്രോപോളീറ്റന് മജിസ്ട്രേറ്റ് കോടതി മുമ്പാകെ ഹാജരാകും. ഇതാദ്യമായാണ് സോണിയാഗാന്ധിയും രാഹുല്ഗാന്ധിയും ഒരു കേസില് കോടതിമുമ്പാകെ എത്തുന്നത്. കോടതിയില് ഹാജരാകുന്നത് ഒഴിവാക്കാന് മാസങ്ങളായി കോണ്ഗ്രസ് നേതൃത്വം കൊണ്ടുപിടിച്ച പരിശ്രമങ്ങള് നടത്തിയെങ്കിലും ഇരുവരും കോടതിയില് ഹാജരാകണമെന്ന ദല്ഹി ഹൈക്കോടതി വിധിയോടെ ഇവയെല്ലാം വിഫലമായി.
ഇന്നലെ 4മണിക്ക് മുമ്പ് വിചാരണ കോടതി മുമ്പാകെ ഹാജരാകണമെന്നായിരുന്നു ഹൈക്കോടതി ഇരുവര്ക്കും നല്കിയ നിര്ദ്ദേശം. എന്നാല് ഇന്നലെ വിചാരണക്കോടതിയെ സമീപിച്ച സോണയയുടേയും രാഹുലിന്റെയും അഭിഭാഷകര് മുന്കൂട്ടി നിശ്ചയിച്ച പരിപാടികളുള്ളതിനാല് ഹാജരാകാനാവില്ലെന്നും മറ്റൊരു ദിവസം ഹാജരാകാമെന്നും ഉറപ്പുകൊടുത്തു. സോണിയാഗാന്ധിക്ക് പാര്ലമെന്റില് പോകണമെന്നും രാഹുല്ഗാന്ധി ചെന്നൈയിലാണെന്നും മനുഅഭിഷേക് സിങ്വി കോടതിയെ അറിയിച്ചു. അറസ്റ്റ് വാറണ്ട് പുറപ്പെടുവിക്കുന്നത് ഒഴിവാക്കാന് കൂടിയാണ് ഇരുവരും അടുത്തദിവസം തന്നെ ഹാജരാകുമെന്ന ഉറപ്പ് കോടതിയില് നല്കിയത്. ഇതോടെ ഡിസംബര് 19ന് 3മണിക്ക് മുമ്പ് കോടതിയില് ഹാജരാകണമെന്ന് മജിസ്ട്രേറ്റ് കോടതി ഉത്തരവിടുകയായിരുന്നു.
കേസിലെ കൂട്ടുപ്രതികളായ മോത്തിലാല് വോറ, ഓസ്ക്കാര് ഫെര്ണ്ണാണ്ടസ്, സുമന് ദുബെ, സാം പിട്രോഡ എന്നിവരും ഡിസംബര് 19ന് ഹാജരാകണം. ഭാഗ്യം കൊണ്ടുമാത്രമാണ് സോണിയയും രാഹുലും കോടതി നടപടികളില് നിന്നും രക്ഷപ്പെട്ടതെന്നും 19ന് ഹാജരാകണമെന്ന കോടതി ഉത്തരവില് സംതൃപ്തിയുണ്ടെന്നും കേസിലെ പരാതിക്കാരനായ ഡോ.സുബ്രഹ്മണ്യംസ്വാമി പറഞ്ഞു. എന്നാല് കേസ് കെട്ടിച്ചമച്ചതാണെന്നും ബിജെപിയുടെ പ്രതികാര രാഷ്ട്രീയത്തിന്റെ ഭാഗമാണെന്നുമാണ് കോണ്ഗ്രസ് അഭിഭാഷകനായ അഭിഷേഖ് സിങ്വിയുടെ പ്രതികരണം.
2000 കോടിയുടെ ആസ്തിയുള്ള നാഷണല് ഹെറാള്ഡ് പത്രം ഏറ്റെടുത്ത യങ് ഇന്ത്യയുടെ 76 ശമതാനം ഓഹരികളും സോണിയാഗാന്ധിയുടേയും രാഹുല്ഗാന്ധിയുടേയും പേരുകളിലാണെന്ന വിവരവും പുറത്തുവന്നിട്ടുണ്ട്. പത്രത്തിന്റെ കടബാധ്യത 50 കോടിയായി നിജപ്പെടുത്തി ആ തുക കൊല്ക്കത്തയിലെ ഒരു കമ്പനിയാണ് നാഷണല് ഹെറാള്ഡിന് നല്കിയത്. ഈ കമ്പനിയും സംശയത്തിന്റെ നിഴലിലാണ്. കള്ളപ്പണം വെളുപ്പിക്കല് കേസില് കുറ്റാരോപിതമായ കമ്പനിയില് നിന്നാണ് കോണ്ഗ്രസ് പാര്ട്ടി പത്രത്തിന് 50 കോടി നല്കിയത്.
