കൊച്ചി: അന്താരാഷ്ട്ര പുസ്തകോത്സവ വേദിയില് അക്ഷരവിശുദ്ധിയുടെ വേറിട്ട ആശയങ്ങളാല് ശ്രദ്ധേയമാകുകയാണ് കുരുക്ഷേത്രയുടെ സ്റ്റാള്. നിരവധി വിഷയങ്ങളെക്കുറിച്ച് പ്രതിപാദിക്കുന്ന അനവധി പുസ്തകങ്ങളുടെ നിധി തന്നെയാണ് ഇവിടെ ഒരുക്കിയിരിക്കുന്നത്. ഭാരതീയ ദര്ശനങ്ങളുടെയും പാരമ്പര്യത്തിന്റെയും മൂല്യാധിഷ്ഠിത സംവേദനം സാധ്യമാക്കുന്ന പുസ്തകങ്ങള്ക്ക് വായനക്കാര് ഏറെയാണ്. വേദങ്ങള്, ഇതിഹാസങ്ങള്, പുരാണങ്ങള്, ഉപനിഷത്തുകള് തുടങ്ങി ആധുനികമായ എന്തിനെയും ഭാരതീയ കാഴ്ചപ്പാടില് വ്യാഖ്യാനിക്കുന്നവയും കുരുക്ഷേത്രയുടെ ആസ്തിയാണ്. ഇന്നത്തെ പ്രത്യേക സാഹചര്യത്തില് എല്ലാറ്റിനും ഉത്തരമുണ്ടെന്ന് പ്രഖ്യാപിക്കുന്ന തരത്തിലുള്ള പുസ്തകങ്ങളുടെ ഒരു ഖനി തന്നെ ഇവിടെയുള്ളത്.
ജഗത്തിലെങ്ങും അമൃതം വിളമ്പുന്ന മാതൃബിംബമായ മാതാ അമൃതാനന്ദമയീ ദേവിയുടെ ജീവിതത്തെ അപഗ്രഥനാപരമായും ഭാവദീപ്തമായും ആവിഷ്കരിക്കുന്ന ഡോ. കൂമുള്ളി ശിവരാമന് രചിച്ച ‘അമൃതം വിളമ്പുന്ന അമ്മ’ സ്റ്റാളിലെ മുഖ്യ ആകര്ഷണമാണ്. 130 രൂപയാണ് ഈ പുസ്തകത്തിന്റെ വില. കലിയുഗവരദനായ അയ്യപ്പസ്വാമിയുടെ ഐതീഹ്യവും ചരിത്ര-വര്ത്തമാന കാലഘട്ടത്തിലെ തീര്ത്ഥാടന സൗകര്യങ്ങളും പ്രതിപാദിക്കുന്ന, പത്രപ്രവര്ത്തകനായ എം.രാജശേഖരപ്പണിക്കര് രചിച്ച ശരണമയ്യപ്പ, ഗുരുപരമ്പര, ജഗത്മിഥ്യ ജീവന് കര്മഫലം, താപത്രയങ്ങള് തുടങ്ങിയ എട്ട് അദ്ധ്യായങ്ങളിലൂടെ ഭാരതീയ വേദാന്തത്തിന്റെ പൊരുള് അനുവാചകരിലെത്തിക്കുന്നു ഭാരതീയ ദര്ശനങ്ങള് ഒരു ശാസ്ത്രീയ വീക്ഷണം എന്ന ഗ്രന്ഥം. സത്യസായിബാബയെക്കുറിച്ച് ഒരു സംഘം വിദ്യാര്ത്ഥികളുടെ ചോദ്യങ്ങള്ക്കുള്ള മറുപടിയായും കേരളത്തിലെ സായി ഭക്തര് നടത്തുന്ന സേവന പ്രവര്ത്തനങ്ങളെക്കുറിച്ച് പ്രതിപാദിക്കുന്നതുമായ ഗ്രന്ഥമാണ് എന്.ആര്.മേനോന്റെ ‘സാധാരണക്കാരുടെ സായിബാബ’. ഇന്ദിരാഗാന്ധിയുടെ അടിയന്തരാവസ്ഥയില് ജനാധിപത്യത്തിനും സ്വാതന്ത്ര്യത്തിനും വേണ്ടി സര്വ്വവും ത്യജിച്ചവര് നേരിടേണ്ടിവന്ന പീഡനങ്ങളുടെ നേര്ക്കാഴ്ചയാണ് ‘മരണത്തെ വെല്ലുവിളിച്ചവര്’. മരങ്ങളെ സ്നേഹിക്കുവാനും പ്രകൃതിയോടടുക്കുവാനും കുട്ടികളെ പ്രചോദിപ്പിക്കുന്ന കൃതിയാണ് 39 കവിതകളുടെ സമാഹാരമായ എസ്.അപ്പച്ചന്റെ മരങ്ങള് ദൈവങ്ങള്. സി.ആര്.ആര്.നമ്പൂതിരിയുടെ കളിയരങ്ങും കൈവിലങ്ങും, കെ.പി.മുരളി മോഹനന്റെ മോക്ഷത്തിലേക്ക് ഇനിയെത്ര ദൂരം, കാവാലം അനില് എഴുതിയ സ്വാതിതിരുനാള് കല-കാലം-ജീവിതം, പി.കെ.ജയന്റെ വേദപരിചയം, ഡോ.എം.ലീലാവതിയുടെ സത്യ-ധര്മ ദര്ശനം ഇതിഹാസങ്ങളിലൂടെ. മാടമ്പ് കുഞ്ഞുകുട്ടന്റെ സാധനാലഹരി, ഗോവയിലെ മതപരിവര്ത്തനത്തിന്റെ ദര്പ്പണമാണ് ആര്.ഹരിയുടെ പുസ്തകം തുടങ്ങി നിരവധി ചിന്തകരുടെയും എഴുത്തുകാരുടെയും രചനകളാല് സമ്പുഷ്ടമാണ് കുരുക്ഷേത്രയുടെ പുസ്തകശാല.
