.
മാവേലിക്കര: ജനസാഗരങ്ങളെ സാക്ഷി നിര്ത്തി ഒണാട്ടുകരയിലും, ചെങ്ങന്നൂരിലും സമത്വമുന്നേറ്റ യാത്രയ്ക്ക് ഉജ്ജ്വല സ്വീകരണം. കര്ഷക ഭൂമിയെ അക്ഷരാര്ത്ഥത്തില് ജനസാഗരമാക്കിയ വരവേല്പ്പാണ് വെള്ളാപ്പള്ളി നടേശന് നയിക്കുന്ന സമത്വമുന്നേറ്റ യാത്രയ്ക്ക് ലഭിച്ചത്.
ഐതീഹ്യവും ചരിത്രവും ഉറങ്ങുന്ന മണ്ണില് അവഗണിക്കപ്പെട്ട ഹിന്ദു സമൂഹത്തിന്റെ ഉയര്ത്തെഴുന്നേല്പ്പിനുളള കാഹളം മുഴക്കിയാണ് പതിനായിരങ്ങള് മാവേലിക്കരയിലേയും, ചെങ്ങന്നൂരിലെയും സ്വീകരണ വേദികളില് എത്തിയത്. വേദികളില് എത്തിയ സ്ത്രീകളടക്കമുള്ള പ്രവര്ത്തകരുടെ മുഖത്ത് വരാനിരിക്കുന്ന നല്ല നാളുകളെക്കുറിച്ചുള്ള ചിന്തമാത്രമായിരുന്നു.
അത് നിറവേറുന്നതിനുള്ള ഉന്മേഷവും പ്രസരിപ്പും ഓരോരുത്തരിലും കാണാനും കഴിഞ്ഞു. കേരളത്തിന്റെ നവോത്ഥാന നായകന്മാരുടെ പടനിലമായ മാവേലിക്കരയില് സമത്വമുന്നേറ്റയാത്ര ചരിത്ര സംഭവമായി മാറിയത് ഇടത്-വലത് മുന്നണികളില് അങ്കലാപ്പ് സൃഷ്ടിച്ചിരിക്കുകയാണ്. ആദ്യത്തെ കര്ഷക സമരഭൂമിയില് മറ്റൊരു സമരഗാഥയുടെ തുടക്കംകുറിച്ചുള്ള ഭദ്രദീപമാണ് ഇന്നലെ 11.30ഓടെ ജാഥാ ക്യാപ്ടന് വെള്ളാപ്പള്ളി നടേശന് കൊളുത്തിയത്.
താലപ്പെലികളുടെയും വാദ്യമേളങ്ങളുടെയും ആര്പ്പുവിളികളുടെയും അകമ്പടിയോടെയാണ് വെള്ളാപ്പള്ളിയേയും മറ്റ് സാമുദായിക നേതാക്കളെയും വേദിയിലേക്ക് സ്വീകരിച്ചത്. വരാന് പോകുന്ന നല്ല നാളുകള്ക്ക് ആശംസ നേര്ന്നുകൊണ്ട് വാളും, കിരീടവും നേതാവിന് പ്രവര്ത്തകര് നല്കുകയും ചെയ്തു. തുടര്ന്ന് ഇടത്-വലത് മുന്നണികളുടെ ഭീഷണികളെ വകവയ്ക്കാതെയുള്ള ജനറല് സെക്രട്ടറിയുടെ വാഗ്ശരങ്ങള്ക്ക് പ്രവര്ത്തകര് കരഘോഷങ്ങളായാണ് പിന്തുണ അറിയിച്ചത്.
മിച്ചല് ജംഗ്ഷന് സമീപമുള്ള കോടിക്കല് ഗാര്ഡന്സ് മൈതാനിയില് നടന്ന സ്വീകരണ പരിപാടിക്ക് കാര്ത്തികപ്പള്ളി, കായംകുളം, മാവേലിക്കര എന്നിവിടങ്ങളിലെ എസ്എന്ഡിപി യൂണിയനുകളാണ് നേതൃത്വം നല്കിയത്. എസ്എന്ഡിപി യോഗം കാര്ത്തികപ്പള്ളി താലൂക്ക് യൂണിയന് പ്രസിഡന്റ് കെ.അശോകപ്പണിക്കര് അദ്ധ്യക്ഷത വഹിച്ചു.
കെപിഎംഎസ് സംസ്ഥാന ജനറല് സെക്രട്ടറി ടി.വി. ബാബു, ഹിന്ദുഐക്യവേദി സംസ്ഥാന സെക്രട്ടറി ഇ.എസ്. ബിജു, സമസ്ത നായര് സമാജം സംസ്ഥാനപ്രസിഡന്റ് പെരുമറ്റം രാധാകൃഷ്ണന്, എസ്എന്ഡിപി യോഗം വൈസ് പ്രസിഡന്റ് തുഷാര് വെള്ളാപ്പള്ളി, ദേവസ്വം സെക്രട്ടറി അരയക്കണ്ടി സന്തോഷ്, മാവേലിക്കര എസ്എന്ഡിപി യൂണിയന് പ്രസിഡന്റ് സുഭാഷ് വാസു, കെപിഎംഎസ് സംസ്ഥാന ട്രഷറര് തുറവൂര് സുരേഷ്, ശ്രീകൃഷ്ണാശ്രമം രാമചന്ദ്രസ്വാമി, ധീവരമഹാസഭ പ്രസിഡന്റ് സ്വാമി ഗോരഖ്നാഥ്, പാണന് സമുദായ മുന്നണി നേതാവ് തഴവ സഹദേവന്, പട്ടിക ജാതി ഏകോപന സമിതി നേതാവ് പി.ശശികുമാര്, നീലകണ്ഠന് മാസ്റ്റര്, കായംകുളം എസ്എന്ഡിപി യൂണിയന് സെക്രട്ടറി പ്രദീപ് ലാല്, അഡ്വ. സംഗീത തുടങ്ങിയവര് പ്രസംഗിച്ചു.
