കുമരകം: ശ്രീകുമാരമംഗലം ക്ഷേത്രത്തിനു മുന്നില് പണിതീരുന്ന വിരിപ്പന്തല് പൂര്ത്തീകരിക്കപ്പെടുന്നതോടെ കുമരകം അയ്യപ്പന്മാരുടെ ഇടത്താവളമാകും. ഇത് ആദ്ധ്യാത്മികതയോടൊപ്പം ടൂറിസത്തിനും ഉണര്വേകും.
വിരിപ്പന്തലോ അടിസ്ഥാന സൗകര്യങ്ങളോ ഇല്ലാതിരുന്നിട്ടും തമിഴ്നാട്, ആന്ധ്ര, മൈസൂര് തുടങ്ങി നിരവധി സംസ്ഥാനങ്ങളില്നിന്നുള്ള അയ്യപ്പന്മാര് ശ്രീകുമാരമംഗലം ക്ഷേത്രദര്ശനം നടത്തി ബോട്ടുകളില് കായല് സഞ്ചാരം നടത്തിയാണ് തിരിച്ചുപോകുന്നത്. ശ്രീകുമാരമംഗലം ക്ഷേത്രനടയില് പണിതീരുന്ന വിരിപ്പന്തലിന് 300 അയ്യപ്പന്മാരെ ഉള്ക്കൊള്ളാനാകും. ഈ മാസം പണിതീരുന്ന വിരിപ്പന്തലിന് ആറുലക്ഷം രൂപയാണ് ചിലവ്. തീര്ത്ഥാടകരുടെ ഇടത്താവളത്തില് അയ്യപ്പന്മാര്ക്കുള്ള അടിസ്ഥാന സൗകര്യങ്ങളുമൊരുക്കാനാണ് ശ്രീകുമാരമംഗലം ദേവസ്വം ഭരണസമിതിയുടെ തീരുമാനം. കേരളത്തില്നിന്നും അന്യസംസ്ഥാനങ്ങളില്നിന്നും ഇവിടെയെത്തുന്ന അയ്യപ്പന്മാര്ക്ക് രാത്രി തങ്ങിയശേഷം രാവിലെ ഇവിടെനിന്നും യാത്രതിരിച്ച് പമ്പയിലെത്താവുന്ന വിധത്തില് ബസ് സര്വ്വീസ് വേണമെന്ന ആവശ്യം ശക്തമാണ്.
കുമരകത്തെ ഇടത്താവളമാകുന്ന അയ്യപ്പന്മാര് കുമരകത്തിന്റെ കായല്ഭംഗിയും ഇടത്തോടുകളും ഉള്നാടന് വയലോലകളും കാണുമ്പോള് ആദ്ധ്യാത്മികതക്കൊപ്പം ടൂറിസം മേഖലക്കും ശബരിമല സീസണില് ഉണര്വ്വും സമ്പത്തും ഉണ്ടാവും. ഇതു കണക്കിലെടുത്ത് ഈ സീസണില് കുമരകത്തുനിന്നും കൂടുതല് കെഎസ്ആര്ടിസി ബസ്സുകള് പമ്പയിലേക്ക് സര്വ്വീസ് നടത്തേണ്ടത് അനിവാര്യമാണെന്നാണ് നാട്ടുകാര് പറയുന്നത്.
