ന്യൂദല്ഹി: പ്രശസ്തമായ ന്യൂദല്ഹി സെന്റ് സ്റ്റീഫന്സ് കോളേജിനെ ക്രിസ്തീയ സ്ഥാപനമാക്കി മാറ്റുന്നുവെന്ന് പരക്കെ വിമര്ശനം. സ്ഥാനമൊഴിയുന്ന പ്രിന്സിപ്പല് അവതരിപ്പിച്ചിരിക്കുന്ന കോളേജ് മാനേജ്മെന്റ് ഭരണഘടനാ ഭേദഗതിക്കെതിരെ രൂക്ഷവിമര്ശനമാണ്.
ചര്ച്ച് ഓഫ് നോര്ത്ത് ഇന്ത്യക്കും (സിഎന്ഐ) പ്രിന്സിപ്പാളിനും കൂടുതല് ഭരണാധികാരം നല്കുന്ന തരത്തില് ഭരണഘടന മാറ്റിയാല് 102 വര്ഷം പഴക്കമുള്ള കോളേജിന് ദല്ഹി സര്വകലാശാലയിലെ അംഗീകാരം നഷ്ടമാകും. അത്തരമൊരു ഭേദഗതി സര്വകലാശാല ചട്ടങ്ങളുടെ ലംഘനമാകും. ഇതോടെ പ്രശസ്തമായ ഈ കോളേജിന്റെ നടത്തിപ്പിന്റെ ചെലവില് 95 ശതമാനവും നല്കുന്ന യുജിസിയുടെ സഹായം ഇല്ലാതാകും. അഞ്ചുശതമാനം മാത്രമാണ് മാനേജ്മെന്റായ സിഎന്ഐയും നടത്തിപ്പു ട്രസ്റ്റും വഹിക്കുന്നത്.
വിദ്യാര്ത്ഥിയെ ലൈംഗികമായി പീഡിപ്പിച്ചുവെന്നതുള്പ്പെടെയുള്ള ആരോപണങ്ങളില് കുടുങ്ങിയ മലയാളികൂടിയായ പ്രിന്സിപ്പല് വല്സന് തമ്പു വിരമിക്കുന്നതിനു തൊട്ടുമുമ്പ് സ്ഥാപനത്തിന്റെ ഭരണഘടനയില് പരിഷ്കാരം നിര്ദ്ദേശിച്ച് അവതരിപ്പിച്ചിട്ടുള്ള ഭേദഗതിയിലാണ് ഈ നിര്ദ്ദേശം. വിദ്യാര്ത്ഥികള്ക്കും ജീവനക്കാര്ക്കുമെതിരെ അച്ചടക്ക നടപടിക്ക് പരമാധികാരം പ്രിന്സിപ്പലിന് നല്കണമെന്നാണ് നിര്ദ്ദേശം. നിലവില് ഇത് ഭരണ സമിതിക്കാണ്. അദ്ധ്യാപകരുള്പ്പെടെ ജീവനക്കാരുടെ നിയമനം, പ്രവേശനം തുടങ്ങി എല്ലാ നടപടികളിലും ചര്ച്ചിന് മുഖ്യപങ്ക് നല്കണമെന്നും നിര്ദ്ദേശത്തിലുണ്ട്.
എന്നാല്, ഈ നിര്ദ്ദേശങ്ങള് സര്ക്കാര് സമിതിയായ യുജിസിയുടെ ഗ്രാന്ഡ് വാങ്ങി പ്രവര്ത്തിക്കുന്നതിന് തടസമാണെന്ന് നിയമവിദഗ്ദ്ധരും ചൂണ്ടിക്കാട്ടുന്നു. പൂര്വ വിദ്യാര്ത്ഥികളും അദ്ധ്യാപകരുമുള്പ്പെടെ വലിയൊരു വിഭാഗവും ഇൗ നിര്ദ്ദേശങ്ങള്ക്കെതിരെ ശബ്ദമുയര്ത്തിയിട്ടുണ്ട്. ഒരിക്കല് ഭാരതത്തിനാകെ, എല്ലാ ഭാരതീയര്ക്കുമായി തുറന്നിട്ടിരുന്ന മഹത്തായ കോളേജിനെ ക്രിസ്ത്യന് യഹൂദ സങ്കേതംപോലെയാക്കുകയാണെന്ന് ചരിത്രകാരനും പൂര്വ വിദ്യാര്ത്ഥിയുമായ രാമചന്ദ്ര ഗുഹ അഭിപ്രായപ്പെട്ടു. പുതിയ നീക്കം ഒരു ഗുണവുമുണ്ടാക്കില്ല, പകരം ഏകാധിപത്യം നടപ്പാക്കാനും ക്രിസ്ത്യാനികളല്ലാത്തവര്ക്ക് കോളേജിനെ അപ്രാപ്യമാക്കാനുമേ ഉപകരിക്കൂ എന്ന് അദ്ധ്യാപകര് അഭിപ്രായപ്പെടുന്നു.
