പുതിയസാരഥികള്‍ ഭരണമാരംഭിച്ചു; വികസനപ്രതീക്ഷയോടെ നാട്ടുകാര്‍

സ്വന്തം ലേഖകന്‍

കോട്ടയം: ത്രിതല പഞ്ചായത്ത് സംവിധാനങ്ങളിലും പുതിയസാരഥികള്‍ ചുമതലയേറ്റ് ഭരണമാരംഭിച്ചു. വലിയ വികസനപ്രതീക്ഷയിലാണ് നാട്ടുകാര്‍. ജില്ലാ പഞ്ചായത്തില്‍ യുഡിഎഫിനാണ് മേധാവിത്വം. 22 അംഗങ്ങള്‍ മാത്രമേ എല്‍ഡിഎഫിനുള്ളൂ. 11 ബ്ലോക്ക് പഞ്ചായത്തുകളില്‍ വൈക്കം, വാഴൂര്‍ ബ്ലോക്കുകളോടുകൂടിയുള്ള ഒമ്പതിടത്തും യുഡിഎഫിനാണ് ഭരണനേതൃത്വം. കടുത്തുരുത്തിയില്‍ കേരളകോണ്‍ഗ്രസ്(എം)ലെ ലൂസമ്മ ജയിംസാണ് പ്രസിഡന്റ്, ഉഴവൂരില്‍ മോളി ലൂക്കോസ്(കേരള കോണ്‍ഗ്രസ്(എം)), ളാലം ജോര്‍ജ്ജ് നടയത്ത്(കേരള കോണ്‍ഗ്രസ്(എം)), ഈരാറ്റുപേട്ട പ്രേംജി.ആര്‍(കോണ്‍ഗ്രസ്), പാമ്പാടി മാത്യൂസ്.ടി.എസ്(കോണ്‍ഗ്രസ്), മാടപ്പള്ളി സൈന തോമസ്(കേരള കോണ്‍ഗ്രസ്(എം), പള്ളം ടി.ടി.ശശീന്ദ്രനാഥ്(കോണ്‍ഗ്രസ്), കാഞ്ഞിരപ്പള്ളി അന്നമ്മ ജോസ്(കോണ്‍ഗ്രസ്) എന്നിവരാണ് യുഡിഎഫിന് ഭരണ നേതൃത്വം കിട്ടിയ ബ്ലോക്ക് പഞ്ചായത്തിലെ പ്രസിഡന്റുമാര്‍.

ഇടതിന് ഭൂരിപക്ഷമുള്ള വൈക്കത്തും വാഴൂരിലും സിപിഎമ്മിനാണ് പ്രസിഡന്റ് സ്ഥാനം. വൈക്കത്ത് ജയകുമാരി എം.ഐയും വാഴൂരില്‍ കെ.പി.ബാലഗോപാലനുമാണ് പ്രസിഡന്റുമാര്‍. വാഴൂര്‍ ബ്ലോക്ക് പഞ്ചായത്തില്‍ അക്കൗണ്ട് തുറന്നുകൊണ്ട് ബിജെപിയും ഈ തെരഞ്ഞെടുപ്പില്‍ ചരിത്രം സൃഷ്ടിച്ചു. ചെറുവള്ളി ഡിവിഷനില്‍ നിന്നും വിജയിച്ച ജയടീച്ചറാണ് ബിജെപിക്കായി വിജയം നേടിയത്.

ജില്ലയിലെ 71 ഗ്രാമപഞ്ചായത്തുകളില്‍ 4 ഇടത്ത് ഡിസംബര്‍ 1മുതലേ പുതിയ ഭരണസമിതി നിലവില്‍ വരൂ. ഇന്നലെയായിരുന്നു പ്രസിഡന്റ് വൈസ് പ്രസിഡന്റ് തെരഞ്ഞെടുപ്പ്. 40 ഗ്രാമപഞ്ചായത്തുകളില്‍ യുഡിഎഫിനാണ് പ്രസിഡന്റ് പദം. 24 സ്ഥലത്ത് ഇടതുമുന്നണിയും പ്രസിഡന്റ്പദം കരസ്ഥമാക്കി. 38 ഗ്രാമപഞ്ചായത്തുകളില്‍ നിന്നായി 102 അംഗങ്ങളെ വിജയിപ്പിക്കാന്‍ കഴിഞ്ഞ ബിജെപി ജില്ലയിലെ പ്രബലമായ സാന്നിധ്യമായി മാറി. ഗ്രാമപഞ്ചായത്തുകളില്‍ സിപിഎമ്മിന് 21 പ്രസിഡന്റ്പദം ലഭിച്ചപ്പോള്‍ സിപിഐക്ക് 2 എണ്ണംകൊണ്ട് തൃപ്തിപ്പെടേണ്ടി വന്നു. 24 പഞ്ചായത്തുകളുടെ പ്രസിഡന്റ് പദവി ഇക്കുറി കോണ്‍ഗ്രസിന് ലഭിച്ചു. കേരളകോണ്‍ഗ്രസിന് 15 ഇടത്തെ ഭരണനേതൃത്വവും ലഭിച്ചു. ഒരിടത്ത് മുസ്ലീംലീലിന്റെ പ്രസിഡന്റ് സ്ഥാനം. വാകത്താനം പഞ്ചായത്തില്‍ പ്രസിഡന്റായത് കക്ഷിരഹിതനായി മത്സരിച്ചയാളാണ്.

ഡിജിറ്റല്‍ ഇന്ത്യ പദ്ധതിയുടെ ഭാഗമായി ഗ്രാമപഞ്ചായത്തുകളുടെ പ്രവര്‍ത്തനങ്ങളെ കേന്ദ്ര-സംസ്ഥാന സര്‍ക്കാരുകളുമായി ബന്ധപ്പെടുത്തിയുള്ള ഭരണസംവിധാനത്തിനാണ് പുതിയ പഞ്ചായത്ത് കമ്മിറ്റികള്‍ നേതൃത്വം കൊടുക്കുവാന്‍ പോകുന്നത്.

കൂടാതെ വാര്‍ഡ് അടിസ്ഥാനത്തിലുള്ള ഗ്രാമസേവാ കേന്ദ്രങ്ങളും ജനങ്ങള്‍ക്ക് ഏറെ പ്രതീക്ഷയണ് നല്‍കുന്നത്.