ദമാസ്കസ്: സിറിയയില് ഞായറാഴ്ച മുതല് ഫ്രഞ്ച് പോര് വിമാനങ്ങള് നടത്തി വരുന്ന ആക്രമണത്തില് 33 ഇസ്ലാമിക് സ്റ്റേറ്റ് ഭീകരര് കൊല്ലപ്പെട്ടു. പാരീസില് ഐഎസ് നടത്തിയ ഭീകരാക്രമണത്തിന് തിരിച്ചടിയായിട്ടാണ് സിറിയയിലെ ഐഎസ് ശക്തികേന്ദ്രങ്ങളില് ഫ്രാന്സ് വ്യോമാക്രമണം കടുപ്പിച്ചത്.
ഇസ്ലാമിക് സ്റ്റേറ്റിന്റെ തലസ്ഥാനമായി കരുതുന്ന റാഖയിലായിരുന്നു ഫ്രഞ്ച് പോര് വിമാനങ്ങള് വ്യാപക നാശം വിതച്ചത്. റാഫേല്വിമാനങ്ങളും മിറാഷ് 2000 യുദ്ധവിമാനങ്ങളും ആക്രമണത്തില് പങ്കെടുക്കുന്നുണ്ട്. ഞായറാഴ്ച പുലര്ച്ചെ 20 ഇടങ്ങളില് ആക്രമണം നടത്തിയതിന് പിന്നാലെ ഇന്നലെ 16 ഇടങ്ങളിലും ഫ്രഞ്ച് വിമാനങ്ങള് ആക്രമണം നടത്തിയിരുന്നു.
ഐഎസിന്റെ ആയുധപ്പുരകള്ക്കും പരിശീലന കേന്ദ്രങ്ങള്ക്കും വ്യാപക നാശം നേരിട്ടതായാണ് റിപ്പോര്ട്ടുകള്. ഇസ്ലാമിക് സ്റ്റേറ്റിനെതിരേ ഫ്രഞ്ച് പ്രസിഡന്റ് ഫ്രാന്സ്വേ ഒലാന്ദെ കഴിഞ്ഞ ദിവസം പരസ്യമായ യുദ്ധപ്രഖ്യാപനം നടത്തിയിരുന്നു. പാരീസില് ഐഎസ് നടത്തിയ ഭീകരാക്രമണത്തില് 129 പേരാണ് കൊല്ലപ്പെട്ടത്.
നിരവധി പേര്ക്ക് പരിക്കേല്ക്കുകയും ചെയ്തിരുന്നു. ഇതിന്റെ പശ്ചാത്തലത്തിലായിരുന്നു ഫ്രാന്സ് സിറിയയില് വ്യോമാക്രമണം ശക്തമാക്കിയത്. റഷ്യയും സിറിയയില് ആക്രമണം ശക്തമാക്കിയിട്ടുണ്ട്. ഭീകര കേന്ദ്രങ്ങള് ലക്ഷ്യമാക്കിയുളള മിസൈല് പ്രയോഗമാണ് റഷ്യ ശക്തമാക്കിയത്.
