മാവൂര്: കുവൈത്തിലെ ഹോസ്പിറ്റലിലേക്ക് ജോലി വാഗ്ദാനം ചെയ്ത് ആലപ്പുഴ സ്വദേശികളില് നിന്ന് രണ്ട് ലക്ഷത്തി എഴുപത്തി അയ്യായിരം രൂപ വാങ്ങി വഞ്ചിച്ചതായി പരാതി. മാവൂര് കുതിരാടം സ്വദേശി ചാലുംപാട്ടില് സൈമണിനെതിരെയാണ് തട്ടിപ്പിനിരയായവര് പരാതി നല്കിയതെന്ന് തട്ടിപ്പിന്നിരയായവര് വാര്ത്താ സമ്മേളനത്തില് പറഞ്ഞു. ആലപ്പുഴ വളവനാട് പ്രവര്ത്തിച്ച ജെ.എസ് അസോസിയേറ്റ് എന്ന സ്ഥാപനത്തിന്റെ മറവിലാണ് തട്ടിപ്പ് നടത്തിയത്. ആലപ്പുഴ വണ്ടാനം സ്വദേശികളായ 12 ഓട്ടോറിക്ഷ തൊഴിലാളികളില് നിന്നാണ് പണം വാങ്ങി സൈമണ് മുങ്ങിയത്. തുടര്ന്ന് ഇവര് നടത്തിയ അന്വേഷണത്തിലാണ് സൈമണ് നല്കിയ മേല്വിലാസങ്ങള് വ്യാജമാണെന്ന് കണ്ടെത്തിയത്. സൈമണ് തട്ടിപ്പിനുപയോഗിച്ച കൊച്ചിയിലെ ഒരു പത്രസ്ഥാപനത്തിലെ ഐഡി കാര്ഡില് നിന്ന് ശേഖരിച്ച ഫോണ് നമ്പര് മുഖേന മാവൂര് സ്വദേശിയാണെന്ന് കണ്ടെത്തുകയായിരുന്നു.
അതേതുടര്ന്ന് ഇവര് മാവൂരിലെത്തുകയും മാവൂര് പോലീസ് മുഖേന പണം തിരികെ നല്കാന് ഒരു മാസകാലാവധിയില് കരാര് ഉണ്ടാക്കി. എന്നാല് ഈ കരാര് ലംഘിക്കപ്പെട്ടു. പണം നല്കാനുള്ളവര്ക്കെതിരെ കോഴിക്കോട് സിറ്റി കമ്മീഷണര്ക്ക് സൈമണ് കള്ളപ്പരാതി നല്കിയിരുന്നു. മാവൂരിലും പരിസരങ്ങളിലും കൂടാതെ തിരുവനന്തപുരം, വര്ക്കല, അരൂര്, പത്തനംതിട്ട തുടങ്ങിയ സ്ഥലങ്ങളിലും നിരവധി പേരെ വഞ്ചിച്ചതായാണറിവ്. വണ്ടാനം സ്വദേശികളായ രതീഷ്കുമാര്, ഫൈസല്, സക്കീര്, മനേഷ്, വര്ക്കല സ്വദേശി അഭിലാഷ് തുടങ്ങിയവര് വാര്ത്താ സമ്മേളനത്തില് സംബന്ധിച്ചു.
