അയോധ്യയിലെ ലാത്തിച്ചാര്ജില് അശോക് സിംഗാളിന്റെ
തലയ്ക്ക് മുറിവേറ്റ് രക്തമെഴുകുന്നു
ജനപങ്കാളിത്തംകൊണ്ടും ജനമുന്നേറ്റംകൊണ്ടും മറ്റൊരു സ്വാതന്ത്ര്യസമരമായിരുന്നു അയോധ്യാപ്രക്ഷോഭം. ബ്രിട്ടീഷ് സാമ്രാജ്യത്വം അടിച്ചേല്പ്പിച്ച രാഷ്ട്രീയാടിമത്വത്തില്നിന്ന് മോചനം നേടാനുള്ള സ്വാതന്ത്ര്യസമരമാണ് 1947 ല് നിര്ണായക വിജയം നേടിയതെങ്കില് എഡി 712 ല് മുഹമ്മദ് ബിന് കാസിം സിന്ധ് ആക്രമിച്ച് കീഴടക്കിയതിലൂടെ തുടക്കമിട്ട സാംസ്കാരിക അടിമത്വത്തിന്റെ നുകം വലിച്ചെറിയുകയായിരുന്നു 1992 ഡിസംബര് ആറിലൂടെ. രാമജന്മഭൂമിയായ അയോധ്യയിലെ ക്ഷേത്രം തകര്ത്ത് 1526 ല് മുഗള് ആക്രമണകാരിയും ഭരണാധികാരിയുമായിരുന്ന ബാബര് നിര്മിച്ച ‘മസ്ജിദ്’ തകര്ന്നുവീണത് ആധുനികഭാരതത്തിന്റെ ചരിത്രത്തിലെ വഴിത്തിരിവാണ്. പതിറ്റാണ്ടുകള് നീണ്ട ഈ പോരാട്ടത്തിന് ഇരുപതാം നൂറ്റാണ്ടിന്റെ അന്ത്യപാദത്തിലും ഇരുപത്തൊന്നാം നൂറ്റാണ്ടിന്റെ ആദ്യപതിറ്റാണ്ടിലും നേതൃത്വം നല്കിയ ഇതിഹാസമാനമുള്ള വ്യക്തിത്വമായിരുന്നു അശോക് സിംഗാള്.
ഹിന്ദു എന്നു പറയാന് ജനങ്ങള് മടിച്ചിരുന്ന കാലത്ത് ‘ഗൗര്വ് സെ കഹോ ഹം ഹിന്ദൂ ഹെ’ എന്ന് ആവര്ത്തിച്ചുപറഞ്ഞുകൊണ്ടാണ് അശോക് സിംഗാള് അയോധ്യാപ്രക്ഷോഭത്തെ നയിച്ചത്. ആത്മാഭിമാനത്തിന്റെ പ്രതീകങ്ങളായ അയോധ്യയും മഥുരയും കാശിയും വിട്ടുനല്കുകയാണ് മുസ്ലിം സഹോദരര് ചെയ്യേണ്ടതെന്ന് വിശ്വഹിന്ദുപരിഷത്തും മാര്ഗദര്ശക് മണ്ഡലും ഉയര്ത്തിയ ആവശ്യത്തില്നിന്ന് ഒരിഞ്ചുപോലും പിന്നോട്ടില്ലെന്ന് പ്രഖ്യാപിക്കാന് അശോക് സിംഗാള് ആരുടെയും മുഖം നോക്കിയില്ല. അയോധ്യയിലെ കളങ്കം തുടച്ചുനീക്കി രാമജന്മഭൂമി വീണ്ടെടുക്കാനുള്ള ശ്രമങ്ങള്ക്ക് രാഷ്ട്രീയപിന്തുണ ഇല്ലാതിരുന്നപ്പോഴും പ്രക്ഷോഭത്തെ പിന്തുണക്കാന് രാഷ്ട്രീയനേതൃത്വം ക്യൂനിന്നപ്പോഴും ഉന്നതമായ ശിരസോടെ, ഉറച്ച കാല്വെപ്പോടെ അശോക് സിംഗാള് എന്ന സമരനായകന് മുന്നോട്ടുതന്നെ സഞ്ചരിച്ചു.
രാമജന്മഭൂമിയിലെ തര്ക്കമന്ദിരം തകര്ന്നുവീണതിനെതിരെ ലോകമെമ്പാടും പ്രതിഷേധമുയര്ന്നിരുന്നു. എന്നാല് എതിര്പ്പുകള്ക്ക് മുന്നില് ഒരു വന്മതിലായി അശോക് സിംഗാള് നിലകൊണ്ടു. അയോധ്യയിലേത് പൂര്ത്തീകരിക്കപ്പെടാത്ത ദേശീയദൗത്യമാണെന്ന് പ്രധാനമന്ത്രിയായിരിക്കെ അടല്ബിഹാരി വാജ്പേയി പ്രഖ്യാപിച്ചത് ഈ ധീരതയുടെ പ്രതിഫലനമായിരുന്നു. വാജ്പേയി അയോധ്യാപ്രക്ഷോഭത്തിന് എതിരാണെന്ന് പ്രചരിപ്പിച്ചവര്ക്കുള്ള മറുപടികൂടിയായി ഇത്. വാജ്പേയി എടുത്തുപറഞ്ഞ ഈ ദൗത്യനിര്വഹണത്തിനാണ് അശോക് സിംഗാള് തന്റെ ജീവിതം ഉഴിഞ്ഞുവെച്ചത്. ഇതേ വാജ്പേയിയുടെ ഭരണകാലത്ത് വിലക്ക് ലംഘിച്ച് അയോധ്യയിലേക്ക് മാര്ച്ച് നടത്തി അറസ്റ്റ് വരിക്കാനും സിംഗാള് മറന്നില്ല. അതേസമയം, വാജ്പേയി അയോധ്യാപ്രക്ഷോഭത്തിന്റെ ഭാഗമാണെന്നും ഇതുമായി ബന്ധപ്പെട്ട് ഒരിക്കല് ലക്നൗവില് അറസ്റ്റുവരിച്ചിട്ടുണ്ടെന്നും സിംഗാള് ഓര്മെപ്പടുത്തി.
രാംലാല പ്രതിഷ്ഠയുള്ള സ്ഥലം ഹിന്ദുക്കള്ക്ക് അവകാശപ്പെട്ടതാണെന്ന് പ്രഖ്യാപിച്ച് രാമജന്മഭൂമി മൂന്നാക്കി വിഭജിച്ച് മറ്റ് അവകാശികള്ക്ക് നല്കിയ അലഹബാദ് ഹൈക്കോടതിയുടെ ഐതിഹാസിക വിധിയുണ്ടായപ്പോഴും ഒരിഞ്ചുപോലുമൊഴിയാതെ രാമജന്മഭൂമി മുഴുവന് ഹിന്ദുക്കള്ക്ക് വിട്ടുനല്കണമെന്നും അത് ഹിന്ദുക്കളുടെ ജന്മാവകാശമാണെന്നും അശോക് സിംഗാള് പ്രഖ്യാപിച്ചു. അലഹബാദ് ഹൈക്കോടതിവിധിക്കെതിരായ അപ്പീല് സുപ്രീംകോടതി പരിഗണനയിലിരിക്കുമ്പോഴും പ്രക്ഷോഭപാതയില് നിന്ന് പിന്മാറാന് അദ്ദേഹം തയ്യാറായില്ല. 2013 ല് പഞ്ചകോശി പരിക്രമയിലേക്ക് മാര്ച്ച് നടത്തി അദ്ദേഹം അറസ്റ്റുവരിച്ചു.
അയോധ്യ അശോക് സിംഗാളിന്റെ ആത്മാവില് അലിഞ്ഞുചേര്ന്ന വികാരമായിരുന്നു. അവിടെ ഉയര്ന്നുവരേണ്ട രാമക്ഷേത്രം അദ്ദേഹത്തിന്റെ ഹൃദയത്തില് ചിരപ്രതിഷ്ഠ നേടിയിരുന്നു. ആഞ്ജനേയനെപ്പോലെ തന്റെ ഹൃദയം പിളര്ന്നുകാണിച്ച് അദ്ദേഹം ഹിന്ദുക്കളെ ആത്മാഭിമാനികളാക്കി. അനതിവിദൂരഭാവിയില് അയോധ്യയില് രാമക്ഷേത്രമുയരുമ്പോള് സ്വര്ഗത്തിലിരുന്ന് ഏറ്റവും സന്തോഷിക്കുക അശോക് സിംഗാളിന്റെ ആത്മാവായിരിക്കും.
