കൊല്ലം: ശ്രീരാമകൃഷ്ണമിഷനിലെ സന്യാസിശ്രേഷ്ഠരുടെ സംഗമവേദിയായി പ്രബുദ്ധകേരളം മാസികയുടെ ശതാബ്ദിയാഘോഷസമ്മേളനം മാറി. ഇന്നലെ കളക്ട്രേറ്റിന് സമീപമുള്ള ടിഎം വര്ഗീസ് സ്മാരക മുനിസിപ്പല് ലൈബ്രറി ഹാളിലായിരുന്നു സമ്മേളനം സംഘടിപ്പിച്ചത്. ശ്രീരാമകൃഷ്ണാശ്രമത്തിന്റെ മലയാളമുഖമാസികയായ പ്രബുദ്ധകേരളത്തിന്റെ പത്രാധിപര് നന്ദാത്മജാനന്ദ അധ്യക്ഷത വഹിച്ച പരിപാടിയില് ആഗോള ശാരദാമഠങ്ങളുടെ ട്രസ്റ്റിയായ പ്രവ്രാജിക അജയപ്രാണാമാതാജി, ഒറ്റപ്പാലം ശ്രീരാമകൃഷ്ണാശ്രമം മഠാധിപതി സ്വാമി കൈവല്യാനന്ദ, കൊയിലാണ്ടി ശ്രീരാമകൃഷ്ണമഠം അധ്യക്ഷന് സ്വാമി ആപ്തലോകാനന്ദ, ഹരിപ്പാട് മഠം അധ്യക്ഷന് സ്വാമി വീരഭദ്രാനന്ദ, കായംകുളം മഠം അധ്യക്ഷന് സ്വാമി ഭുവനാത്മാനന്ദ, തിരുവനന്തപുരം മഠം അധ്യക്ഷ ചേതനാപ്രാണാമാതാജി എന്നിവര് സമ്മേളനത്തില് സംസാരിച്ചു.
ഭ്രാന്താലയമായി സ്വാമി വിവേകാനന്ദന് വിശേഷിപ്പിച്ച കേരളത്തെ തീര്ത്ഥാലയമാക്കി മാറ്റുവാന് പ്രബുദ്ധകേരളവും ശ്രീരാമകൃഷ്ണിഷനും വഹിച്ച പങ്ക് അനുപമമാണെന്ന് അജയപ്രാണാമാതാജി പറഞ്ഞു. കേരളത്തിന്റെ തലസ്ഥാനമായ തിരുവനന്തപുരത്ത് ഏറെകാലം പ്രവര്ത്തിച്ച സ്വാമി വിമലാനന്ദയെയും അനുസ്മരിച്ചു. ഉന്നതമായ ആധ്യാത്മികചിന്തകള് സമൂഹത്തിലെ എല്ലാ വിഭാഗങ്ങളിലേക്കും സന്നിവേശിപ്പിക്കുവാനുള്ള ദൗത്യമാണ് പ്രബുദ്ധകേരളം ഏറ്റെടുത്തതെന്നും കലുഷിതമായ മനസുകളെ ആത്മീയവിശ്വാസത്തിന്റെ കരുത്ത് നല്കി ലക്ഷ്യത്തിലേക്ക് തെളിക്കുന്ന പ്രവര്ത്തനം ഇന്നും തുടരുകയാണെന്നും മാതാജി കൂട്ടിച്ചേര്ത്തു.
ചിന്തകനായ പി.കേശവന്നായര്, എം.എസ്.ശ്യാംകുമാര്, ദേവസ്വം വകുപ്പ് പ്രിന്സിപ്പല് സെക്രട്ടറി ജ്യോതിലാല്, മാവേലിക്കര രാജ്മോഹന്, ഡോ.സൂനു എന്നിവരും പങ്കെടുത്തു.
