ബ്രസല്‍സ്: ഫ്രഞ്ച് തലസ്ഥാനമായ പാരീസില്‍ 158 പേരുടെ മരണത്തിനിടെയാക്കിയ ഭീകരാക്രമണത്തിന് പിന്നില്‍ പ്രവര്‍ത്തിച്ച മൂന്ന് ഫ്രഞ്ച് സഹോദരങ്ങള്‍ക്ക് അന്താരാഷ്ട്ര അറസ്റ്റ് വാറണ്ട്.
സഹോദരങ്ങളില്‍ ഒരാളുടെ രേഖാ ചിത്രം പുറത്തുവിട്ടു. ഫ്രഞ്ച് പൗരനായ സാലാ അബ്ദസലാം സലാഹ്‌ എന്ന 26കാരന്റെ ചിത്രമാണ് പോലീസ് പുറത്തുവിട്ടത്. ബാറ്റാക്ലാന്‍ കണ്‍സര്‍ട്ട് സെന്ററിലേക്ക് കാറോടിച്ച് എത്തിയത് ഇയാളാണെന്ന് സ്ഥിരീകരിച്ചു. ആക്രമണത്തില്‍ പങ്കെടുത്ത മൂന്ന് ഫ്രഞ്ച് സഹോദരങ്ങളില്‍ ഒരാളാണ് അബ്ദസാലാം എന്നാണ് പോലീസ് സംശയിക്കുന്നത്. സഹോദരങ്ങളില്‍ ഒരാള്‍ ബെല്‍ജിയത്തില്‍ പിടിയിലായിട്ടുണ്ട്..
ആക്രമണം നടത്തുന്നതിനായുള്ള ഗൂഢാലോചന നടന്നത് ബെല്‍ജിയത്തിലാണെന്നും സൂചനയുണ്ട്. ചാവേറാക്രമണത്തിന് ഉപയോഗിച്ച കാറുകളില്‍ രണ്ടെണം വാടകയ്‌ക്കെടുത്തത് ബ്രസല്‍സില്‍ നിന്നാണെന്ന് പോലീസിന് വിവരം ലഭിച്ചിട്ടുണ്ട്. ഇതേത്തുടര്‍ന്നാണ് ബെല്‍ജിയത്തിലെ ബോലെബീക്കില്‍ പോലീസ് തെരച്ചില്‍ നടത്തി ഏഴു പേരെ അറസ്റ്റ് ചെയ്തത്.
അതേസമയം സലാഹിന്റെ സഹോദരനും ആക്രമണത്തില്‍ പങ്കാളിയുമായ ഇബ്രാഹിം മരിച്ചെന്നാണ് റിപ്പോര്‍ട്ട്. ബറ്റാക്ലാനില്‍ നടന്ന ആക്രമണം ഇയാളാണ് നടത്തിയത്. സംഗീത പരിപാടിക്കിടെ ബറ്റാക്ലാനില്‍ നടന്ന ആക്രമണത്തില്‍ 82 പേര്‍ കൊല്ലപ്പെട്ടു. ഏറ്റവും കൂടുതല്‍ ആളുകള്‍ കൊല്ലപ്പെട്ടത് ഇവിടെയായിരുന്നു. സലാഹിന്റെ മറ്റൊരു സഹോദരനായ മുഹമ്മദ് ബെല്‍ജിയത്തില്‍ അറസ്റ്റിലായെന്നും റിപ്പോര്‍ട്ടുണ്ട്.
ഭീകരാക്രമണം നടത്തിയ ചാവേറുകളെ റിക്രൂട്ട് ചെയ്തതും അവര്‍ക്ക് പരിശീലനം നല്‍കിയതും ബെല്‍ജിയത്തില്‍വച്ചാണെന്ന് അമേരിക്ക അറിയിച്ചിട്ടുണ്ട്. സാമ്പത്തിക സഹായം നല്‍കിയതും ബ്രസല്‍സിലെ ചില കേന്ദ്രങ്ങളാണെന്നും അമേരിക്ക സൂചിപ്പിച്ചു.
