ഓസ്ലോ: യൂറോ 2016 യോഗ്യതക്കുള്ള ആദ്യപാദ പ്ലേ ഓഫില് ഹംഗറിക്ക് വിജയം. നോര്വേയെ ഏകപക്ഷീയമായ ഒരു ഗോളിനാണ് ഹംഗറി കീഴടക്കിയത്. കളിയുടെ 26-ാം മിനിറ്റില് ലാസ്ലോ ലിന്ഹെയ്സലറാണ് ഹംഗറിയുടെ വിജയഗോള് നേടിയത്. ഹംഗറിക്ക് വേണ്ടി ലാസ്ലോയുടെ അരങ്ങേറ്റ മത്സരം കൂടിയായിരുന്നു ഇത്.
കളിയില് മുന്തൂക്കവും ഷോട്ടുകള് പായിച്ചതും നോര്വേജിയന് താരങ്ങളായിരുന്നു. അവര് പായിച്ച 21 ഷോട്ടുകളില് ഒരെണ്ണം പോലും ഹംഗറി ഗോൡയെ കീഴ്പ്പെടുത്തി വലയിലെത്തിക്കാന് കഴിഞ്ഞില്ല. അതേസമയം ഹംഗറി ആകെ ലക്ഷ്യത്തിലേക്ക് ഷോട്ടുകളുതിര്ത്തത് നാല് തവണ മാത്രം. അതിലൊന്നാണ് നോര്വേ വലയില് തറച്ചുകയറിയത്. മത്സരത്തില് നോര്വേക്ക് 16 കോര്ണറുകള് ലഭിച്ചപ്പോള് ഹംഗറിക്ക് ഒന്നുപോലും ലഭിച്ചതുമില്ല.
പ്ലേ ഓഫിന്റെ രണ്ടാം പാദം ഞായറാഴ്ച ബുഡാപെസ്റ്റില് നടക്കും. ഈ കളിയില് ഒരു സമനില മാത്രം ഹംഗറിക്ക് യൂറോ 2016ലേക്ക് യോഗ്യത നേടാന്. 1986-ലെ ലോകകപ്പ് കളിച്ചശേഷം മറ്റൊരു മേജര് ടൂര്ണമെന്റിലും ഹംഗറിക്ക് ഇതുവരെ യോഗ്യത നേടാന് കഴിഞ്ഞിട്ടില്ല. ഇത്തവണ ഹംഗേറിയന് താരങ്ങള് ചരിത്രം കുറിക്കുമെന്ന് അനുമാനിക്കാം.
