ന്യൂദല്ഹി: ഭാര്യ സുനന്ദയുടെ ദുരൂഹ മരണക്കേസില് ഭര്ത്താവും എംപിയുമായി ശശി തരൂരിനെ നുണപരിശോധനയ്ക്ക് വിധേയനാക്കുമെന്ന് ദല്ഹി പോലീസിന്റെ പ്രത്യേകാന്വേഷണ സംഘം. വിഷം ഉള്ളില്ചെന്നു സംഭവിച്ച സുനന്ദയുടെ മരണത്തിനു കാരണം പ്ലൂട്ടോണിയം വിഷം ആണോ എന്ന് സ്ഥിരീകരിക്കാന് പോലീസ് എഫ്ഐബിയുടെ സഹായം തേടിയിരുന്നു. റിപ്പോര്ട്ട് ലഭിച്ചു. പ്ലൂട്ടോണിയം 210 അല്ല മരണകാരണമെന്ന് റിപ്പോര്ട്ടു പറയുന്നു. എന്നാല് മരിക്കാന് ഇടയായ കാരണം സംബന്ധിച്ച വിശദമായ റിപ്പോര്ട്ടാണ് ലഭിച്ചിരിക്കുന്നത്. ഇത് കോടതിയില് സമര്പ്പിക്കും.
റിപ്പോര്ട്ടിന്റെ ഉള്ളടക്കം ദല്ഹി പോലീസിനറിയാം. ഇ മെയിലിലാണ് ഇതു കിട്ടിയിരിക്കുന്നത്. അതിന്റെ പശ്ചാത്തലത്തിലാണ്, ഒമ്പതു മാസത്തോളമായി നിര്ത്തിവെച്ചിരുന്ന തുടര് നടപടികള് പുനരാരംഭിച്ച് തരൂരിനെ വീണ്ടും ചോദ്യം ചെയ്യാന് എസ്ഐടി തീരുമാനിച്ചത്. നുണപരിശോധനയ്ക്ക് കോടതിയില്നിന്ന് അനുമതി തേടുമെന്ന് എസ്ഐടി ഉദ്യോഗസ്ഥര് പറഞ്ഞു.
നേരത്തേ അന്വേഷണവുമായി ബന്ധപ്പെട്ട് തരൂരിന്റെ സഹായികളായ ആറുപേരെ നുണപരിശോധനയ്ക്ക് വിധേയരാക്കിയിരുന്നു. ഫെബ്രുവരിയിലാണ് വിസ്ര പരിശോധനയ്ക്ക് അമേരിക്കയ്ക്ക് അയച്ചത്. പരിശോധന ഫലം എയിംസ് വിദഗ്ദ്ധ സമിതിക്ക് പരിശോധനയ്ക്കു നല്കും. അതിന്റെ അടിസ്ഥാനത്തിലായിരിക്കും അക്കാര്യത്തില് തുടര്നടപടി. എയിംസില് ജഡം പോസ്റ്റുമോര്ട്ടം ചെയ്ത ഡോക്ടറാണ് മരണം വിഷം ഉള്ളില്ചെന്നാണെന്ന് ആദ്യം റിപ്പോര്ട്ടുചെയ്തത്.
