ആലപ്പുഴ: തദ്ദേശ സ്വയംഭരണ സ്ഥാപനങ്ങളിലെ തെരഞ്ഞെടുപ്പില്‍ ബിജെപിയുടെയും സഖ്യകക്ഷികളുടെയും സ്ഥാനാര്‍ത്ഥികളായി മത്സരിച്ച് വിജയകിരീടം ചൂടിയവര്‍ക്ക് സഹപ്രവര്‍ത്തകരുടെയും പാര്‍ട്ടി നേതാക്കളുടെയും അഭിനന്ദനപ്രവാഹം.
ഇന്നലെ ആലപ്പുഴയില്‍ ബിജെപി ജില്ലാ കമ്മറ്റി സംഘടിപ്പിച്ച ജില്ലയിലെ നഗരസഭകളിലും ബ്ലോക്കു ഡിവിഷനുകളിലും ഗ്രാമപഞ്ചായത്തുകളിലും വിജയിച്ച സ്ഥാനാര്‍ത്ഥികളുടെ അനുമോദന വേദിയിലാണ് പ്രവര്‍ത്തകരുടെയും അണികളുടെയും ആഹ്ലാദാരവങ്ങള്‍ അണപൊട്ടിയത്.
ബിജെപി സംസ്ഥാന ഉപാദ്ധ്യക്ഷന്‍ എം.ടി. രമേശ് പരിപാടി ഉദ്ഘാടനം ചെയ്തു. പ്രവര്‍ത്തകരും അണികളും തികഞ്ഞ ആത്മവിശ്വാസമാണ് പ്രകടിപ്പിച്ചത്. വിജയികള്‍ പരസ്പരം ഹസ്തദാനം നടത്തിയും കെട്ടിപ്പിടിച്ചും സന്തോഷം പകര്‍ന്നു. തുടര്‍ന്ന് വിജയികളെ ഷാള്‍ അണിയിച്ച് ആദരിക്കുകയും ചെയ്തു.
ബിജെപി ജില്ലാ പ്രസിഡന്റ് വെള്ളിയാകുളം പരമേശ്വരന്‍ അദ്ധ്യക്ഷത വഹിച്ചു. കര്‍ഷകമോര്‍ച്ച സംസ്ഥാന പ്രസിഡന്റ് കെ.എസ്. രാജന്‍, മഹിളാമോര്‍ച്ച സംസ്ഥാന പ്രസിഡന്റ് അഡ്വ. ഗീതാകുമാരി, കേരളാ കോണ്‍ഗ്രസ് ജനറല്‍ സെക്രട്ടറി രാജന്‍ കണ്ണാട്ട്, ജില്ലാ ജനറല്‍ സെക്രട്ടറിമാരായ കെ. സോമന്‍, കൊട്ടാരം ഉണ്ണികൃഷ്ണന്‍, ജില്ലാ ഭാരവാഹികളായ സി.എ. പുരുഷോത്തമന്‍, പി.കെ. വാസുദേവന്‍, കെ.ജി. കര്‍ത്ത, പാലമുറ്റത്ത് വിജയകുമാര്‍, സാനു സുധീന്ദ്രന്‍, എം.വി. ഗോപകുമാര്‍, ജി. ജയദേവന്‍, പി.കെ. അരവിന്ദാക്ഷന്‍, എസ്. ഗിരിജ, വത്സലക്കുഞ്ഞമ്മ, ഗീതാരാംദാസ്, സംസ്ഥാന സമിതിയംഗങ്ങളായ ഡോ. കെ.ജി. മോഹന്‍, ഡി. അശ്വിനീദേവ്, രാജന്‍ കെ. മാത്യു, മഹിളാ മോര്‍ച്ച ജില്ലാപ്രസിഡന്റ്‌സുഷമ വി. നായര്‍, കര്‍ഷക മോര്‍ച്ച ജില്ലാപ്രസിഡന്റ് എം.വി. രാമചന്ദ്രന്‍ തുടങ്ങിയവര്‍ സംസാരിച്ചു.
