കൊച്ചി: ലോക ന്യൂമോണിയ ദിനമായ നാളെ ഇന്ത്യന്‍ അക്കാദമി ഓഫ് പീഡിയാട്രിക്‌സ് (ഐഎപി) വിവിധ പരിപാടികളോടെ ആചരിക്കും. ആഗോളതലത്തില്‍ ഏറ്റവും കൂടുതല്‍ ശിശുമരണങ്ങള്‍ക്ക് കാരണമായ ന്യുമോണിയ രോഗത്തെ ഫലപ്രദമായി പ്രതിരോധിക്കുന്നതിനും കൂടുതല്‍ മികച്ച ചികിത്സാ സാദ്ധ്യതകള്‍ തേടുന്നതിനും അതേക്കുറിച്ച് വ്യാപകമായ അവബോധം സൃഷ്ടിക്കുന്നതിനുമായാണ് എല്ലാ വര്‍ഷവും നവംബര്‍ 12ന് ‘ലോക ന്യുമോണിയ ദിന’മായി ആചരിച്ചു വരുന്നത്. ‘ഓരോ ശ്വാസവും വിലപ്പെട്ടതാണ്. ന്യുമോണിയ ഉന്മൂലനം ചെയ്യൂ’ എന്നതാണ് ഈ വര്‍ഷത്തെ ദിനാചരണത്തിന്റെ വിഷയം. ദിനാചരണത്തിന്റെ ഭാഗമായി ബോധവല്‍ക്കരണ പരിപാടികളും സെമിനാറുകളും സംഘടന സംഘടിപ്പിക്കുമെന്ന് ഐഎപി ദേശീയ പ്രസിഡന്റ് ഡോ. സച്ചിദാനന്ദ കമ്മത്ത് കൊച്ചിയില്‍ വാര്‍ത്താസമ്മേളനത്തില്‍ പറഞ്ഞു. ന്യുമോണിയ ബാധിക്കുന്നതിന് ഒട്ടേറെ ഘടകങ്ങള്‍ കാരണമായിട്ടുള്ളതിനാല്‍ അതിനെ ഫലപ്രദമായി പ്രതിരോധിക്കുവാനും ചികിത്സിക്കാനും നിയന്ത്രിക്കാനും ഏകമുഖമായ പ്രതിരോധ സംവിധാനമില്ല. എങ്കിലും ശ്രദ്ധയോടെ ചികിത്സിച്ചാല്‍ ലോകമെമ്പാടുമുള്ള ശിശുമരണങ്ങളില്‍ അഞ്ചിലൊന്ന് മരണങ്ങള്‍ക്ക് കാരണമായ ഈ രോഗത്തില്‍ നിന്നും മുക്തി നേടാനാകുമെന്നും ഡോ. സച്ചിദാനന്ദ കമ്മത്ത് പറഞ്ഞു. കുട്ടികള്‍ക്ക് 6 മാസം വരെ നിര്‍ബന്ധമായി മുലയൂട്ടുന്നതിലൂടെയും തുടര്‍ന്ന് 2 വയസ്സ് വരെ പോഷക സമൃദ്ധമായ ഭക്ഷണത്തോടൊപ്പം മുലയൂട്ടല്‍ തുടരുകയും ചെയ്യുന്നതിലൂടെയും രോഗം തടയാനാകുമെന്നും അദ്ദേഹം ചൂണ്ടിക്കാണിച്ചു. കഫത്തോടുകൂടിയ ചുമ, അഞ്ചാംപനി, ഹീമോഫിലസ് ഇന്‍ഫഌവന്‍സ, ന്യുമോകോക്കസ് എന്നിവയ്‌ക്ക് വാക്‌സിനേഷന്‍ എടുക്കുക, ശുദ്ധജല ലഭ്യത, വൃത്തിയുള്ള അന്തരീക്ഷം, കൈകള്‍ കഴുകി വൃത്തിയാക്കാനുള്ള സാദ്ധ്യത എന്നിവ ഉറപ്പാക്കുക, വീടിനകത്തെ വായു മലിനീകരണം ഒഴിവാക്കാന്‍ ഏറ്റവും സുരക്ഷിതമായ കുക്കിംഗ് സ്റ്റൗവിന്റെ ഉപയോഗം തുടങ്ങിയവയാണ് രോഗം തടയാനുള്ള മറ്റ് മാര്‍ഗങ്ങള്‍. ഐഎപി കൊച്ചി പ്രസിഡന്റ് ഡോ. നാരായണന്‍, സെക്രട്ടറി ഡോ. വിവിന്‍ എബ്രഹാം എന്നിവരും വാര്‍ത്താസമ്മേളനത്തില്‍ പങ്കെടുത്തു.
ഇന്ത്യന്‍ അക്കാദമി ഓഫ് പീഡിയാട്രിക്‌സ് ലോക ന്യൂമോണിയ ദിനം ആചരിക്കും
ബന്ധപ്പെട്ട വാര്‍ത്തകള്‍
പുതിയ വാര്‍ത്തകള്‍
ജന്മഭൂമി ഓണ്‍ലൈന്‍© Mathruka Pracharanalayam Limited.
Tech-enabled by Ananthapuri Technologies.