ഫട്ടോര്ദ: ജവഹര്ലാല് നെഹ്റു സ്റ്റേഡിയത്തില് നടന്ന വാശിയേറിയ പോരാട്ടത്തില് ഗോവ എഫ്സിയും പൂനെ എഫ്സിയും സമനിലയില് പിരിഞ്ഞു. ഇരു ടീമുകളും ഓരോ ഗോള് വീതം നേടി. ഗോള്രഹിതമായ ആദ്യപകുതിക്കുശേഷം 46-ാം മിനിറ്റില് റോജര് ജോണ്സന്റെ സെല്ഫ് ഗോൡലൂടെ ഗോവ ലീഡ് നേടി. 64-ാം മിനിറ്റില് യൂജിന്സണ് ലിങ്ദോയിലൂടെ പൂനെ സമനില പിടിച്ചു. സമനിലയോടെ പൂനെ എഫ്സി ഏഴ് കളികളില് നിന്ന് 13 പോയിന്റുമായി ഒന്നാം സ്ഥാനത്ത് തുടരുന്നു. 11 പോയിന്റുള്ള എഫ്സി ഗോവ മൂന്നാം സ്ഥാനത്ത് ഉയരുകയും ചെയ്തു.
കൡയുടെ പത്താംമിനിറ്റില് ഗോവക്ക് ഗോളടിക്കാനുള്ള ആദ്യ സുവര്ണ്ണാവസരം ലഭിച്ചത്. സ്വന്തം പകുതിയില് നിന്ന് ലിയോ മൗറ ഹോകിപിനെ ലക്ഷ്യമാക്കിനീട്ടി നല്കിയ പാസ് ക്ലിയര് ചെയ്യാന് ബോക്സിന് പുറത്തേക്ക് ഓടിക്കയറിയ പൂനെ ഗോളി വെട്ടിച്ച് വലയിലേക്ക് പ്ലേസ് ചെയ്തെങ്കിലും പന്തിന് പിന്നാലെ പാഞ്ഞ റോജര് ജോണ്സണ് ഗോള് ലൈനില് വച്ച് രക്ഷപ്പെടുത്തി. പതിനെട്ടാം മിനിറ്റില് മറ്റൊരു അവസരവും ഗോവ നഷ്ടപ്പെടുത്തി. മൈതാനമധ്യത്തുനിന്ന് നീട്ടിക്കിട്ടിയ പന്ത് ജോക്വിം അബ്രാഞ്ചസിന് കിട്ടുമ്പോള് ഗോളി മാത്രമായിരുന്നു മുന്നില്. എന്നാല് പന്ത് നിയന്ത്രിച്ചു നിര്ത്തി ഷോട്ട് ഉതിര്ക്കേണ്ടതിന് പകരം അബ്രാഞ്ചസ് തിടുക്കത്തിലെടുത്ത ഷോട്ട് പോസ്റ്റിന് പുറത്തേക്ക് പറന്നു. 22-ാം മിനിറ്റില് ഗോവക്കും ഗോളിനും ഇടയില് ക്രോസ്ബാര് വിലങ്ങുതടിയായി. ആദ്യ പകുതിയില് പന്തടക്കത്തില് പൂനെയായിരുന്നു നേരിയ മുന്തൂക്കം നേടിയതെങ്കിലും ഷോട്ടുകളുതിര്ക്കുന്നതിലും എതിര് ബോക്സില് പന്തെത്തിക്കുന്നതിലും അവര് ഗോവയേക്കാള് പിന്നിലായി.
രണ്ടാം പകുതിയുടെ ആദ്യ മിനിറ്റില് ഗോവ ലീഡ് നേടി. ജോനാഥന് ലൂക്ക ബോക്സിലേക്ക് നല്കിയ പാസ് റോമിയോ ഫെര്ണാണ്ടസ് തിരിച്ചുവിട്ടെങ്കിലും പൂനെ പ്രതിരോധനിരതാരം റോജര് ജോണ്സന്റെ കാലില്ത്തട്ടി വലയില് കയറി. തൊട്ടുപിന്നാലെ ഗോള് മടക്കാന് പൂനെക്ക് അവസരം ലഭിച്ചെങ്കലും സൈഡ് പോസ്റ്റ് വില്ലനായി. 61-ാം മിനിറ്റില് പൂനെ ടുന്കെ സാന്ലിക്ക് പകരം വെസ്ലി വെര്ഹോക്കിനെ കളത്തിലിറക്കി. രണ്ട് മിനിറ്റിനുശേഷം പൂനെ സമനിലഗോള് നേടുകയും ചെയ്തു. സകോറ നല്കിയ പാസ് വെര്ഹോക്കിന്. പന്തുമായി വലതുവിംഗില്ക്കൂടി കുതിച്ചുകയറിയ ശേഷം ബോക്സിലേക്ക് നല്കിയ തകര്പ്പന് ക്രോസ് അതിസുന്ദരമായ ബുള്ളറ്റ് ഹെഡ്ഡറിലൂടെ ലിങ്ദോ ഗോവന് വലയിലെത്തിച്ചു. അവസാന മിനിറ്റുകളില് ഇരുടീമുകളും വിജയത്തിനായി മികച്ച ആക്രമണങ്ങള് മെനഞ്ഞെങ്കിലും ലക്ഷ്യം കാണാന് കഴിഞ്ഞില്ല.
