കൊച്ചി: മെട്രോ നഗരം ഉള്ക്കൊള്ളുന്ന വികസിത ജില്ലയെന്ന് വിശേഷിപ്പിക്കുമ്പോഴും 18 ബൂത്തുകളാണ് ദുര്ഘട ബൂത്തുകളായി കണക്കാക്കുന്നത്. അതത് ബ്ലോക്ക് പഞ്ചായത്തുകളില് നിന്നും ഒരു മണിക്കൂറിലധികം ദൂരെയുള്ള പ്രദേശങ്ങളെയാണ് ഇവ. പലതും കാടിനും കായലിനും നടുക്ക് സ്ഥിതി ചെയ്യുന്നവ.
കോതമംഗലം ബ്ലോക്ക് പഞ്ചായത്തിന് കീഴിലുള്ള കുട്ടമ്പുഴ പഞ്ചായത്തിലെ മണികണ്ഠന്ചാല്, മാമലക്കണ്ടം, താളംകണ്ടം കോളനി, തേര കോളനി, കല്ലേലിമേട്, തലവച്ചംപാറ, കുഞ്ചിപ്പാറ, ഉറിയമ്പെട്ടി, മെദനപ്പാറ, തലിപ്പാറ തുടങ്ങി പ്രദേശങ്ങളും കടമക്കുടി പഞ്ചായത്തില് പിഴല ഭാഗത്തുള്ള മൂന്ന് ബൂത്തുകളും ചേരാനല്ലൂര് ഗ്രാമപഞ്ചായത്തിന് കീഴിലുള്ള ഒരു ബൂത്തും, വേങ്ങൂര് ഗ്രാമ പഞ്ചായത്തിന് കീഴിലുള്ള പോങ്ങിന്ചുവട്, മുടക്കുഴ ഗ്രാമ പഞ്ചായത്തിലെ ഇളമ്പക്കപ്പിള്ളി, കൊച്ചിന് കോര്പ്പറേഷനു കീഴിലുള്ള താന്തോന്നിത്തുരുത്ത് എന്ന പ്രദേശവുമുള്പ്പെടെ 18 ബൂത്തുകള് വിദൂര പോളിംഗ് ബൂത്തുകളായി പരിഗണിച്ച് പ്രത്യേക സജ്ജീകരണങ്ങള് ഒരുക്കിയിട്ടുണ്ട്.
കരയുമായി പാലം വഴി പോലും ബന്ധമില്ലാത്ത കടമക്കുടി പഞ്ചായത്തിലെ പിഴല ദ്വീപിലേക്കും ചേരാനല്ലൂര് പഞ്ചായത്തിനു കീഴിലുള്ള കൊറുങ്കോട്ട ദ്വീപിലേക്കുമുള്ള സഞ്ചാരത്തിനുള്ള ഏക ആശ്രയം ചങ്ങാടങ്ങളാണ്. ഇവിടെ സജ്ജീകരിച്ചിട്ടുള്ള വിതരണ കേന്ദ്രത്തിലേക്ക് വള്ളം വഴിയാണ് പോളിംഗ് ഉദ്യോഗസ്ഥര് ,യന്ത്ര സാമഗ്രികളും മറ്റു അവശ്യ വസ്തുക്കളും എത്തിക്കേണ്ടത്. അതുകൊണ്ട് തന്നെ തിരഞ്ഞെടുപ്പിനായി പ്രത്യേകം അനുവദിക്കുന്ന ചങ്ങാടങ്ങളുടെ ഉറപ്പും 24 മണിക്കൂര് സേവനവും ഉറപ്പു വരുത്തിയിട്ടുണ്ട്.
കാട്ടുമൃഗങ്ങളെ ഭയന്നും പോളിംഗ് സാമഗ്രികള് തലക്കു ചുമന്നും എത്തിക്കേണ്ട കാടിന്റെ നടുവിലുള്ള പോളിംഗ് സ്റ്റേഷനുകളാണ് കുട്ടമ്പുഴയിലേത്. ഇവിടേക്ക് കടന്നു ചെല്ലുവാന് ജീപ്പ് ആണ് ഏക ആശ്രയം. മാത്രമല്ല ഈ സ്ഥലങ്ങളില് വൈദ്യുതി ലഭ്യത ഇല്ലാത്തതിനാല് സോളാര് പാനലുകളുടെ സഹായത്തോടെ ലഭിക്കുന്ന വൈദ്യുതിയുടെ സഹായത്തോടെയാണ് തിരഞ്ഞെടുപ്പ് നടത്തുന്നത്.
പോളിങിന് മുന്നോടിയായി മൂന്ന് ദിവസം മുന്പും കഴിഞ്ഞ് മൂന്ന് ദിവസത്തിന് ശേഷവുമാണ് പോളിംഗ് ഉദ്യോഗസ്ഥര് തിരിച്ചെത്തുന്നത്. അതുകൊണ്ട് തന്നെ ഇലക്ഷന് ഉദ്യോഗസ്ഥര്ക്ക് വേണ്ട സൗകര്യങ്ങളും ഇവിടെ സജ്ജീകരിച്ചുകഴിഞ്ഞതായും വീദൂര പോളിങ്ങ് സ്റ്റേഷനുകളുടെ പ്രത്യേക സുരക്ഷ മുന്നിര്ത്തി കൂടുതല് പോലീസ് തിരഞ്ഞെടുപ്പ് ഉദ്യോഗസ്ഥരെ നിയോഗിച്ചിട്ടുണ്ടെന്നും ഡെപ്യൂട്ടി കളക്ടര് എസ്. ഷാനവാസ് പറഞ്ഞു.
