ആലപ്പുഴ: സിവില് തര്ക്കങ്ങളില് പോലീസ് ഇടപെടരുതെന്ന് സംസ്ഥാന മനുഷ്യാവകാശ കമ്മീഷന് അംഗം ആര്. നടരാജന്. വഴിത്തര്ക്കങ്ങളില് ഇടപെടാന് പോലീസിന് അധികാരമില്ലെന്നും ഉത്തരവില് പറയുന്നു. വഴി അവകാശം നിഷേധിക്കപ്പെടുന്ന സന്ദര്ഭങ്ങളില് നിയമപരമായ മാര്ഗ്ഗങ്ങളിലൂടെ മാത്രം പുന:സ്ഥാപിക്കണം. പോലീസ് ഇക്കാര്യത്തില് ആര്ക്കും ഒത്താശ ചെയ്തു കൊടുക്കരുതെന്നും ആര്. നടരാജന് ഉത്തരവില് പറഞ്ഞു.
സിവില് കേസുകളില് പോലീസ് ഭീഷണിപ്പെടുത്തുന്ന സംഭവങ്ങള് ഉണ്ടായാല് അത് സേനയ്ക്കു തന്നെ അപമാനകരമാണെന്നും ഉത്തരവില് പറയുന്നു. ക്രമസമാധാന പ്രശ്നങ്ങള് ഇല്ലെങ്കില് സിവില് തര്ക്കങ്ങളില് നിന്നും പോലീസ് മാറിനില്ക്കണം. സ്ത്രീകളെ സ്റ്റേഷനില് വിളിച്ചു വരുത്തി ചോദ്യം ചെയ്യരുതെന്നും ഉത്തരവില് പറയുന്നു.
ചേര്ത്തല സിഎംസി 34ല് മൈഥിലി നല്കിയ പരാതിയിലാണ് നടപടി. തനിക്ക് 18 സെന്റ് സ്ഥലമുണ്ടെന്നും ഇതില് ഒന്നര അടി വഴിക്ക് വിട്ടുകൊടുത്തെന്നും എന്നാല് അയല്ക്കാര് പോലീസുകാരുടെ സഹായത്തോടെ തനിക്കെതിരെ പ്രവര്ത്തിക്കുകയാണെന്നും പരാതിയില് പറയുന്നു. തന്നെ സ്റ്റേഷനില് വിളിച്ചു വരുത്തി ചോദ്യം ചെയ്തതായും പരാതിയില് പറയുന്നു.
ചേര്ത്തല സബ്ഇന്സ്പെക്ടര് ഇത്തരം ആരോപണങ്ങള് ഉണ്ടാകാതെ പ്രവര്ത്തിക്കണമെന്ന് ആര്. നടരാജന് ഉത്തരവില് പറഞ്ഞു. സ്ത്രീകളെ സ്റ്റേഷനില് വിളിച്ചുവരുത്തി ചോദ്യം ചെയ്യരുതെന്ന് ചേര്ത്തല എസ്ഐക്ക് കര്ശന നിര്ദ്ദേശം നല്കണമെന്നും കമ്മീഷന് അംഗം ആര്. നടരാജന് ജില്ലാ പോലീസ് മേധാവിക്ക് നിര്ദ്ദേശം നല്കി.
