ആലപ്പുഴ: കെഎസ്ആര്‍ടിസിയുടെ വരുമാനം വര്‍ധിപ്പിക്കാന്‍ ജീവനക്കാര്‍ മുന്‍കൈയെടുക്കണമെന്നും പ്രതിദിന കളക്ഷന്‍ 7.25 കോടിയെങ്കിലുമായാല്‍ മാത്രമെ നഷ്ടമില്ലാതെ പ്രവര്‍ത്തിപ്പിക്കാന്‍ കഴിയൂവെന്നും മന്ത്രി തിരുവഞ്ചൂര്‍ രാധാകൃഷ്ണന്‍ പറഞ്ഞു.
ആലപ്പുഴ കെഎസ്ആര്‍ടിസി ബസ് സ്റ്റേഷന്‍ വികസന സമഗ്രപദ്ധതി ശിലാസ്ഥാപനം നിര്‍വഹിച്ചു സംസാരിക്കുകയായിരുന്നു അദ്ദേഹം. ജീവനക്കാരുടെ ശമ്പളവും വിരമിച്ചവരുടെ പെന്‍ഷനും കൃത്യമായി നല്‍കണമെങ്കില്‍ വരുമാനം ഗണ്യമായി വര്‍ധിപ്പിച്ചെങ്കിലേ പറ്റൂ. അതിന് ജീവനക്കാര്‍ തന്നെ മുന്‍കൈയെടുക്കണമെന്ന് മന്ത്രി പറഞ്ഞു. പഴയ ബസ്സുകളും പഴഞ്ചന്‍ ഏര്‍പ്പാടുകളുമായി കെഎസ്ആര്‍ടിസിക്ക് നില നില്‍ക്കാനാകില്ല.
കാലോചിതമായ മാറ്റവും പരിഷ്‌കാരങ്ങളും കൊണ്ടുവന്നെങ്കില്‍ മാത്രമേ ജനങ്ങള്‍ അംഗീകരിക്കൂ. കെഎസ്ആര്‍ടിസിയുടെ വികസന പ്രവര്‍ത്തനങ്ങളില്‍ ജനപ്രതിനിധികളും തദ്ദേശ സ്ഥാപനങ്ങളും സഹകരിക്കുകയും സാമ്പത്തികമായി സഹായിക്കുകയും വേണമെന്ന് മന്ത്രി പറഞ്ഞു. ജീവനക്കാര്‍ സഹകരിച്ചാല്‍ കെഎസ്ആര്‍ടിസിയിലെ 90 ശതമാനം പ്രശ്‌നങ്ങള്‍ക്കും പരിഹാരം കാണാനാകും. ജീവനക്കാരുടെ ഭാഗത്തു നിന്ന് അടുത്തിടെയുണ്ടായ ചില നടപടികള്‍ കെഎസ്ആര്‍ടിസിയുടെ വരുമാനത്തില്‍ ഗണ്യമായ വര്‍ധനവുണ്ടാക്കിയിട്ടുണ്ട്.
കഴിഞ്ഞ ഒരു വര്‍ഷത്തിനുള്ളില്‍ കെഎസ്ആര്‍ടിസിയുടെ നഷ്ടം 50 ശതമാനത്തോളം കുറവുണ്ടായി. കെഎസ്ആര്‍ടിസിയുടെ പ്രതിദിന വരുമാനം 4.5 കോടിയില്‍ നിന്ന് 7.25കോടിയായി വര്‍ധിപ്പിക്കാന്‍ സംസ്ഥാനത്തെ 92 ഡിപ്പോകള്‍ക്കും നിര്‍ദേശം നല്‍കിയതായി മന്ത്രി പറഞ്ഞു. ആലപ്പുഴ കെഎസ്ആര്‍ടിസി ഓഫീസ് സമുഛയം വിനോദസഞ്ചാരികളെ കൂടി ആകര്‍ഷിക്കുന്ന തരത്തില്‍ നവീകരിക്കുമെന്ന് മന്ത്രി പറഞ്ഞു. ആലപ്പുഴ ഡിപ്പോയിലെ പ്രതിദിന കലക്ഷനില്‍ ഗണ്യമായ കുറവുണ്ട്.
പന്ത്രണ്ടു ലക്ഷം രൂപ ടാര്‍ജറ്റ് നിശ്ചയിച്ചിട്ടുണ്ടെങ്കിലും 1.5 ലക്ഷം രൂപയുടെ കുറവുണ്ട്.ഡിപ്പോയിലെ നൂറ്റി ഇരുപത്തിമൂന്ന് ഷെഡ്യൂളുകളില്‍ തൊണ്ണൂറ്റിമൂന്ന് എണ്ണം മാത്രമേ ഇപ്പോള്‍ സര്‍വീസ് നടത്തുന്നുള്ളൂ. ഷെഡ്യൂളുകള്‍ പൂര്‍ണമായും പുനസ്ഥാപിക്കുന്നത് നഷ്ടം വര്‍ധിപ്പിക്കുകയേ ഉള്ളൂവെന്ന് മന്ത്രി ചൂണ്ടിക്കാട്ടി. കെ സി വേണുഗോപാല്‍ എംപി അധ്യക്ഷത വഹിച്ചു.
ജില്ലാ പഞ്ചായത്ത് പ്രസിഡന്റ് അഡ്വ യു. പ്രതിഭാഹരി, നഗരസഭാ ചെയര്‍പേഴ്‌സണ്‍ മേഴ്‌സി ടീച്ചര്‍, കൗണ്‍സിലര്‍ സതീദേവി, കെ എസ് ആര്‍ ടി സി ജനറല്‍മാനേജര്‍ ആര്‍ സുധാകരന്‍, ബോര്‍ഡംഗം സന്ദീപ് തോമസ്, ചീഫ് എന്‍ജിനീയര്‍ ആര്‍ ബിന്ദു, ഡയറക്ടര്‍മാരായ എം ടി സുകുമാരന്‍, സണ്ണിതോമസ് സംസാരിച്ചു.
