ന്യൂയോര്ക്ക്: സ്വാതന്ത്ര്യം ലഭിച്ചതിനുശേഷം ഭാരതത്തിന് ലഭിച്ച ഏറ്റവും മികച്ച നേതാവാണ് പ്രധാനമന്ത്രി നരേന്ദ്ര മോദിയെന്ന് മാധ്യമ ചക്രവര്ത്തി റൂപ്പര്ട്ട് മര്ഡോക്. മികച്ച നേതാവ്, മികച്ച നയങ്ങള്, പക്ഷെ ഏറ്റവും സങ്കീര്ണ്ണമായ രാജ്യത്ത് നേട്ടങ്ങള് കൈവരിക്കുക വലിയ ദൗത്യം തന്നെയാണ്. മര്ഡോക് കൂടിക്കാഴ്ചക്കു ശേഷം ട്വീറ്റ് ചെയ്തു.
ഭാരതം ലോകത്തേറ്റവും വലിയ വിപണിയാണിന്ന്. ഭാരതം അതിവേഗത്തില് ഡിജിറ്റലാകണം. 4ജി ശൃംഖല വികസിപ്പിക്കണം. കൂടിക്കാഴ്ചയില് മര്ഡോക് മോദിയോടു പറഞ്ഞു.
മോദിയുടെ ഊര്ജ്ജസ്വലമായ നേതൃത്വത്തെ മാധ്യമ മേധാവികള് പ്രശംസിച്ചു. ഭാരതത്തിന്റെ ഭാവി ഭദ്രമാണെന്നും അവര് പ്രതീക്ഷ പ്രകടിപ്പിച്ചു. ലോകത്തെ വിനോദവ്യവസായവുമായി ബന്ധപ്പെട്ട 40 ശതമാനം സ്ഥാപനങ്ങളളുടെ മേധാവികള് കൂടിക്കാഴ്ചയില് പങ്കെടുത്തു.
ഡിജിറ്റല് ഇന്ത്യ വേഗം നടപ്പാക്കണമെന്നായിരുന്നു മിക്കവരുടേയും ആവശ്യം. ന്യൂസ് കോര്പ്പറേഷന് മേധാവി റൂപ്പര്ട്ട് മര്ഡോക്, സെഞ്ച്വറി ഫോക്സ് (ഫോക്സ് ന്യൂസ്) മേധാവി ജെയിംസ് മര്ഡോക്, റോബര്ട്ട് തോംസണ്, സ്റ്റാര് ഇന്ത്യാ മേധാവി ഉദയ്ശങ്കര്, ഡിസ്കവറി കമ്മ്യൂണിക്കേഷന്സ് മേധാവി ഡേവിഡ് സാസ്ലാവ്, സോണി എന്റര്ടെയ്ന്മെന്റ് മേധാവി മൈക്കിള് ലിന്റണ്, മൈക്കള് റോത്ത്, വൈസ് മീഡിയയിലെ ഷെയ്ന് സ്മിത്ത് എന്നിവരടക്കം പ്രമുഖര് പങ്കെടുത്തു.
