മോസ്കോ: സിറിയയില് നിരന്തര അക്രമണങ്ങള് അഴിച്ചു വിടുന്ന ഐഎസ് ഭീകരര്ക്കെതിരെ വ്യോമാക്രമണമുള്പ്പെടെയുള്ള നടപടികള്ക്ക് റഷ്യ തയാറെടുക്കുന്നതായി റിപ്പോര്ട്ട്.
യുഎസ് നേതൃത്വത്തിലുള്ള സഖ്യസേന നിലവില് ഐഎസിനെതിരെ സിറിയയിലും ഇറാക്കിലും വ്യോമാക്രമണം നടത്തുന്നുണ്ട്. എന്നാല് റഷ്യയെ ഇതില് പങ്കാളികളാക്കിയിട്ടില്ല. യുഎസ് ഉള്പ്പെടെയുള്ള രാജ്യങ്ങളുമായി സഹകരച്ച് ഐഎസിനെതിരെ പോരാടുവാനുള്ള ചര്ച്ചകളും റഷ്യയുടെ ഭാഗത്തു നിന്നും പുരോഗമിക്കുന്നുണ്ട്. ചര്ച്ചയില് ധാരണയിലെത്തുവാന് സാധിക്കുന്നില്ലെങ്കില് റഷ്യ സിറിയയില് നേരിട്ട് ഇടപെടുമെന്നാണ് ബ്ലൂംബര്ഗ് ഓണ്ലൈന് റിപ്പോര്ട്ട് ചെയ്യുന്നത്.
ഇതിനോടകം തന്നെ സിറിയന് പ്രസിഡന്റ് ബാഷര് അല് അസദിന്റെ സൈന്യത്തിനൊപ്പം ഐഎസിനെതിരെ പോരാടുവാന് റഷ്യന് സൈനികരും സിറിയയില് എത്തിയിട്ടുണ്ട്. അസദുമായി അടുത്ത സൗഹൃദമുള്ള വക്തിയാണു റഷ്യന് പ്രസിഡന്റ് വ്ളാഡിമര് പുട്ടിന്. റഷ്യയില് നിന്നും വന് തോതില് അയുധവും അസദിനു ലഭിക്കുന്നുണ്ട്.
അസദിനെ ഭരണത്തില് നിന്നും മാറ്റുകയെന്നതാണ് യുഎസിന്റെയും മറ്റ് പാശ്ചാത്യ രാജ്യങ്ങളുടെയും താല്പര്യം. എന്നാല് സിറിയയില് അസദ് തന്നെ തുടരണമെന്നതണു റഷ്യയുടെ താല്പര്യം.
