ന്യൂദൽഹി: ഭാരതത്തിലുള്ളത് 30.81 ലക്ഷം സർക്കാരിതര സംഘടനകളെന്ന് (എൻജിഒ) സിബിഐ കണ്ടെത്തി. ഇവയിൽ 27 ലക്ഷം സംഘടനകളും തങ്ങളുടെ കണക്കുകൾ സർക്കാരിന് നൽകാറില്ല. വരുമാനം, ചെലവ്, പണം ചെലവിടുന്ന വഴികൾ തുടങ്ങി യാതൊന്നും ഇവ വെളിപ്പെടുത്താറുമില്ല. അതായത, സാമൂഹ്യ പ്രവർത്തനം, ദാരിദ്യനിർമ്മാർജ്ജനം, വന്യജീവി സംരക്ഷണം, വിദ്യാഭ്യാസം, എയ്ഡ്സ് ബോധവൽക്കരണം, ബാല്യാവകാശ സംരക്ഷണം, അനാഥ സംരക്ഷണം തുടങ്ങി പലപല ലേബലുകളിൽ പ്രവർത്തിക്കുന്ന ഇവയിൽ പലതും അടിച്ചുമാറ്റുന്നത് കോടാനുകോടി രൂപയാണ്.
സന്നദ്ധ സംഘടനകളെപ്പറ്റിയുള്ള കണക്ക് സിബിഐ സുപ്രീംകോടതിയിലാണ് വെളിപ്പെടുത്തിയത്. മഹാരാഷ്ട്രയിൽ അണ്ണാ ഹസാരെയുടെ ഹിന്ദ് സ്വരാജ് ട്രസ്റ്റ് ഫണ്ട് ദുർവിനിയോഗം ചെയ്യുകയാണെന്നു കാട്ടി എംഎൽ ശർമ്മ എന്ന അഭിഭാഷകൻ മുൻപ് പൊതുതാല്പര്യഹർജി നൽകിയിരുന്നു. ഇതിൽ വാദം കേൾക്കവെയാണ് രാജ്യത്ത് എത്ര സർക്കാരിതര സംഘടനകൾ ഉണ്ടെന്നും അവ കൃത്യമായ വരവ് ചെലവ് കണക്കുകൾ നൽകുന്നുണ്ടോയെന്നും അന്വേഷിക്കാൻ കോടതി സിബിഐക്ക് നിർദ്ദേശം നൽകിയത്.
ഈ മാസം ഒന്നുവരെയുള്ള കണക്കാണ് സിബിഐ കോടതിയിൽ നൽകിയത്. 30,81,873 സംഘടനകൾ ഇപ്പോൾ രാജ്യത്തുണ്ടെന്നാണ് കണക്ക്. എന്നാൽ ഇവയിൽ വെറും പത്തു ശതമാനം മാത്രമാണ് കൃത്യമായ കണക്ക് ഹാജരാക്കുന്നത്. അതായത് 27ലക്ഷത്തിലേറെ സംഘടനകളും വരവുചെലവു കണക്ക് നൽകുന്നില്ല. സിബിഐ റിപ്പോർട്ടിൽ പറയുന്നു. 2.9 ലക്ഷം സംഘടനകൾ വരവു ചെലവു കണക്ക് കൃത്യമായി നൽകാറുണ്ട്.
രാജ്യത്തൊട്ടാകെ 15.85 ലക്ഷം പോലീസുകാരാണ് ഉള്ളത്. അതിൻെറ ഇരട്ടി എൻജിഒകളാണ് ഭാരതത്തിലുള്ളത്. ഹസാരെയുടെ സംഘടനയ്ക്ക് നീർത്തട വികസനത്തിന് സർക്കാർ ഒരു ലക്ഷം രൂപ നൽകി. ഇതിൽ 90 ശതമാനവും ഓണറേറിയം, യാത്രാപ്പടി, അച്ചടി തുടങ്ങിയവയുടെ ചെലവിനാണ് ഉപയോഗിച്ചത്. സിബിഐ കോടതിയിൽ പറഞ്ഞു.
ഗ്രീൻ പീസ് ഫൗണ്ടേഷൻ അടക്കം കൃത്യമായ വരവു ചെലവു കണക്ക് സമർപ്പിക്കാത്ത അയ്യായിരത്തോളം സർക്കാരിതര സംഘടനകളുടെ ലൈസൻസ് മോദി സർക്കാർ റദ്ദാക്കിയിരുന്നു. ഇതിൻെറ പേരിൽ മാധ്യമങ്ങളും സർക്കാരിതര സംഘടനകളും സർക്കാരിനെതിരെ പ്രചാരണം അഴിച്ചുവിടുകയും ചെയ്തിരുന്നു. അതിനു പിന്നാലയൊണ് കോടതിയുത്തരവു പ്രകാരം സിബിഐ എൻജിഒകളുടെ കണക്ക് എടുത്തത്.
കേരളത്തിൽ 3,63,000 സർക്കാരിതര സംഘടനകളാണ് ഉള്ളത്. ദേശീയതലത്തിൽ മൂന്നാം സ്ഥാനം. യുപിയാണ് ഒന്നാമത്, 5,48,000 സംഘടനകൾ. 5,18,000 സംഘടനകളുള്ള മഹാരാഷ്ട്രയാണ് രണ്ടാമത്. ആന്ധ്രാ പ്രദേശ് (2,92,000), ബംഗാൾ (2,34,000), തമിഴ്നാട് (1,55,000) എന്നിവ യഥാക്രമം നാല്, അഞ്ച് ആറ് സ്ഥാനങ്ങളിലാണ്.
