ചേര്ത്തല: നായശല്യം രൂക്ഷമായതോടെ നഗരവാസികള് ഭീതിയില്. അനക്കമില്ലാതെ അധികാരികള്. നഗരത്തിന്റെ വിവിധ ഭാഗങ്ങളില് തെരുവുനായ ശല്യം അതിരൂക്ഷമായിരിക്കുകയാണ്. ഒരാഴ്ചക്കുള്ളില് പത്തിലധികം പേര്ക്കാണ് നായ്കളുടെ കടിയേറ്റത്. നിരവധി പേര് വാഹനാപകടങ്ങളില് പെട്ട് ആശുപത്രിയിലുമായി. നഗരസഭ മാര്ക്കറ്റ്, മുട്ടം പള്ളിക്കു പിന്നിലെ കോണ്വെന്റ് റോഡ്, നഗരസഭ ഷോപ്പിങ് കോംപ്ലക്സ് പരിസരം, ഗവ. ഗേള്സ് ഹൈസ്കൂള് ജംഗ്ഷന് കിഴക്കുവശം, മണവേലി, 11 ാം മൈല്, അര്ത്തുങ്കല്, അരീപ്പറമ്പ്, പെരുമ്പാറ തുടങ്ങിയ പ്രദേശങ്ങളാണ് തെരുവുനായ്ക്കളുടെ വിഹാരകേന്ദ്രമായി മാറിയത്.
രാത്രിയും പുലര്ച്ചെയും നഗരത്തിലെ റോഡുകളിലൂടെ കാല്നട, ഇരുചക്രവാഹനയാത്രക്കാര്ക്കുപോലും സഞ്ചരിക്കാനാകാത്ത സ്ഥിതിയാണ്. കഴിഞ്ഞ ദിവസം ഷോപ്പിങ് കോംപ്ലക്സിലെ വ്യാപാര സ്ഥാപനത്തിലെത്തിയ വൃദ്ധനെ നായ ആക്രമിക്കുവാന് ശ്രമിച്ചിരുന്നു. ഓടിക്കൂടിയ വ്യാപാരികള് ചേര്ന്നാണ് നായയുടെ ആക്രമണത്തില് നിന്ന് ഇയാളെ രക്ഷിച്ചത്.
നഗരസഭ മാര്ക്കറ്റിലെയും, ഹോട്ടലുകളടക്കമുള്ള വ്യാപാരസ്ഥാപനങ്ങളില് നിന്നുള്ള മാലിന്യങ്ങളും ഭക്ഷണാവശിഷ്ടങ്ങളും വഴിയരികില് തള്ളുന്നതാണ് നഗരത്തില് നായശല്യം വര്ദ്ധിക്കുവാനുള്ള പ്രധാന കാരണം. ഭക്ഷണത്തിനായി കടിപിടികൂടുന്ന ഇവ പലപ്പോഴും ഭീകരാന്തരീക്ഷമാണ് സൃഷ്ടിക്കുന്നത്. നഗരത്തില് നായശല്യം രൂക്ഷമായിട്ടും അധികാരികളില് നിന്ന് നടപടിയുണ്ടാകാത്തത് വ്യാപക പ്രതിഷേധത്തിന് ഇടയാക്കിയിട്ടുണ്ട്.
ഇടറോഡുകളില് നിന്ന് പാഞ്ഞെത്തുന്ന നായ്കൂട്ടം കുറുകെ ചാടുന്നത് നിരന്തരം അപകടങ്ങള്ക്കും കാരണമാകുകയാണ്. ഇരുചക്രവാഹന യാത്രക്കാരടക്കമുള്ളവരാണ് പ്രധാനമായും അപകടങ്ങളില് പെടുന്നത്. നായയെ കണ്ട് വാഹനം വെട്ടിക്കുന്നതോടെ നിയന്ത്രണം തെറ്റി വാഹനം മറിയുകയാണ് പതിവ്.
നായശല്യം ഇല്ലാതാക്കുന്നതിന് സത്വരനടപടികള് സ്വീകരിക്കാത്ത പക്ഷം നഗരസഭാ ഓഫീസ് ഉപരോധം അടക്കമുള്ള സമരപരിപാടികള് നടത്തുവാനുള്ള ഒരുക്കത്തിലാണ് നാട്ടുകാര്.
