ന്യൂദല്ഹി: പട്ടികജാതി-പിന്നാക്ക വിഭാഗക്കാരെ അണിനിരത്തി ബിജെപി ആദ്യഘട്ട സ്ഥാനാര്ത്ഥി പട്ടിക പ്രഖ്യാപിച്ചു. ആദ്യഘട്ട പട്ടികയില് 60ശതമാനം പേരും പിന്നാക്ക-ദളിത് വിഭാഗത്തില് നിന്നുള്ളവരാണ്. വിവിധ ഘട്ടങ്ങളിലായി 43 മണ്ഡലങ്ങളിലെ സ്ഥാനാര്ത്ഥികളെയാണ് ബിജെപി കേന്ദ്രതെരഞ്ഞെടുപ്പ് സമിതി പ്രഖ്യാപിച്ചത്.
ദളിത്-പിന്നാക്ക വിഭാഗക്കാരെ ലക്ഷ്യമിട്ടുകൊണ്ട് രൂപീകരിച്ച ജെഡിയു-ആര്ജെഡി സഖ്യത്തെ നേരിടുന്നതിനായി സമൂഹത്തിലെ എല്ലാ വിഭാഗത്തെയും ഉള്പ്പെടുത്തിയുള്ള മികച്ച നേതാക്കളുടെ പട്ടികയാണ് ബിജെപി കേന്ദ്രതെരഞ്ഞെടുപ്പ് സമിതി പ്രഖ്യാപിച്ചത്. ആദ്യഘട്ട തെരഞ്ഞെടുപ്പ് നടക്കുന്ന ഒക്ടോബര് 12ന് മത്സരരംഗത്തുള്ള 19 സ്ഥാനാര്ത്ഥികളുടെ പേരുകള് ചൊവ്വാഴ്ച രാത്രി ചേര്ന്ന സമിതി പുറത്തുവിട്ടിട്ടുണ്ട്. 16ന് നടക്കുന്ന രണ്ടാം ഘട്ടത്തില് മത്സരം നടക്കുന്ന 15 മണ്ഡലങ്ങളിലെ സ്ഥാനാര്ത്ഥികളെയും പ്രഖ്യാപിച്ചു. സ്ഥാനാര്ത്ഥികളില് 26പേര് സിറ്റിംഗ് എംഎല്എമാരാണ്.
ബ്രാഹ്മണരും ഭൂമിഹാരും രാജ്പുതും കയസ്തര്ക്കുമുള്പ്പെടെ എല്ലാ വിഭാഗത്തെയും ഉള്പ്പെടുത്തിയുള്ള സ്ഥാനാര്ത്ഥിപ്പട്ടികയില് ഉന്നത,പിന്നാക്ക, ദളിത് പ്രാതിനിധ്യം ഉറപ്പാക്കിയിട്ടുണ്ടെന്ന് ബിജെപി നേതൃത്വം അറിയിച്ചു. സമൂഹത്തിലെ എല്ലാ വിഭാഗത്തില് നിന്നുമുള്ള നേതാക്കള് ബിജെപിയില് നിരവധിയുണ്ടെന്നും അതിനാല് തന്നെ ജാതിമത പരിഗണനകള്ക്കപ്പുറം പ്രഖ്യാപനം നടത്താന് സാധിക്കുന്നതായും ബീഹാര് ബിജെപി നേതൃത്വം അറിയിച്ചു. അടുത്ത പട്ടികയില് മുസ്ലിം വിഭാഗത്തില് നിന്നുള്ള ബിജെപി നേതാക്കളും ഇടംപിടിക്കുമെന്ന് ബീഹാര് ബിജെപി അധ്യക്ഷന് മംഗള് പാണ്ഡെയും ഷാനവാസ് ഹുസൈനും അറിയിച്ചു.
നിയമസഭയിലെ പ്രതിപക്ഷ നേതാവ് നന്ദ കിഷോര് യാദവ് ആദ്യഘട്ട പട്ടികയില് ഇടംപിടിച്ചിട്ടുണ്ട്. പാട്ന സാഹിബ് മണ്ഡലത്തില് നിന്നാണ് അദ്ദേഹം ജനവിധി തേടുക. അസംബ്ലിയിലെ പാര്ട്ടി ചീഫ് വിപ്പ് അരുണ് കുമാര് കുംരാറില് നിന്നാണ് ജനവിധി തേടുന്നത്. മറ്റു നേതാക്കളായ രേണുദേവി,പ്രമോദ് കുമാര്, പ്രേംകുമാര്, നിതിന് നവിയും എന്നിവരും ആദ്യഘട്ട പട്ടികയില് ഇടംപിടിച്ചു.
ആദ്യരണ്ടു ഘട്ടങ്ങളിലും ജനവിധി തേടുന്ന മണ്ഡലങ്ങളില് ഭൂരിഭാഗവും ബിജെപിയുടെ സഖ്യകക്ഷികളായ എല്ജെപി, ആര്എല്എസ്പി, എച്ച്എഎം(സെക്യുലര്) എന്നീ പാര്ട്ടികള്ക്കാണ് ലഭിച്ചിരിക്കുന്നത്. ഇവരുടെ സ്ഥാനാര്ത്ഥി നിര്ണ്ണയം പൂര്ത്തിയായി വരുന്നതേയുള്ളൂ. സമസ്തിപൂര്, ഭഗല്പൂര്, ബങ്ക, ഖഗരിയ, മുങ്കര്, ലകിസരായ്, ഷേക്പുര, നവാദ, ജാമുവ എന്നിവയാണ് ആദ്യ ഘട്ടത്തില് തെരഞ്ഞെടുപ്പ് നടക്കുന്ന ജില്ലകള്. കൈമുര്, റോട്ടസ്, അര്വാള്, ജഹാനാബാദ്, ഔറംഗാബാദ്, ഗയ എന്നീ ജില്ലകളിലെ മണ്ഡലങ്ങളില് ഒക്ടോബര് 16ന് വോട്ടെടുപ്പ് നടക്കും. ആദ്യഘട്ട വോട്ടെടുപ്പ് നടക്കുന്ന 49 മണ്ഡലങ്ങളിലെ തെരഞ്ഞെടുപ്പ് വിജ്ഞാപനം ഇന്ന് പുറപ്പെടുവിക്കും.
