രാമപുരം: പഞ്ചായത്ത് വക പൊതു കിണറിന്റെ മതില് തകര്ത്ത് വെള്ളത്തില് മാലിന്യം കലര്ത്തി സ്വകാര്യവ്യക്തി ജനങ്ങളുടെ കുടിവെള്ളം മുട്ടിച്ചു. തൈപ്പറമ്പ് കവലയിലെ കിണറാണ് ഉപയോഗശൂന്യമാക്കിയത്. നൂറോളം കുടുംബങ്ങളിലെ ആളുകള് കുടിവെള്ളത്തിനായി ആശ്രയിച്ചിരുന്ന കിണറാണ് നശിപ്പിച്ചത്. സ്വകാര്യ വ്യക്തിക്കെതിരെ നാട്ടുകാര് പോലീസില് പരാതി നല്കി.
ഇയാളുടെ വീടിന്റെ മുന്പിലുള്ള കിണറിലെ വെള്ളമെടുക്കാന് വരുന്നവരെ ഇയാള് മുന്പും അസഭ്യം പറയാറുണ്ട്. ആറുമാസം മുമ്പും ഇയാള് കിണറിന്റെ മതില് ഇടിക്കുകയും ജലം മലിനമാക്കുകയും ചെയ്തിരുന്നു. അന്ന് പ്രദേശവാസികള് സംഘടിച്ച് സ്ഥലത്ത് സംഘര്ഷാന്തരീക്ഷം ഉണ്ടായിരുന്നു. തുടര്ന്ന് പഞ്ചായത്ത് ഫണ്ട് അനുവദിച്ച് മതില് നിര്മ്മിച്ച് ജലം ശുദ്ധീകരിച്ച് വീണ്ടു ജനങ്ങള് ഉപയോഗിച്ചുവരുന്നതിനിടയിലാണ് കഴിഞ്ഞ ദിവസം വീണ്ടും സംഭവം ആവര്ത്തിച്ചത്. ഇയാള്ക്കെതിരെ നടപടിയെടുക്കണമെന്ന് നാട്ടുകാരുടെ ആവശ്യം ശക്തമാണ്. പ്രദേശത്ത് സംഘര്ഷാവസ്ഥ നിലനില്ക്കുകയാണ്. രാമപുരം പോലീസ് സ്ഥലത്തെത്തിയെങ്കിലും പ്രതി മുങ്ങിയിരിക്കുകയാണ്. രാമപുരം ഗ്രാമപഞ്ചായത്ത് പ്രസിഡന്റ് മാത്യു ഏബ്രഹാം, വാര്ഡ് മെമ്പര് സണ്ണി പൊരുന്നക്കോട്ട് തുടങ്ങിയവരും വിവിധ രാഷ്ട്രീയകക്ഷി നേതാക്കളും സംഭവസ്ഥലം സന്ദര്ശിച്ചു. കിണറിലെ വെള്ളത്തില് ഇയാള് വിഷം കലര്ത്തിയിട്ടുണ്ടെന്ന് സംശയിക്കുന്നതായി നാട്ടുകാര് പറഞ്ഞു.
