നീലംപേരൂര്: പടയണിക്കളത്തില് തിങ്ങിനിറഞ്ഞ ഭക്തരെ ഭക്തിയുടെ നിര്വൃതിയിലേക്ക് നയിച്ച് മകം പടയണി നടന്നു.
പതിനാറ് ദിവസത്തെ പടയണി ചടങ്ങുകളില് പതിനഞ്ചാം ദിവസമാണ് മകം പടയണി. മകം ദിവസത്തെ പടയണിയില് അടിയന്തിര കോലം അമ്പലകോട്ട ആണ്. പൂരം പടയണിയിലെ മറ്റുള്ള കോലങ്ങള്ക്കൊപ്പം എഴുന്നെള്ളുന്ന ഭീമസേനന്റെ കല്യാണസൗഗന്ധികം കഥയാണ് അമ്പലകോട്ടയുടെ ആധാരം. മകത്തിലും പൂരത്തിലും ആണ് ആഘോഷങ്ങള്നടക്കുന്നത്.
മകം നാള് നെല്ലിന്റെ ജന്മദിനമായതിനാല് കാര്ഷിക അഭിവൃദ്ധിക്ക് വേണ്ടി പ്രത്യേക പൂജകള് ക്ഷേത്രത്തില് നടക്കും. കാര്ഷിക കലാരൂപമായ വേലകളിയും ഇതിനോടൊപ്പം നടന്നു. പുലര്ച്ചെ 4ന് പള്ളിയുണര്ത്തലോടെയാണ് ചടങ്ങുകള് ആരംഭിച്ചത്. ചിറപ്പ്കുത്ത്, ദീപീരാധന, കുടംപൂജകളി, അനുജ്ഞവാങ്ങല്, തോത്താകളി, വേലകളിയും നടന്നു. ശേഷം വേല അന്നങ്ങളുടേയും അമ്പലക്കോട്ടയുടേയും എഴുന്നള്ളത്തോടെ മകം പടയണി ഭക്തിനിര്ഭരമായി സമാപിച്ചു.
പടയണിദിവസമായ ഇന്ന് ദേവിയുടെ തിരുമുമ്പില് പടയണിയുടെ താളമേളങ്ങളില് ഭക്തര് തൊണ്ണൂറ് പുത്തന് അന്നങ്ങളെയാണ് ഇത്തവണ എത്തിക്കുന്നത്.
പല അളവുകളിലുള്ള അന്നങ്ങളെ ഭക്തര് നേര്ച്ചയായി സമര്പ്പിക്കുന്നു. മുന്വര്ഷങ്ങളില് നിന്ന് വ്യത്യസ്ഥമായി രണ്ട് വലിയ അന്നങ്ങളാണ് പൂരത്തിന് എഴുന്നെള്ളുന്നത്. നേരത്തെയുള്ള വലിയ അന്നം കൂടാതെ ഒരു പുതിയ അന്നം ഭക്തന്റെ വഴിപാടായി നടക്കുന്നുണ്ട്.
രാവിലെ ക്ഷേത്രാചാര ചടങ്ങുകള്ക്ക് ശേഷം ആറിന് പടയണി പറമ്പില് നിറപണികള് ആരംഭം. 12 ന് ഉച്ചപൂജ. തുടര്ന്ന് അന്നംഊട്ട്, 6.30ന് ദീപാരാധന, 8ന് പുത്തന് അന്നങ്ങളുടെ തേങ്ങമുറിക്കല് ചടങ്ങ്.10ന് കുടംപൂജ കളി, 10.30ന് തോത്തകളി, 11ന് പുത്തന് അന്നങ്ങളുടെ തിരുനട സമര്പ്പണം. 12 ന് വല്യ അന്നങ്ങളുടെ എഴുന്നെള്ളത്ത്.
