കറുത്തുമെലിഞ്ഞവന്‍ കിട്ടന്‍
കാലിയെമേച്ചവന്‍ കിട്ടന്‍
മേച്ചില്‍പ്പുറങ്ങളില്‍
കാച്ചിയരിവാളേന്തിയോന്‍
കച്ചയാലരവയര്‍കെട്ടിയോന്‍
അമ്പാടിതന്നിലവര്‍ണ്ണന്‍
കാള്‍മാര്‍ക്‌സിനുമപ്പുറം
നാസ്തികസിദ്ധാന്തം മെനഞ്ഞവന്‍
ചാതുര്‍വര്‍ണ്ണ്യം മയാസൃഷ്ടം
അതുനമുക്കുമറക്കാം
കര്‍മ്മണ്യേവാധികാരസ്‌തേ
മാഫലേഷുകദാചന
അതും നമുക്കു മറക്കാം
വെട്ടിയും നിരത്തിയും നവ-
കിട്ടന്‍ മാനിഫസ്റ്റോ ചമയ്‌ക്കാം
ഉള്ളവന്റെ കലമുടച്ചവന്‍ കിട്ടന്‍
മുളന്തണ്ടാല്‍ പാട്ടുമൂളിയോന്‍
കല്‍ത്തുറങ്കില്‍ പിറന്നവന്‍
കാല്‍പ്പനികതനിറച്ചാര്‍ത്തണിഞ്ഞോന്‍
മര്‍ദ്ധിതര്‍ തന്‍രക്ഷകന്‍
ദ്രൗപതിപ്പെണ്ണിനു പട്ടുചുറ്റിയോന്‍
പ്രകൃതിസംരക്ഷകന്‍, ബുദ്ധിജീവി
അയ്യായിരത്താണ്ടിനുംമുന്‍പേ
വര്‍ഗ്ഗരഹിതദ്വാരകപടുത്തവന്‍
എച്ചില്‍കഴിച്ചും വിശപ്പടക്കിയോന്‍
രക്തസാക്ഷി,കിട്ടനൊരു കമ്മ്യൂണിസ്റ്റ്
ഇനി നമ്മുടെ ബാല്യം
കിട്ടനായി ചമഞ്ഞീടാം
ചെഗുവേരഹെഗലുംമാര്‍ക്‌സും
ഈ പടിപ്പുറത്തുനില്‍ക്കട്ടെ
ഇതുവര്‍ഗ്ഗസമരത്തിന്‍
പുതുകച്ചിത്തുരുമ്പ്
തകൃതി പഠനബോധനം
ഇടയിലൊരു ചോദ്യശരം
നമ്മുടെ കിട്ടനെങ്ങനെ!
മാട്ടിറച്ചികഴിക്കുമോ?
മാട്ടിറച്ചി മഹോത്സവം നടത്തുമോ?
വിപ്ലവമുട്ടനുത്തരം മുട്ടവെ സാക്ഷാല്‍
അച്യുതനവതരിച്ചുച്ചരിച്ചീടുകയായ്
സ്മൃതി ഭ്രംശാദ്ബുദ്ധിനാശം
ബുദ്ധിനാശാത് പ്രണശ്യതി
പ്രതികരിക്കാൻ ഇവിടെ എഴുതുക: