കോട്ടയം: മുട്ടമ്പലം മുന്സിപ്പല് ശ്മശാനത്തില് അനധികൃത അസ്ഥി ശേഖരം. ഇവിടെ കൊണ്ടുവരുന്ന മൃതദേഹങ്ങള് ശരിയായ രീതിയില് സംസ്ക്കരിക്കുന്നില്ലെന്ന് പരാതി. ഇപ്പോള് എല്പിജി ശ്മശാനമാണ് മുട്ടമ്പലത്തുള്ളത്. ജില്ലയുടെ വിവിധ പ്രദേശങ്ങളില് നിന്നുള്ളവരുടെ മൃതദേഹങ്ങള് ഇവിടെ കൊണ്ടുവന്ന് സംസ്ക്കരിക്കാറുണ്ട്. കൂടാതെ അജ്ഞാത മൃതദേഹങ്ങള് കുഴിച്ചിടുകയാണ് പതിവ്. അതിന് പ്രത്യേക സ്ഥലവും ഇവിടെയുണ്ട്. മൃതശരീരത്തിലെ അസ്ഥിയടക്കമുള്ളഭാഗങ്ങള് പൂര്ണ്ണമായി ദഹിച്ചു തീരുന്നതിന് സമയം കൂടുതല് എടുക്കും. ഇത് കൂടുതല് ഗ്യാസ് ചിലവാകുന്നതിനും കാരണമാകും. ഗ്യാസ് ലാഭിക്കുന്നതിനായി കരാറുകാരന് ദഹനം പൂര്ണ്ണമാകുന്നതിന് മുമ്പ് തീ അണയ്ക്കും. ചേമ്പറില് അവശേഷിക്കുന്ന അസ്ഥികള് പ്രത്യേകം ശേഖരിക്കുകയും മാംസാവശിഷ്ടം കുഴിച്ചിടുകയും ചെയ്യും. ഇത്തരത്തില് ലോഡ്കണക്കിന് അസഥി കഷണങ്ങളാണ് ഇവിടെ ശേഖരിച്ചിരിക്കുന്നത്. തലയോട്ടിയടക്കമുള്ള ഭാഗങ്ങള് ഇതിലുണ്ട്. കൂടാതെ മൃതദേഹം ശ്മശാനത്തിലെത്തിക്കുമ്പോള് കൊണ്ടുവരുന്ന തലയണ, തുണി, റീത്തുകള് തുടങ്ങിയവയും കൂടിക്കിടക്കുകയാണ്. മുന്സിപ്പല് ആരോഗ്യവകുപ്പ് കൃത്യമായ പരിശോധനക്കെത്താത്തത്മൂലം കരാറുകാരന്റെ നിയന്ത്രണത്തിലാണിവിടുത്തെ എല്ലാ കാര്യങ്ങളും.
അനധികൃതമായി അസ്തിശേഖരം ശ്മശാനത്തിലുള്ള വിവരം ഇതുവരെ ശ്രദ്ധയില്പെട്ടിട്ടില്ലെന്ന് മുന്സിപ്പല് ആരോഗ്യവകുപ്പ് അധികൃതര് പറയുന്നു. അങ്ങനെ അസ്തി ശേഖരിച്ചിട്ടുണ്ടെങ്കില് അത് സംസ്ക്കരിക്കുന്നതിന് അടിയന്തിര നടപടി സ്വീകരിക്കുമെന്നും അധികൃതര് പറഞ്ഞു.
