എരുമേലി:’ സംസ്ഥാന സര്‍ക്കാരിന്റെ സീറോ ലാന്റ് പദ്ധതി പ്രകാരം എരുമേലി ഗ്രാമപഞ്ചായത്തില്‍ കനകപ്പാലത്ത് മിച്ചഭൂമി വിതരണത്തിനെതിരേ പ്രതിഷേധവുമായി കോളനി നിവാസികള്‍ രംഗത്ത്.
കോളനിയിലെ 54 പേരാണ് ഭൂമിക്കായി അപേക്ഷ നല്‍കിയത്. ഇതില്‍ ഭൂമി നല്‍കാന്‍ നടപടിയായി വന്നെങ്കിലും ലിസ്റ്റില്‍ അനര്‍ഹരായവരുണ്ടെന്ന് കാട്ടി കോളനിക്കാര്‍ പരാതി നല്‍കിയതോടെയാണ് പദ്ധതി അനിശ്ചിതത്വത്തിലായത്.
പരാതി പരിഗണിച്ച റവന്യൂവകുപ്പ് ഏഴുപേരെ ഒഴിവാക്കി പുതിയ ലിസ്റ്റുണ്ടാക്കി. ഇവ കളക്ടറുടെ അദ്ധ്യക്ഷതയിലാണ് നറുക്കെടുത്തത്. ഇന്നലെ ഭൂമി കൊടുക്കാനായി തഹസീല്‍ദാര്‍ കെ.പി.സജീവന്റെ നേതൃത്വത്തില്‍ സംഘമെത്തി. എന്നാല്‍ പുതിയ ലിസ്റ്റും പഞ്ചായത്ത് ആനൂകൂല്യങ്ങളും നിരവധി തവണ ഭൂമി വാങ്ങിയവര്‍ മറ്റ് സ്ഥലവും- വീടുമുള്ളവര്‍ എന്നിങ്ങനെ അനര്‍ഹരായ നിരവധിപേര്‍ കടന്നുകൂടിയിട്ടുണ്ടെന്നാണ് കോളനി നിവാസികള്‍ പറയുന്നത്. രാജീവ് ഭവന്‍ കോളനി മേഖലയില്‍ കണ്ടെത്തിയത് കൂടാതെ സമീപത്തെ മിച്ചഭൂമി കൂടി കൊടുക്കാനുള്ള തീരുമാനവും പ്രതിഷേധത്തിനിടയാക്കി. പൊതുകളി സ്ഥലവും , പൊതു കിണറും ഒഴിവാക്കി ഭൂമി നല്‍കണമെന്ന കോളനി നിവാസികളുടെ ആവശ്യം റവന്യൂസംഘം അംഗീകരിച്ചു. ആദ്യഘട്ടത്തില്‍40 പേര്‍ക്കാണ് ഭൂമി നല്‍കുന്നത്. മറ്റുള്ളവര്‍ക്ക് പിന്നീട് ഭൂമി നല്‍കുമെന്നും അധികൃതര്‍ പറഞ്ഞു.
എന്നാല്‍ അനര്‍ഹരായവര്‍ക്ക് ഭൂമി നല്‍കിയാല്‍ അര്‍ഹതപ്പെട്ടവര്‍ ഭൂമി കയ്യേറുമെന്നും ഭൂമി വിതരണം അന്വേഷിക്കണമെന്നും കോളനിക്കാര്‍ ആവശ്യപ്പെട്ടു. ഇതിനിടെ പൊതു കളിസ്ഥലം അളക്കാനുള്ള ശ്രമത്തിനെതിരേ കോളനിവാസികള്‍ രംഗത്തെത്തി. ഇത് പ്രതിഷേധത്തിന് വഴിയൊരുക്കി. സംഭവത്തെത്തുടര്‍ന്ന് ആര്‍ഡിഒ സാവിത്രി അന്തര്‍ജനം സ്ഥലത്തെത്തി ഭൂമി കൊടുക്കുന്നത് സംബന്ധിച്ച് അന്തിമ റിപ്പോര്‍ട്ട് നല്‍കാന്‍ നിര്‍ദ്ദേശിച്ചു. ഡെപ്യൂട്ടി തഹസീല്‍ദാര്‍ സുരേന്ദ്രന്‍പിള്ള, വില്ലേജ് ഓഫീസര്‍ സനല്‍കുമാര്‍, മറ്റ് ഉദ്യോഗസ്ഥര്‍ എന്നിവരും സ്ഥലത്തെത്തിയിരുന്നു.
