കോട്ടയം : തിരുവാര്പ്പ് ശ്രീകൃഷ്ണ സ്വാമിക്ഷേത്രത്തില് കഴിഞ്ഞ മൂന്ന് ദിവസമായി നടന്ന് വരുന്ന ചെമ്പൈ സംഗീതോപാസനയ്ക്ക് ഇന്നലെ കൊടിയിറങ്ങി.
25 വര്ഷങ്ങള് പിന്നിടുന്ന സംഗീതോപാസനയുടെ രജത ജൂബിലി ആഘോഷങ്ങള്ക്ക് അഷ്ടമിരോഹിണിയുടെ ഭക്തി സാന്ദ്രമായ അന്തരീക്ഷത്തില് ഭക്ത സഹസ്രങ്ങള് സാക്ഷിയായി.
വൈകുന്നേരം 6 ന് സംഗീതസംവിധായകനും ചലച്ചിത്ര പിന്നണിഗായകനുമായ ശരത്തിന്റെ സംഗീതസദസ്സില് ആനന്ദ് ജയറാം , നാഞ്ചില്.എ.ആര്.അരുള് , ആറ്റിങ്ങല് മധു എന്നീ പ്രശസ്തര് പക്കമേളമൊരുക്കി , 15 വര്ഷങ്ങള്ക്ക് ശേഷം ശരത്തിന്റെ അനുജന് രജ്ഞിത്ത് ജേഷ്ടനൊപ്പം സംഗീതസദസ്സില് തബലയില് താളം നല്കിയെന്ന പ്രത്യേകതയും സംഗീത സദസ്സിന് സൗന്ദ്യര്യമേകി. ദേവസ്വം ബോര്ഡ് പ്രസിഡന്റ് എം.പി.ഗോവിന്ദന് നായര് ശരത്തിനെ പൊന്നാട അണിയിച്ച് ഉപഹാരം നല്കി ആദരിച്ചതോടെ സംഗീതസദസ്സ് ആരംഭിച്ചു. കീര്ത്തനങ്ങളും ശരത്ത് ഈണം നല്കിയ സിനിമാ ഗാനങ്ങളും കോര്ത്തിണക്കിയായിരുന്നു രണ്ട് മണിയ്ക്കൂര് നീണ്ണ്ട നിന്ന സംഗീത സദസ്സ് അരങ്ങേറിയത്. പ്രശസ്ത ഗഞ്ചറ വിദ്വാനായിരുന്ന തിരുവാര്പ്പ് ശിവന്റെ നേതൃത്വത്തില് രൂപം കൊണ്ട ശ്രീകൃഷ്ണ ഗാനസഭയാണ് 25 വര്ഷം പിന്നിടുന്ന സംഗീത സപര്യയ്ക്ക് തിരുവാര്പ്പില് ആദ്യമായി വേദി ഒരുക്കിയത് , മുടക്കം കൂടാതെ വര്ഷാവര്ഷം മെച്ചപ്പെട്ട സംഗീത പരിപാടികളാണ് സംഘാടകര് അണിയിച്ചൊരുക്കി വരുന്നത്.
