പാലാ: നഗരമധ്യത്തില് മുനിസിപ്പല് ബസ് സ്റ്റാന്ഡ് ഒരാഴ്ചയായി ഇരുട്ടിലായിട്ടും അധികൃതര്കക്ക് അനക്കമില്ല. കുടിശികയുടെ പേരില് ബസ് സ്റ്റാന്ഡിലേക്കുള്ള വൈദ്യുതി ബന്ധം ബോര്ഡ് അധികൃതര് വിച്ഛേദിച്ചതാണ് ബസ് സ്റ്റാന്ഡിനെ അന്ധകാരത്തിലാക്കിയത്.
നഗരത്തിലെത്തുന്ന നൂറുകണക്കിന് ബസുകള് കയറുന്ന ഇവിടെ സന്ധ്യയായാല് വെളിച്ചമില്ലാത്തത് സ്ത്രീകള് ഉള്പ്പെടെ ബസ് കാത്തുനില്ക്കുന്ന യാത്രക്കാര്ക്കും സ്റ്റാന്ഡ് ഡ്യൂട്ടിയിലുള്ള പോലീസ് ഉദ്യോഗസ്ഥര്ക്കും ഒരുപോലെ ബുദ്ധിമുട്ടുണ്ടാക്കുന്നുണ്ട്. രാത്രി എട്ടുമണിവരെ സ്വകാര്യബസുകളും 9 വരെ കെഎസ്ആര്ടിസിയും റിവര്വ്യൂ റോഡ് വഴി മുനിസിപ്പല് ബസ് സ്റ്റാന്ഡിലെത്തി യാത്രക്കാരെ കയറ്റിയാണ് പോകുന്നത്. വെളിച്ചമില്ലാത്തതിനാല് സന്ധ്യക്ക് മുമ്പേ സ്റ്റാന്ഡിലെ കംഫര്ട്ട് സ്റ്റേഷന് അടയ്ക്കുന്നതും സ്ത്രീയാത്രക്കാര് ഉള്പ്പെടെയുള്ളവരെ ബുദ്ധിമുട്ടിലാക്കുന്നുണ്ട്.
കംഫര്ട്ട് സ്റ്റേഷന് കരാര് എടുത്തിരിക്കുന്നവര് കുടിശിക വരുത്തിയതാണ് വൈദ്യുതി ബന്ധം വിച്ഛേദിക്കാന് കാരണമെന്നാണ് നഗരസഭാ അധികൃതര് പറയുന്നത്. എന്നാല് നഗരസഭയാണ് തുക അടയ്ക്കാത്തതെന്ന് കരാറുകാരനും പറയുന്നുണ്ടെങ്കിലും തര്ക്കം ബാധിക്കുന്നത് പൊതുജനത്തെയാണ്.
