ന്യൂദല്ഹി: പാക്കിസ്ഥാന് സുരക്ഷാ ഉപദേഷ്ടാവ് സര്താസ് അസീസുമായി കൂടിക്കാഴ്ച നടത്താനായി ദല്ഹിയിലെത്തിയ രണ്ട് വിഘടനവാദി നേതാക്കളെ ദല്ഹി പോലീസ് കസ്റ്റഡിയിലെടുത്തു. ഹൂറിയത്ത് കോണ്ഫറന്സ് നേതാവ് ബിലാല് ലോണ്, ഷബീര് ഷാ എന്നിവരെയാണ് പോലീസ് കസ്റ്റഡിയിലെടുത്തത്.
ശ്രീനഗറില് നിന്നും വിമാനമാര്ഗമെത്തിയ ഇരുവരെയും ദല്ഹി വിമാനത്താവളത്തില് വെച്ച് തന്നെ പോലീസ് കസ്റ്റഡിയിലെടുക്കുകയായിരുന്നു. പാക് സുരക്ഷാ ഉപദേഷ്ടാവും ജമ്മുകശ്മീര് വിഘടനവാദികളും തമ്മില് കൂടിക്കാഴ്ച അനുവദിക്കില്ലെന്ന് ഭാരതം നേരത്തെ നിലപാട് വ്യക്തമാക്കിയിരുന്നു. ഇതിന്റെ അടിസ്ഥാനത്തിലാണ് രണ്ട് പേരെയും കസ്റ്റഡിയിലെടുത്തത്.
ഇന്നലെ രാവിലെയാണ് ഷബീര് ഷായെ പോലീസ് പിടികൂടിയത്. ഇയാള്ക്കൊപ്പം എത്തിയ സഹായിയെയും കസ്റ്റഡിയിലായി.
ബിലാല് ലോണിനെ ഇന്നലെ വൈകിട്ടോടെയാണ് വിമാനത്താവളത്തില് നിന്നും പിടിച്ചത്. തെക്കന് ദല്ഹിയിലെ ബിലാലിന്റെ വാടക വീട്ടിലേക്ക് കൊണ്ടുപോയ പോലീസ് ബിലാലിനെ വീട്ടുതടങ്കലിലാക്കി. രണ്ടുപേരോടും ശ്രീനഗറിലേക്ക് തിരികെ പോകാന് ആവശ്യപ്പെട്ടെങ്കിലും വഴങ്ങാതെ വന്നതോടെയാണ് കസ്റ്റഡിയിലെടുത്തത്.
ഹൂറിയത്ത് ചെയര്മാന് സയ്യിദ് അലിഷാ ഗിലാനി, മിര്വയിസ് ഉമര് ഫറൂഖ്, മൗലാനാ മുഹമ്മദ് അബ്ബാസ് അന്സാരി, യാസിന് മാലിക്, നയീം ഖാന് എന്നിവര്ക്കാണ് പാക് ഹൈക്കമ്മീഷണര് പാക് ദേശീയ ഉപദേഷ്ടാവുമായുള്ള കൂടിക്കാഴ്ചയ്ക്കായി ക്ഷണം അനുവദിച്ചത്. കൂടിക്കാഴ്ചയ്ക്ക് പോകുമെന്ന് വിഘടനവാദികള് അറിയിച്ചതോടെ കഴിഞ്ഞ ദിവസം ഗിലാനിയെ ഉള്പ്പെടെ വീട്ടുതടങ്കലിലാക്കിയിരുന്നു. രണ്ടു മണിക്കൂറുകള്ക്ക് ശേഷം ഇവരെ മോചിപ്പിച്ചെങ്കിലും സര്താസ് അസീസ് – വിഘടനവാദി നേതൃത്വ ചര്ച്ച അനുവദിക്കില്ലെന്ന ശക്തമായ സന്ദേശം കേന്ദ്രസര്ക്കാര് നല്കി. എന്നാല് ഇതവഗണിച്ച് ദല്ഹിയിലെത്തിയവരെയാണ് ഇന്നലെ കസ്റ്റഡിയിലെടുത്തിരിക്കുന്നത്.
