അമ്പലപ്പുഴ: ജി. സുധാകരന്‍ എംഎല്‍എ, അമ്പലപ്പുഴ വടക്ക് ഗ്രാമപഞ്ചായത്ത് പ്രസിഡന്റ്, പഞ്ചായത്ത് സെക്രട്ടറി എന്നിവരടങ്ങുന്ന കോക്കസ് സര്‍ക്കാരിന്റെ വികസന പ്രവര്‍ത്തനങ്ങള്‍ അട്ടിമറിക്കുകയാണെന്ന് ഡിസിസി പ്രസിഡന്റ് എ.എ. ഷുക്കൂര്‍ പത്രസമ്മേളനത്തില്‍ ആരോപിച്ചു.
രാഷ്‌ട്രീയവും അല്ലാത്തതുമായ കാരണങ്ങളാണ് ഇതിന് പിന്നില്‍. സര്‍ക്കാര്‍ ആസ്തി വികസന പദ്ധതി പ്രകാരം നടപ്പാക്കേണ്ട പ്രവര്‍ത്തികള്‍ എംഎല്‍എയുടെ പ്രത്യേക പദ്ധതിയെന്ന് പ്രചരിപ്പിച്ച് ജനവഞ്ചന നടത്തുകയാണ് സുധാകരന്‍. ഇതിന് കൂട്ടുനില്‍ക്കുന്ന ഉദ്യോഗസ്ഥര്‍ക്ക് സാമ്പത്തിക നേട്ടമുണ്ടെന്നും ഷുക്കൂര്‍ കുറ്റപ്പെടുത്തി.
അമ്പലപ്പുഴ വടക്ക് പഞ്ചായത്തിലെ ഒന്നാംവാര്‍ഡിലെ തീരപ്രദേശത്തെ റോഡ് പുനരുദ്ധാരണത്തിന് സര്‍ക്കാര്‍ 29 ലക്ഷത്തിന്റെ ഭരണ, സാങ്കേതിക അനുമതി ലഭിച്ചിരുന്നു. ഹാര്‍ബര്‍ എഞ്ചിനീയറിങ് വകുപ്പിന് കൈമാറിയ റോഡുനിര്‍മ്മാണം എംഎല്‍എയുടെ നേതൃത്വത്തില്‍ അട്ടിമറിക്കുകയാണ്. ഹാര്‍ബര്‍ എഞ്ചിനീയറിങ് വകുപ്പിന്റെ പദ്ധതിക്ക് പകരം നാലുലക്ഷത്തിന്റെ എംഎല്‍എ പദ്ധതിയും പത്തുലക്ഷത്തിന്റെ പഞ്ചായത്ത് പ്ലാന്‍ ഫണ്ടും ഉപയോഗിച്ച് പുതിയ പദ്ധതി നടപ്പിലാക്കുമെന്നാണ് പ്രഖ്യാപനം. ഇതിനു സാങ്കേതിക അനുമതി ലഭിച്ചിട്ടില്ല.
പഞ്ചായത്ത് സെക്രട്ടറിക്കെതിരെ ഇതേവാര്‍ഡിലെ ഒരു വീടിന്റെ വേലി പൊളിച്ചതിന് വീട്ടമ്മ നല്‍കിയ പരാതിയില്‍ പോലീസ് ക്രിമിനല്‍ കേസെടുത്തിട്ടുണ്ടെന്നും ഷുക്കൂര്‍ പറഞ്ഞു. ഗ്രാമപഞ്ചായത്തംഗങ്ങളായ ഉഷ ഭാസ്‌കര്‍, എ.എ. അസീസ് എന്നിവരും പത്രസമ്മേളനത്തില്‍ പങ്കെടുത്തു.
