ലണ്ടന്‍: രത്‌നവും സ്വര്‍ണ്ണവും ആയുധങ്ങളും വിലകൂടിയ പെയിന്റുങ്ങുകളുമായി കാണാതായ നാസി ട്രെയിന്‍ കണ്ടെത്തിയതായി സ്വര്‍ണ്ണ വേട്ടക്കാര്‍. 300 ടണ്‍ സ്വര്‍ണ്ണം ട്രെയിനില്‍ ഉണ്ടെന്നാണ് കണക്ക്. 1945-ല്‍ രണ്ടാം ലോകയുദ്ധക്കാലത്ത് ഹംഗറിയില്‍ നിന്ന് ജര്‍മ്മനിയിലേക്ക് 14,400 മില്യണ്‍ യുഎസ് ഡോളറിലേറെ മൂല്യമുള്ള സമ്പത്തുമായി പോയ നാസി ട്രെയിന്‍ കാണാതാവുകയായിരുന്നു. അതെക്കുറിച്ചുള്ള അന്വേഷണം ഒട്ടേറെ നടന്നെങ്കിലും വിവരങ്ങളൊന്നും ആധികാരികമായി കിട്ടിയിരുന്നില്ല. അതിനിടെയാണ് ട്രെയിന്‍ കണ്ടെത്തിയതായി വെളിപ്പെടുത്തല്‍ വന്നിരിക്കുന്നത്.
ജര്‍മ്മന്‍കാരനും പോളണ്ടുകാരനുമായ രണ്ടു സുഹൃത്തുക്കളാണ് കണ്ടെത്തല്‍ വെളിപ്പെടുത്തിയിരിക്കുന്നത്. ട്രെയിന്‍ നിധിയുടെ 10 ശതമാനം പ്രതിഫലം തന്നാല്‍ കൃത്യമായ വിവരം നല്‍കാമെന്നാണ് അവര്‍ പ്രഖ്യാപിച്ചിരിക്കുന്നത്.
രണ്ടാം ലോകയുദ്ധക്കാലത്ത് സോവ്യറ്റ് സൈന്യം ജര്‍മ്മനിയെ സമീപിക്കുന്നുവെന്നറിഞ്ഞപ്പോള്‍ 150 മീറ്റര്‍ ദൈര്‍ഘ്യമുള്ള യുദ്ധോപകരണ വാഹന ട്രെയിനില്‍ ഈ സ്വത്തുക്കള്‍ കയറ്റി രക്ഷപ്പെടുത്താന്‍ നാസികള്‍ ശ്രമിക്കവേ ഇന്ന് പോളണ്ടിന്റെ ഭാഗമായ റോക്‌ലോ നഗരത്തില്‍വെച്ച് കാണാതാകുകയായിരുന്നു. ലോവര്‍ സിലേസിയന്‍ മലകളിലുള്ള സിയാസ് കാസിലിനടുത്തുള്ള ഒരു തുരങ്കത്തില്‍ കയറിയ ട്രെയിനെക്കുറിച്ച് പിന്നീട് വിവരമൊന്നുമില്ലെന്നായിരുന്നു പില്‍ക്കാലത്തു കേട്ടത്. ഈ ടണല്‍ പില്‍ക്കാലത്ത് അടയ്‌ക്കപ്പെടുകയും അതെക്കുറിച്ച് വിവരമില്ലാതാവുകയും ചെയ്തു.
വെളിപ്പെടുത്തല്‍ നടത്തിയവരുടെ നിയമസഹായ കേന്ദ്രവുമായി സമ്പര്‍ക്കം ചെയ്ത് തുടര്‍നടപടികള്‍ സ്വീകരിച്ചുവരികയാണെന്ന് പോളണ്ടിലെ വാല്‍ബ്ര്‌സിച്ചിലെ കൗണ്‍സില്‍ ഓഫീസറായ മാര്‍ക്കിയ തൊകാര്‍സ്‌ക പറഞ്ഞു. ഇക്കാര്യത്തില്‍ നിയമജ്ഞര്‍, സൈനിക സംവിധാനം, പോലീസ്, ഫയര്‍ ബ്രിഗേഡ് തുടങ്ങിയവ നടപടികള്‍ തുടങ്ങിയിട്ടുണ്ട്, അദ്ദേഹം പറഞ്ഞു.
- കേള്‍ക്കുമ്പോള്‍ കാതുകുളിരുമെങ്കിലും കാണുമ്പോള്‍ കണ്ണു മഞ്ഞളിച്ചു പോയേക്കാം, 300 ടണ്‍ സ്വര്‍ണ്ണം. ഇന്നത്തെ മൂല്യം നോക്കിയാല്‍ 14,400 മില്യണ്‍ യുഎസ് ഡോളറിലേറെ. രൂപയുടെ കണക്കിലെടുത്താല്‍ 93,60,000 ലക്ഷം കോടി രൂപ!
- കണ്ടുകിട്ടിയാല്‍ അത് ലോകത്തെ വമ്പിച്ച നിധിതന്നെയായിരിക്കും. എന്നാല്‍, ഈ സ്വത്തുമുഴുവന്‍ നാസികള്‍ നാട്ടുകാരെ കൊള്ളയടിച്ചു സമ്പാദിച്ചു സൂക്ഷിച്ചതാണെന്നതാണ് ശ്രദ്ധേയം.
- ഇതുകൂടാതെയാണ്, 200 മില്യണ്‍ ഡോളര്‍ വിലവരുന്ന ലോകപ്രശസ്തമായ പെയിന്റിങ്ങുകളും മറ്റും. വിലമതിക്കുന്ന സമ്പത്ത് ഏതു രൂപത്തിലുള്ളതും കൈക്കലാക്കി കരുതല്‍ ശേഖരമെന്ന നിലയില്‍ കടത്താനായിരുന്നു നാസിപ്പടയുടെ പദ്ധതി.
- ഈ യുദ്ധ ട്രെയിന്‍ കണ്ടെത്തിയാലും തുരങ്കത്തിലാണുള്ളതെങ്കില്‍ അതിനെ സമീപിക്കുക ഏറെ സാഹസികമായിരിക്കുമെന്ന് വിദഗ്‌ദ്ധര്‍ ചൂണ്ടിക്കാണിക്കുന്നു.
- നാസികളുടെ വന്‍ ആയുധശേഖരം, അതില്‍ നാസികളുടെ ആണവായുധ പദ്ധതിയുടെ ആദിമ സാമഗ്രികള്‍ വരെ കണ്ടേക്കാമെന്ന്കരുതുന്നു.
- 70 വര്‍ഷത്തോളമായി അടഞ്ഞുകിടക്കുന്ന ഈ തുരങ്കത്തില്‍ അപകടകരമായ വാതകങ്ങള്‍ പോലുമുണ്ടായിരിക്കാമെന്നും കരുതുന്നു.
