ന്യൂദല്ഹി: സമ്പല് സമൃദ്ധമായ ഭാരതം 2022-ല് സാക്ഷാല്ക്കരിക്കാന് ഇന്നേ പ്രതിജ്ഞയെടുത്ത് പ്രവര്ത്തനം തുടങ്ങാന് പ്രധാനമന്ത്രി രാഷ്ട്രത്തിലെ മുഴുവന് ജനതയേയും ആഹ്വാനം ചെയ്തു. സ്വാതന്ത്ര്യ ദിനാഘോഷത്തില് ചെങ്കോട്ടയില് രാജ്യത്തെ ആഹ്വാനം ചെയ്യുകയായിരുന്നു നരേന്ദ്ര മോദി.
”സമൂഹത്തിന്റെയും രാജ്യത്തിന്റെയും ക്ഷേമത്തിനായി പ്രവര്ത്തിക്കുമെന്ന് 125 കോടി രാജ്യവാസികള് പ്രതിജ്ഞ ചെയ്യണം. 125 കോടി ജനങ്ങള് ഈ പ്രതിജ്ഞയെടുത്താല് 2022 ഓഗസ്റ്റ് 15ന്റെ പുലരി ദര്ശിക്കുന്നത് രാജ്യത്തിനു വേണ്ടി ജീവത്യാഗം ചെയ്തവര് കണ്ട സ്വപ്നം സാക്ഷാത്ക്കരിച്ച 125 കോടി ഭാരതീയരെയാകും. ആറു ലക്ഷം ഗ്രാമങ്ങളുടെ ആറു ലക്ഷം സ്വപ്നങ്ങളും, നഗരങ്ങളും, മെട്രോപൊളിറ്റന് പ്രദേശങ്ങളും, സര്ക്കാരിന്റെ ഓരോ വകുപ്പും ഓരോ യൂണിറ്റും ഒരു പ്രതിജ്ഞ നിറവേറ്റണം, അതിനായി നമുക്ക് ഉടന് പ്രവര്ത്തനമാരംഭിക്കണം,” പ്രധാനമന്ത്രി പറഞ്ഞു.
നമ്മുടെ സ്വാതന്ത്ര്യ സമരം ദശാബ്ദങ്ങള് നീണ്ടെങ്കിലും യഥാര്ത്ഥ സ്വാതന്ത്ര്യം ഇനിയും ദര്ശിക്കാനായിട്ടില്ല. 1910ലും 1920ലും 1930ലും എല്ലാം അവര് സ്വാതന്ത്ര്യത്തെ പറ്റി സംസാരിച്ചിരുന്നു. നാം ദശാബ്ദങ്ങളോളം സ്വാതന്ത്ര്യത്തെ കുറിച്ച് പറഞ്ഞു കൊണ്ടിരുന്നതിനാല് മാത്രമാണ് നമുക്ക് അത് കൈവരിക്കാനായത്. സമ്പല്സമൃദ്ധമായ ഭാരതത്തിനു വേണ്ടി നാം ശാക്തീകരിക്കപ്പെട്ട, സംസ്ക്കാരമുള്ള,ആരോഗ്യപൂര്ണ്ണമായ, അഭിമാനപൂര്ണ്ണമായ, മഹത്തരമായ ഭാരതത്തിനു വേണ്ടി പ്രവര്ത്തിക്കണം. 2022-ഓടെ വീടുകളില്ലാത്ത ഒരു ദരിദ്രനും ഉണ്ടാകരുത്. 24 മണിക്കൂര് വൈദ്യുതി വിതരണം ലഭ്യമാക്കാന് നമുക്ക് സാധിക്കണം. നമ്മുടെ കര്ഷകരും വനിതകളും ശാക്തീകരിക്കപ്പെട്ടവരും, തൊഴിലാളികള് സംതൃപ്തരും, യുവാക്കള് സ്വയം പര്യാപ്തരും, മുതിര്ന്നവര് ആരോഗ്യവാന്മാരും, പാവപ്പെട്ടവര് സമ്പുഷ്ടരുമാകണം.
സമൂഹത്തില് ആരും പിന്നിലായി പോകരുത്. എല്ലാവരും തുല്യാവകാശങ്ങള് അനുഭവിക്കുകയും ഭാരത സമൂഹം സൗഹാര്ദ്ദത പുലര്ത്തുകയും വേണം. ഈ സ്വപ്നത്തോടെ, സ്വാതന്ത്ര്യദിനത്തിന്റെ ഈ മംഗളാഘോഷത്തില്, നിങ്ങളുടെ എല്ലാവരുടെയും ഒപ്പം സുനിശ്ചിത കര്ത്തവ്യത്തോടെ മുന്നോട്ട് പോകുമെന്ന് ഞാന് ഒരിക്കല് കൂടി പ്രതിജ്ഞ ചെയ്യുകയും, എന്റെ 125 കോടി സഹ രാജ്യവാസികളെ ഹൃദയം നിറഞ്ഞ് ആശംസിക്കുകയും ചെയ്യുന്നു,” പ്രധാനമന്ത്രി പറഞ്ഞു.
