ആലുവ: കുത്തിയൊഴുക്കിനെ മറികടന്ന് സാഹസികമായി പെരിയാര് നീന്തി കടന്ന അന്ധബാലന് ഗവര്ണറുടെ ആദരം. ആലുവ തുരുത്ത് മുക്കത്ത് വീട്ടില് സുനിലിന്റെ മകന് നവനീതിനെയാണ് സ്വാതന്ത്ര്യദിനത്തോടനുബന്ധിച്ചാണ് ഗവര്ണ്ണര് പി. സദാശിവം ആദരിച്ചത്.
രാജ്ഭവനില് നടന്ന ചടങ്ങില് നവനീതിന് പതിനായിരം രൂപയും ഉപഹാരവും നല്കി. തുടര്ന്ന് ഗവര്ണര്ക്കൊപ്പം ഭക്ഷണം കഴിച്ച ശേഷമാണ് മടങ്ങിയത്. ജൂണ് 22നാണ് നവനീത് പെരിയാര് നീന്തി കടന്നത്. കടുത്ത മഴയെ തുടര്ന്ന് പെരിയാര് ശക്തമായി കലങ്ങിമറിഞ്ഞൊഴുകുമ്പോഴാണ് നവനീത് എന്ന ഒന്പതുകാരന് 12 മിനിറ്റുകൊണ്ട് കുറുകെ നീന്തികയറിയത്. ആലുവ എസ്എന്ഡിപി ഹയര് സെക്കന്ഡറി സ്കൂളിലെ എട്ടാം ക്ലാസ് വിദ്യാര്ത്ഥിയാണ് നവനീത്.
ആലുവ വാളശ്ശേരില് സ്വിമ്മിംഗ് ക്ലബിലെ സജി വാളശ്ശേരിയുടെ നേതൃത്വത്തില് കേവലം 12 ദിവസത്തെ പരിശീലനമാണ് നവനീതിന് ലഭിച്ചത്. സ്വാതന്ത്ര്യദിനത്തില് രാജ്ഭവനില് നടന്ന സംഗീതവിരുന്നിലാണ് നവനീതിനെ ആദരിച്ചത്. മുഖ്യമന്ത്രി ഉമ്മന്ചാണ്ടി, സ്പീക്കര് ശക്തന്, മന്ത്രി വി.എസ്. ശിവകുമാര് എന്നിവരും ചടങ്ങിനെത്തിയിരുന്നു.
ആലുവ താലൂക്ക് ഡെപ്യൂട്ടി തഹസില്ദാര് ഷറഫുദ്ദീന്റെ നേതൃത്വത്തിലാണ് നവനീതും കുടുംബവും രാജ്ഭവനിലെത്തിയത്. പിതാവ് സുനില്കുമാര്, മാതാവ് സ്വപ്ന, സഹോദരി നിരഞ്ജന എന്നിവരും നവനീതിനൊപ്പമുണ്ടായിരുന്നു. ഇന്ന് തുരുത്ത് പൗരാവലിയുടെ ആഭിമുഖ്യത്തില് നവനീതിന് സ്വീകരണം നല്കും.
