ഇടുക്കി : പീരുമേട് കോഴിക്കാനം പുതുവല്‍ ഭാഗത്ത് കനകം (65) നെ കൊലപ്പെടുത്തിയ സംഭവത്തിന്റെ അന്വേഷണം ഇഴഞ്ഞ് നീങ്ങുന്നു. കോട്ടയം ക്രൈംബ്രാഞ്ചാണ് കേസ് അന്വേഷിക്കുന്നത്. 2010 നവംബര്‍ 1നാണ് വീട്ടില്‍ ഒറ്റയ്‌ക്ക് താമസിക്കുകയായിരുന്ന ഏലപ്പാറ സ്വദേശി കനകത്തെ ദുരൂഹ സാഹചര്യത്തില്‍ കാണാതായത്. തൊട്ടടുത്ത് തന്നെ ഇവരുടെ മക്കള്‍ താമസിച്ചിരുന്നു. രാത്രി വൈകിയിട്ടും കനകത്തെ കാണാതിരുന്നതിനെത്തുടര്‍ന്ന് ബന്ധുക്കള്‍ പീരുമേട് പൊലീസില്‍ പരാതി നല്‍കി. നാട്ടുകാരും പൊലീസും ചേര്‍ന്ന് തിരച്ചില്‍ നടത്തിയെങ്കിലും കനകത്തെ കണ്ടെത്താന്‍ കഴിഞ്ഞില്ല .മൂന്നാം ദിവസം രാവിലെ വീട്ടില്‍ നിന്നും നൂറുമീറ്റര്‍ അകലത്തില്‍ കയ്യാലപൊളിഞ്ഞിരിക്കുന്നത് ബന്ധുക്കളുടെ ശ്രദ്ധയില്‍പ്പെട്ടു. അവിടെ നടത്തിയ പരിശോധനയില്‍ മണ്ണിനടിയില്‍ നിന്ന് കനകത്തിന്റെ മൃതദേഹം കണ്ടെത്തുകയായിരുന്നു. കൊലപാതകമാണെന്ന് വ്യക്തമായി. പീരുമേട് പോലീസ് അന്വേഷണവും ആരംഭിച്ചു. കേസ് അന്വേഷണത്തില്‍ ഒരു പുരോഗതിയും ഉണ്ടാകാതെ വന്നതോടെ കേസ് ക്രൈംബ്രാഞ്ചിന്റെ ചുമലിലായി. നാലുവര്‍ഷമായി ക്രൈംബ്രാഞ്ച് അന്വേഷണം നടത്തുന്നുണ്ടെങ്കിലും കേസിന് തുമ്പുണ്ടാക്കാന്‍ കഴിഞ്ഞിട്ടില്ല. വൃദ്ധയായിരുന്ന കനകത്തെ കൊലപ്പെടുത്തിയത് എന്ത് കാരണത്തിനായിരുന്നെന്ന് കണ്ടെത്താന്‍ പോലും െ്രെകംബ്രാഞ്ചിന് കഴിഞ്ഞിട്ടില്ല. സാമ്പത്തികമായി പിന്നാക്കം നില്‍ക്കുന്ന ഇവരുടെ പക്കല്‍ സ്വര്‍ണ്ണവും പണവും ഉണ്ടായിരുന്നില്ല. അരുതാത്തതെന്തോ കനകം കണ്ടതാകാം കൊലപാതകത്തിലെത്തിച്ചതെന്നാണ് വിവരം.ഇവരുടെ വീടിനുള്ളില്‍ പിടിവലി നടന്നതിന്റെ ലക്ഷണങ്ങളും ഭിത്തിയില്‍ ചോരപ്പാടുകളും ഉണ്ടായിരുന്നു. പോസ്റ്റുമോര്‍ട്ടം റിപ്പോര്‍ട്ടില്‍ തലയ്‌ക്കേറ്റ ക്ഷതമാണ് മരണകാരണമായി പറഞ്ഞിരിക്കുന്നത്. നവംബര്‍ ഒന്നിന് രാത്രി കനകത്തിന്റെ വീട്ടില്‍ ദുരൂഹസാഹചര്യത്തില്‍ മൂന്ന് പേര്‍ നില്‍ക്കുന്നത് കണ്ടതായി ഹോംനേഴ്‌സായ ലതയെന്ന സ്ത്രീ നാട്ടുകാരോട് പറഞ്ഞിരുന്നു. കേസ് െ്രെകംബ്രാഞ്ച് ഏറ്റെടുത്തതോടെ ലതയെ ദുരൂഹ സാഹചര്യത്തില്‍ കാണാതാകുകയായിരുന്നു. നാട്ടുകാരില്‍ നിന്നും പണം കടം വാങ്ങിയിരുന്ന ലത പണം കൊടുക്കാന്‍ മാര്‍ഗമില്ലാതെ ഇവിടുന്ന് മുങ്ങിയെന്നാണ് ലോക്കല്‍ പൊലീസ് പറയുന്നത്. തമിഴ്‌നാട്ടില്‍ നിന്നും നാളുകള്‍ക്ക് മുന്‍പ് കോഴിക്കാനത്ത് താമസിക്കാനെത്തിയതാണ് ലതയും മകനും. ലതയുടെ മകന്‍ ഇപ്പോഴും കോഴിക്കാനത്ത് വന്നുപോകാറുണ്ട്. അമ്മയെക്കുറിച്ച് ഒരു വിവരവുമില്ലെന്നാണ് ഇയാള്‍ പൊലീസിന് മൊഴി നല്‍കിയിരിക്കുന്നത്. ഒന്നര വര്‍ഷം മുന്‍പ് ലതയെ കോട്ടയം മെഡിക്കല്‍കോളേജിന് സമീപത്തുവച്ച് കണ്ടിരുന്നു. െ്രെകംബ്രാഞ്ച് സംഘം ഇവരെ കണ്ടെത്താന്‍ ശ്രമിച്ചിരുന്നു. ഗാന്ധിനഗര്‍ പൊലീസ് ലതയെ കണ്ടെത്താന്‍ മാന്‍മിസിംഗ് കേസെടുത്ത് അന്വേഷണം തുടരുകയാണ്. കൊലപാതകികള്‍ ലതയെ നാടുകടത്തിയതാകാമെന്നും സൂചനയുണ്ട്. ക്രൈംബ്രാഞ്ച് സി.ഐ മധു ബാബുവിന്റെ നേതൃത്വത്തിലാണ് അന്വേഷണം നടക്കുന്നത്. കേസിന് ഒരു പുരോഗതിയും ഇല്ലെന്നാണ് ക്രൈംബ്രാഞ്ച് അറിയിച്ചിരിക്കുന്നത്.
കനകം കൊലക്കേസ്; ദുരൂഹത നീങ്ങാത്ത അഞ്ച് വര്‍ഷം
ബന്ധപ്പെട്ട വാര്‍ത്തകള്‍
പുതിയ വാര്‍ത്തകള്‍
ജന്മഭൂമി ഓണ്‍ലൈന്‍© Mathruka Pracharanalayam Limited.
Tech-enabled by Ananthapuri Technologies.