ന്യൂദല്ഹി: രാജ്യത്ത് 2. 8 കോടി കുടുംബങ്ങളില് ഭിന്നശേഷിയുള്ള അംഗങ്ങള് ഉണ്ടെന്ന് ജനസംഖ്യാ കണക്ക്. വീടുകളില് കഴിയുന്ന കുടുംബങ്ങള്, വീടില്ലാത്ത കുടുംബങ്ങള്, സംരക്ഷണ ഭവനങ്ങളില്കഴിയുന്ന കുടുംബങ്ങള് എന്നീ വിഭാഗങ്ങളിലെ എട്ട് തരം ഭിന്നശേഷിയുള്ളവരുടെ എണ്ണമാണ് വ്യക്തമാക്കിയിട്ടുള്ളത്. കാഴ്ച, കേള്വി, സംസാരം, ചലനം, മാനസിക വളര്ച്ച, മാനസികരോഗം, ഒന്നിലധികം ശേഷിക്കുറവ് എന്നിവയെ അടിസ്ഥാനമാക്കിയാണ് രജിസ്ട്രാര് ജനറല് ആന്റ് സെന്സസ് കമ്മീഷണര് ഓഫീസ് വിവരങ്ങള് തയ്യാറാക്കിയത്.
രാജ്യത്ത് ഭിന്നശേഷിയുള്ളവരുടെ കുടുംബങ്ങള് 207.8 ലക്ഷം വരുമെന്ന് കണക്കുകള് പറയുന്നു. ഇത് ആകെയുള്ള കുടുംബങ്ങളുടെ 8.3 ശതമാനമാണ്. ഭിന്നശേഷിക്കാരുള്ള കുടുംബങ്ങളില് 99 ശതമാനം സാധാരണ കുടുംബങ്ങളാണ്. 0.4 ശതമാനം സംരക്ഷണ കേന്ദ്രങ്ങളില് കഴിയുന്ന കുടുംബങ്ങളും, 0.2 ശതമാനം ഭവനരഹിതരായ കുടുംബങ്ങളുമാണ്.
ഭിന്നശേഷിയുള്ളവരുടെ കുടുംബങ്ങളുടെ എണ്ണം 2001ല് 187.3 ലക്ഷമായിരുന്നത് 2011ല് 20.5 ലക്ഷം വര്ദ്ധിച്ച് 207.8 ലക്ഷമായി ഉയര്ന്നു. ഇതില് 6.2 ലക്ഷം ഗ്രാമീണ മേഖലയിലും 14.3 ലക്ഷം നഗര പ്രദേശങ്ങളിലുമാണ്. 2001-2011 കാലയളവില് സാധാരണ കുടുംബാംഗങ്ങളുടെ എണ്ണം 2,02,4495 ആയും സംരക്ഷിത കേന്ദ്രങ്ങളില് കഴിയുന്ന കുടുംബങ്ങളുടെ എണ്ണം 8370ആയും ഭവന രഹിതരായ കുടുംബങ്ങള് 13,560ആയും വര്ദ്ധിച്ചു. ഈ കാലയളവില് സാധാരണകുടുംബങ്ങളിലെ ഭിന്നശേഷിയുള്ളവരുടെ എണ്ണം 48,19,388 ആയും, സംരക്ഷിത കേന്ദ്രങ്ങളില് കഴിയുന്ന കുടുംബങ്ങളുടെ എണ്ണം 65895 ആയും ഭവന രഹിതരായകുടുംബങ്ങളില് ഉള്ളവരുടെഎണ്ണം 22,948 ആയും ഉയര്ന്നു.
