ന്യൂദല്ഹി: മാഗിക്ക് ദല്ഹി സര്ക്കാര് 15 ദിവസത്തേയ്ക്ക് നിരോധനം ഏര്പ്പെടുത്തി. നെസ്ലെ അധികൃതരുമായി നടത്തിയ ചര്ച്ചയ്ക്ക് പിന്നാലെയാണ് തീരുമാനം.
നിരോധനം യുദ്ധകാല അടിസ്ഥാനത്തില് പ്രാബല്യത്തില് വരുത്തുമെന്ന് ദല്ഹി ആരോഗ്യമന്ത്രി സത്യേന്ദ്ര ജയിന് അറിയിച്ചു. ഇത്തരത്തില് മറ്റു ഉല്പ്പനങ്ങളുടെ പരിശോധനയും നടന്നു വരികയാണെന്ന് ജയിന് പറഞ്ഞു.
നിലവിലുള്ള മാഗി സ്റ്റോക്കുകള് ഉടന് തന്നെ നീക്കണമെന്ന് ദല്ഹി സര്ക്കാര് നെസ്ലെയോട് ആവശ്യപ്പെട്ടിട്ടുണ്ട്. പുതിയ സ്റ്റോക്കുകള് 15 ദിവസങ്ങള്ക്ക് ശേഷം പരിശോധനയ്ക്ക് വിധേയ മാക്കുമെന്ന് ജയിന് മാധ്യമ പ്രവര്ത്തകരോട് പറഞ്ഞു.
കേന്ദ്രീയ ഭണ്ടാറുകളിലെ മാഗി വില്പ്പന നേരത്തെ തന്നെ നിരോധിച്ചിരുന്നു. മാഗിയുടെ 13 സാമ്പിളുകള് പരിശോധിച്ചതില് 10 എണ്ണത്തിലും ലെഡിന്റെ അളവ് കൂടുതലാണെന്ന് കണ്ടെത്തിയതോടെയാണ് ഇവിടെ മാഗിക്ക് നിരോധനം ഏര്പ്പെടുത്തിയത്. ബിഗ് ബസാറും മാഗി ഉല്പ്പനങ്ങളെ പുറം തള്ളി കഴിഞ്ഞു.
ആരോഗ്യത്തിന് ഹാനികരമെന്ന് കണ്ടെത്തിയാല് മാഗിക്കെതിരെ കടുത്ത നടപടി തന്നെ സ്വീകരിക്കുമെന്ന് കേന്ദ്ര മന്ത്രി രാം വിലാസ് പാസ്വാന് പറഞ്ഞു.
ഗൗരവമേറിയ പ്രശ്നമാണ് ഇതെന്നും നിരവധി സാമ്പിളുകള് ഉപയോഗിക്കാന് കൊള്ളാത്തവയാണെന്നും പാസ്വാന് വ്യക്തമാക്കി.
വിഷയത്തില് എന്സിആര്ഡിസി(നാഷണല് കണ്സ്യൂമര് ഡിസ്പ്യൂട്ട് റിഡ്രസല് കമ്മീഷന്) അന്വേഷണം നടത്തുമെന്നും നടപടിയെടുക്കുമെന്നും അദ്ദേഹം കൂട്ടിച്ചേര്ത്തു.
അതേസമയം ഇന്ത്യന് സൈനിക കേന്ദ്രങ്ങളിലെ കാന്റീനുകളിലും അടുത്ത ഒരു അറിയിപ്പുണ്ടാകുന്നതു വരെ മാഗിക്ക് വിലക്കേര്പ്പെടുത്തിയിരിക്കുകയാണ്. മാഗി ന്യൂഡില്സിന്റെ ഏറ്റവും വലിയ ഉപഭോക്താക്കളില് ഒന്നാണ് ഇന്ത്യന് ആര്മി.
കേരള, കര്ണാടക, അന്ധ്രാ പ്രദേശ്, തെലങ്കാന, ബീഹാര്, പശ്ചിമ ബംഗാള് എന്നിവിടങ്ങളിലും മാഗിയുടെ സാമ്പിളുകള് പരിശോധിക്കാന് അധികൃതരെ ചുമതലപ്പെടുത്തിയിട്ടുണ്ട്.
