ധാക്ക:മുന് പ്രധാനമന്ത്രിയും ബിജെപി മുതിര്ന്ന നേതാവുമായ അടല് ബിഹാരി വാജ്പേയിയെ ബംഗ്ലാദേശ് സര്ക്കാര് ആദരിക്കുന്നു. 1971ല് പാക്കിസ്ഥാനില് നിന്ന് സ്വാതന്ത്ര്യം നേടാനുള്ള ബംഗ്ലാദേശിന്റെ പരിശ്രമങ്ങളെ ഏറ്റവുമധികം പിന്തുണച്ചത് അന്ന് എംപിയായിരുന്ന വാജ്പേയ് ആണെന്നത് പരിഗണിച്ചാണ് ‘ഫ്രണ്ട്സ് ഓഫ് ലിബറേഷന് വാര് അവാര്ഡ്’ നല്കി ആദരിക്കുന്നതെന്ന് വിദേശകാര്യമന്ത്രാലയ വക്താവ് അറിയിച്ചു.
വാജ്പേയിക്കുള്ള ‘ഫ്രണ്ട്സ് ഓഫ് ലിബറേഷന് വാര് അവാര്ഡ്’ പ്രധാനമന്ത്രി നരേന്ദ്ര മോദി ജൂണ് ആറിന് ബംഗ്ലാദേശ് സന്ദര്ശിക്കുന്ന അവസരത്തില് കൈമാറും. വാജ്പേയിക്ക് അസുഖംമൂലം യാത്ര ചെയ്യുവാന് ബുദ്ധിമുട്ടുള്ളതിനാല് ബംഗ്ലാദേശിലെത്തി അവാര്ഡ് വാങ്ങുവാനാവില്ല. ഈ സാഹചര്യത്തിലാണ് വാജ്പേയിക്ക് വേണ്ടി മോദി അവാര്ഡ് ഏറ്റുവാങ്ങുന്നത്.
1971ല് ബംഗ്ലാദേശിനായുള്ള ലിബറേഷന് വാര് ആരംഭിക്കുന്ന സമയത്ത് ഭാരതീയ ജനസംഘത്തിന്റെ പ്രസിഡന്റും ലോക്സഭാ മെമ്പറുമായിരുന്ന വാജ്പേയ് ശക്തമായി പിന്തുണക്കുന്നുണ്ടായി.
രാജ്യത്തും അന്താരാഷ്ട്രതലത്തിലും ബംഗ്ലാദേശ് ജനതയുടെ അവകാശത്തെക്കുറിച്ച് പ്രചാരണം നടത്തുകയുണ്ടായി. ബംഗ്ലാദേശ് സ്വാതന്ത്ര്യത്തിനായി ജീവത്യാഗം ചെയ്ത ഭാരത സൈനികരുടെ കുടുംബങ്ങളെ ആദരിക്കുന്നതിനുള്ള ശുപാര്ശക്കും പ്രധാനമന്ത്രി ഷെയ്ക്ക് ഹസീന അംഗീകാരം നല്കി. ബംഗ്ലാദേശ് രൂപീകരണത്തിനായി ജീവത്യാഗം ചെയ്ത ഭാരത സൈനികരെ ആദരിക്കുകയെന്നത് രാഷ്ട്രത്തിന്റെ കടമയാണെന്നും ഇതില് വ്യക്തമാക്കുന്നു.
ഹസീനയുടെ കൈയ്യൊപ്പു പതിപ്പിച്ച സര്ട്ടിഫിക്കറ്റ് അടങ്ങിയ കത്ത് രക്തസാക്ഷികളായ എല്ലാ സൈനികരുടെയും കുടുംബത്തിലേക്ക് അയച്ചുനല്കാന് തീരുമാനിച്ചിട്ടുണ്ടെന്നും ബംഗ്ലാദേശ് സര്ക്കാര് അറിയിച്ചു.
മുന് പ്രധാനമന്ത്രി ഇന്ദിര ഗാന്ധിയാണ് ‘ഫ്രണ്ട്സ് ഓഫ് ബംഗ്ലാദേശ് ലിബറേഷന് വാര് അവാര്ഡ്’ ലഭിച്ച ആദ്യത്തെ വിദേശ സുഹൃത്ത്. മരണാനന്തരം ലഭിച്ച ഈ അവാര്ഡ് 2012ല് സോണിയ ഗാന്ധിയാണ് ഏറ്റുവാങ്ങിയത്. 2008ല് അവാമി ലീഗ് സര്ക്കാര് അധികാരത്തിലെത്തിയശേഷമാണ് ബംഗ്ലാദേശിന്റെ സ്വാതന്ത്ര്യ സമരത്തില് പങ്കാളിയായ ‘വിദേശ സുഹൃത്തുക്കളെ’ ആദരിക്കുന്ന ചടങ്ങ് തുടങ്ങിയത്.
