ന്യൂദല്ഹി:നിതി ആയോഗില് രണ്ട് ഉപദേശകരെക്കൂടി നിയമിക്കാന് കേന്ദ്ര സര്ക്കാര് തീരുമാനിച്ചു. 1993 ബാച്ച് ഉത്തര്പ്രദേശ് കേഡര് ഐഎഎസ് ഉദ്യോഗസ്ഥന് അലോക് കുമാര്, 1987 ബാച്ച് ഉത്തരാഖണ്ഡ് കേഡര് ഫോറസ്റ്റ് സര്വീസ് ഉദ്യോഗസ്ഥന് ജിതേന്ദ്ര കുമാര് എന്നിവരാണ് പുതിയ ഉപദേശകര്. ഇരുവര്ക്കും അഞ്ചു വര്ഷം കാലാവധി.
വിവിധ മന്ത്രാലയങ്ങളില് 10 ജോയിന്റ് സെക്രട്ടറിമാരെയും നിയമിച്ചിട്ടുണ്ട്. 1992 ബാച്ച് ഇക്കണോമിക് സര്വീസ് ഉദ്യോഗസ്ഥ അരുണ റോയിയെ ധനകാര്യ വകുപ്പില് ജോയിന്റ് സെക്രട്ടറിയായി നിയമിച്ചു. ഇതേ വകുപ്പില് ഡയറക്റ്റര് തസ്തികയില് പ്രവര്ത്തിക്കുകയായിരുന്നു ഇവര്. സഞ്ജയ് പ്രസാദ് (ശാസ്ത്ര സാങ്കേതിക വകുപ്പ്), ജിതേന്ദ്ര കുമാര് സിന്ഹ (വടക്കു കിഴക്കന് മേഖലാ വികസന മന്ത്രാലയം), രാജീവ് കുമാര് (ഇലക്ട്രോണിക്സ്, ഐടി മന്ത്രാലയം), ജഗ്മോഹന് ഗുപ്ത (ജലവിഭവ മന്ത്രാലയത്തിലെ ഗംഗ പുനരുജ്ജീവന വിഭാഗം), വേണുഗോപാല് റെഡ്ഡി ഗദ്ദം (തൊഴില് മന്ത്രാലയം) എന്നിവരാണ് പുതിയ ജോയിന്റ് സെക്രട്ടറിമാര്.
മുഹമ്മദ് ഷഹബാസ് അലിയെ ന്യൂനപക്ഷ ക്ഷേമ മന്ത്രാലയത്തിലെ ന്യൂനപക്ഷ വികസന-സാമ്പത്തിക കോര്പ്പറേഷന്റെ മാനേജിംഗ് ഡയറക്ടറാക്കി. നവനീത് സോണി സാംസ്കാരിക മന്ത്രാലയത്തിനു കീഴിലുള്ള സ്മാരകള് സംരക്ഷിക്കുന്നതിനുള്ള അതോറിറ്റിയുടെ മെംബര് സെക്രട്ടറിയാകും. രണ്ട് പദവിയും ജോയിന്റ് സെക്രട്ടറിക്കു സമാനം.
