കാഠ്മണ്ഡു: നേപ്പാളില് ഭൂകമ്പബാധിതരെ സഹായിക്കാനും പുനരധിവസിപ്പിക്കാനും വിശ്വഹിന്ദു പരിഷത് പദ്ധതി പ്രഖ്യാപിച്ചു. പരിഷത്തിന്റെ പ്രവര്ത്തകര് ദുരിതാശ്വാസ പ്രവര്ത്തനങ്ങളില് സക്രിയമായി പങ്കെടുക്കുന്നുണ്ട്. മരുന്നു വിതരണം ഭക്ഷണമെത്തിക്കല്, ദുരിതാശ്വാസ ക്യാമ്പുകളില് സ്വന്തക്കാരെയും ബുന്ധുക്കളെയും തിരിച്ചറിയാന് സഹായിക്കല് തുടങ്ങിയ പ്രവര്ത്തനങ്ങളില് പരിഷത് സക്രിയമാണ്.
മൂന്നു തരത്തിലുള്ള സഹായ പ്രവര്ത്തനങ്ങള്ക്കാണ് പരിഷത് രൂപം നല്കിയിട്ടുള്ളത്. ദുരന്തത്തെ തുടര്ന്ന് ബന്ധുക്കളും സ്വന്തക്കാരും ഇല്ലാതായി അവശേഷിക്കുന്ന കുട്ടികള്ക്ക് സൗജന്യമായി താമസ സൗകര്യവും മികച്ച വിദ്യാഭ്യാസ സംവിധാനവും ലഭ്യമാക്കും. ഇതിനായി ഭാരതത്തിലെ വിവിധ ഭാഗങ്ങളിലുള്ള 50 അനാഥ സംരക്ഷണ കേന്ദ്രങ്ങളിലും 150 റസിഡന്ഷ്യല് സ്കൂളുകളിലും സംവിധാനങ്ങള് ഒരുക്കും. വിഎച്ച്പിക്ക് താമസിച്ചു പഠിക്കാന് സൗകര്യമുള്ള വിദ്യാലയങ്ങളുടെ വിപുലമായ ശൃംഖലയുണ്ട്. ഈ സ്കൂളുകളില്നിന്ന് വിജയകരമായി വിദ്യാഭ്യാസം പൂര്ത്തിയാക്കിയ ലക്ഷത്തിലേറെ വിദ്യാര്ത്ഥികളുണ്ടെന്ന് പരിഷത് അറിയിച്ചു.
ദുരന്തത്തില് വീടുകള് നഷ്ടപ്പെട്ടവര്ക്ക് വീടുണ്ടാക്കി നല്കാന് വിഎച്ച്പി വിപുലമായ പദ്ധതി ആവിഷ്കരിക്കുന്നതായി ഭാരവാഹികള് അറിയിച്ചു. വിവിധ കോര്പ്പറേറ്റു സ്ഥാപന ങ്ങളുടെ സഹകരണത്തോടെയും സഹായത്തോടെയും അര്ഹ തപ്പെട്ടവര്ക്ക് വീടുണ്ടാക്കിക്കൊടുക്കുന്ന വിപുലമായ പദ്ധതി ആവിഷ്കരിച്ചിട്ടുണ്ട്.
നേപ്പാള് ക്ഷേത്രങ്ങളുടെ നഗരം കൂടിയാണ്. ഈ ക്ഷേത്രങ്ങള് നിത്യ പൂജകളും പ്രാര്ത്ഥനകളും നടക്കുന്നവയാണ്. വിശ്വാസ കേന്ദ്രങ്ങളായ ഈ ക്ഷേത്രങ്ങളുടെ കെട്ടിടങ്ങള് പലതും തകരുകയോ കേടുപാടു സംഭവിക്കുകയോ ചെയ്തിട്ടുണ്ട്. അവ പുനര് നിര്മ്മിക്കുന്നത് തദ്ദേശവാസികളില് ശേഷിക്കുന്നവരുടെ ആത്മശക്തി വര്ദ്ധിപ്പിക്കാന് സഹായകമാകും. ഈ സാഹചര്യത്തില് നേപ്പാളിലെ ആരാധനാലയങ്ങള് പുനര് നിര്മ്മിക്കുന്നതിന് ആവുന്ന എല്ലാ സഹായങ്ങളും എത്തിക്കാന് ഭാരതത്തിലെ മറ്റു ക്ഷേത്ര സമിതികളും ഭരണ സംവിധാനങ്ങളും തയ്യാറാകണമെന്ന് വിഎച്ച്പി അഭ്യര്ത്ഥിച്ചു. ഈ മൂന്നു കാര്യങ്ങളില് ശ്രദ്ധ ഊന്നി പ്രവര്ത്തിക്കാന് നിശ്ചയിച്ച പരിഷത്ത് എല്ലാ മേഖലയില് നിന്നും ഇക്കാര്യത്തില് സഹായം പ്രതീക്ഷിക്കുന്നതായി അറിയിച്ചു.
