ന്യൂദല്ഹി: തീവ്രവാദത്തിനെതിരായ പോരാട്ടത്തില് സഹകരിക്കാന് ഇന്ത്യയും അഫ്ഗാനിസ്ഥാനും ധാരണയിലെത്തി.
ഇന്ത്യയില് സന്ദര്ശനത്തിനെത്തിയ അഫ്ഗാന് പ്രസിഡന്റ് മൊഹമ്മദ് അഷറഫ് ഘാനിയും പ്രധാനമന്ത്രി നരേന്ദ്രമോദിയുമായി നടത്തിയ ചര്ച്ചയിലാണ് ഇത് സംബന്ധിച്ച് ധാരണയായത്.
രാവിലെ ഹൈദരാബാദ് ഹൗസില് പ്രധാനമന്ത്രിയുമായി അഷ്റഫ് ഘാനി ചര്ച്ച നടത്തിയിരുന്നു. തുടര്ന്ന് ഘാനിക്കൊപ്പമുണ്ടായിരുന്ന ഉന്നതതല പ്രതിനിധി സംഘവുമായും പ്രധാനമന്ത്രി കൂടിക്കാഴ്ച നടത്തി.
തീവ്രവാദത്തില് നല്ലതും ചീത്തയുമില്ലെന്ന് അഷ്റഫ് ഘാനി പറഞ്ഞു. തീവ്രവാദത്തിന്റെ നിഴലുകള് അഫ്ഗാനിലെ കുഞ്ഞുങ്ങളെയും യുവാക്കളെയും സ്ത്രീകളെയും വേട്ടയാടുകയാണ്.
തീവ്രവാദം ചെറുത്തുതോല്പിക്കേണ്ട ഒന്നാണെന്നും ലോകരാജ്യങ്ങള് അതിന്റെ ഭീഷണി തരണം ചെയ്യേണ്ടതുണ്ടെന്നും അദ്ദേഹം പറഞ്ഞു. അഫ്ഗാന്റെ സമാധാനത്തിനും സുസ്ഥിരതയ്ക്കും ഇന്ത്യയുടെ പൂര്ണ പിന്തുണ അറിയിച്ചതായി പ്രധാനമന്ത്രി വ്യക്തമാക്കി.
അഫ്ഗാന് സൈന്യത്തെ പൂര്ണസജ്ജമാക്കാനുള്ള പ്രവര്ത്തനങ്ങള്ക്കും ഇന്ത്യയുടെ പിന്തുണയുണ്ടാകുമെന്ന് മോദി പറഞ്ഞു. ഭൗമാതിര്ത്തിക്കും രാഷ്ട്രീയത്തിനും അതീതമായി മനുഷ്യഹൃദയങ്ങള് തമ്മിലുളള ബന്ധമായിരിക്കണം ഇരുരാജ്യങ്ങളും തമ്മിലുളള സഹകരണമെന്നും പ്രധാനമന്ത്രി ഓര്മിപ്പിച്ചു.
നേരത്തെ രാഷ്ട്രപതി ഭവനില് ഘാനിക്ക് ഔദ്യോഗിക വരവേല്പ് നല്കിയിരുന്നു. ഇതിന് ശേഷം വിദേശകാര്യമന്ത്രി സുഷമാസ്വരാജുമായും അദ്ദേഹം ചര്ച്ച നടത്തി. രാഷ്ട്രപിതാവിന്റെ സമാധി സ്ഥലമായ രാജ്ഘട്ടിലെത്തി പുഷ്പചക്രം അര്പ്പിച്ച ശേഷമാണ് ഘാനി ഔദ്യോഗിക പരിപാടികള്ക്ക് തുടക്കമിട്ടത്.
