ടോറന്റോ : അഴിമതി മുക്ത സമര്ത്ഥഭാരതമാണ് തന്റെ ലക്ഷ്യമെന്ന് പ്രധാനമന്ത്രി നരേന്ദ്ര മോദി. ടോറന്റോയിലെ റിക്കോ കോളോസിയത്തില് കാനഡയിലെ ഇന്ത്യന് സമൂഹത്തെ അഭിസംബോധന ചെയ്യുകയായിരുന്നു അദ്ദേഹം
ഭാരതത്തെ മാലിന്യത്തില് മുക്കിയവര് അതിനു ശേഷം പോയ്ക്കഴിഞ്ഞെന്നും അത് ശുദ്ധീകരിക്കേണ്ട ചുമതല നമുക്കാണെന്നും മോദി പറഞ്ഞു. ഭാരതം വിശാലമായ രാഷ്ട്രമാണെന്നും അത് കൊണ്ട് തന്നെ മാലിന്യ ശുദ്ധീകരണത്തിന് സമയം ആവശ്യമാണെന്നും അദ്ദേഹം ചൂണ്ടിക്കാട്ടി.
വികസനമാണ് ഭാരതം നേരിടുന്ന എല്ലാ പ്രശ്നങ്ങള്ക്കുമുള്ള പരിഹാരം. അതിനുള്ള കഴിവ് രാഷ്ട്രത്തിനുണ്ട്. ഇനി വേണ്ടത് അവസരങ്ങളാണ് . പ്രധാനമന്ത്രി കൂട്ടിച്ചേര്ത്തു.
ഭാരതത്തിന്റെ വിജയകരമായ ചൊവ്വാ ദൗത്യത്തെ പര്മാര്ശിച്ചുകൊണ്ട് കഴിവിന്റെ കാര്യത്തില് ഭാരതീയര് ഒട്ടും പിന്നിലല്ലെന്ന് പ്രധാനമന്ത്രി ഓര്മ്മിപ്പിച്ചു. 80 കോടി വരുന്ന ഭാരതീയ യുവജനതയുടെ ശക്തിയും സ്വപ്നങ്ങളും ഭാരതത്തിന് മുതല്ക്കൂട്ടാണെന്നും യുവജനത തൊഴിലന്വേഷകരേക്കാള് തൊഴില് ദാതാക്കളാകുന്നതാണ് താനിഷ്ടപ്പെടുന്നതെന്നും അദ്ദേഹം പറഞ്ഞു
ഭാരതത്തിന്റെ പതാകയിലുള്ള നാലു നിറങ്ങളെപ്പോലെ നാല് മേഖലകളില് വിപ്ലവം വരുത്തുകയെന്നതാണ് തന്റെ ലക്ഷ്യമെന്ന് അദ്ദേഹം വ്യക്തമാക്കി . കുങ്കുമം ഊര്ജ്ജസ്വലതയുടെ നിറമാണ്. ഊര്ജ്ജമേഖലയില് വന് പരിവര്ത്തനമാണ് ഭാരതം ലക്ഷ്യമിടുന്നത് .
അടുത്തതായി ലക്ഷ്യമിടുന്നത് ധവള വിപ്ലവമാണ് . മൃഗസംരക്ഷണമേഖലയില് വന് കുതിച്ചു ചാട്ടം ലക്ഷ്യമിട്ട് പാലുത്പാദനം ഉയര്ത്തുക എന്നതാണ് ലക്ഷ്യം. കാര്ഷിക മേഖലയെ പുരോഗതിയിലേക്കുയര്ത്തുന്ന ഹരിത വിപ്ലവമാണ് മറ്റൊരു ലക്ഷ്യം . നീലാകാശവും സമുദ്രവും മറ്റ് ജലാശയങ്ങളും മലിനീകരണത്തില് നിന്നും മുക്തമാക്കുന്ന നീല വിപ്ലവമാണ് വേറൊരു ലക്ഷ്യം . പ്രധാനമന്ത്രി വിശദമാക്കി
താന് മുഖ്യമന്ത്രിയുമായിരിക്കുമ്പോള് തന്നെ കാനഡയുമായി അടുത്ത ബന്ധം പുലര്ത്തിയിട്ടുണ്ട്. ഈ ബന്ധം ഫലപ്രദവും ദീര്ഘകാലം നീണ്ടുനില്ക്കുന്നതും ആയിരിക്കുമെന്ന് പ്രധാനമന്ത്രി പ്രത്യാശിച്ചു.
റിക്കോ കൊളോസിയത്തില് നിറഞ്ഞ പതിനായിരത്തോളം വരുന്ന ഭാരതീയര് ഊഷ്മളമായ സ്വീകരണമാണ് നരേന്ദ്ര മോദിക്ക് നല്കിയത് . തെരഞ്ഞെടുപ്പ് കാലത്ത് ഉയര്ന്നു കേട്ടതു പോലെ മോദിമന്ത്രം കൊളോസിയത്തിലെങ്ങും മുഴങ്ങുന്നുണ്ടായിരുന്നു.
