ലക്നൗ: അജ്ഞാതവാസത്തിലുള്ള കോണ്ഗ്രസ് ഉപാദ്ധ്യക്ഷന് രാഹുല് ഗാന്ധിയെ കണ്ടെത്തുന്നവര്ക്ക് ഇനാം നല്കുമെന്ന് പ്രഖ്യാപിച്ചു കൊണ്ട് ഉത്തര്പ്രദേശിന്റെ വിവിധ ഭാഗങ്ങളില് പോസ്റ്ററുകള് പ്രത്യക്ഷപ്പെട്ടു.
അമേഠിക്ക് നാഥനില്ലാതായി’ എന്നാണ് പോസ്റ്ററുകളുടെ തലക്കെട്ട്. രാഹുലിന്റെ മണ്ഡലമാണ് ഉത്തര്പ്രദേശിലെ അമേഠി. അവിടുത്തെ വികസന പ്രശ്നങ്ങളും പോസ്റ്ററില് ചൂണ്ടിക്കാട്ടിയിട്ടുണ്ട്. അമേഠിയിലെ ജനങ്ങളുടെ പേരിലാണ് പോസ്റ്ററുകള്. അതേസമയം ഒരു സംഘടനയുടേയും പേര് പോസ്റ്ററില് പ്രതിപാദിച്ചിട്ടില്ല.
പാര്ലമെന്റ് സമ്മേളനം ആരംഭിച്ചതിന് പിന്നാലെ അവധി എടുത്ത രാഹുല് ഗാന്ധി ഇതുവരെ പാര്ട്ടി ചുമതല ഏറ്റെടുത്തിട്ടില്ല. രാഹുല് മ്യാന്മറില് വിപാസന ധ്യാനത്തിലാണെന്നാണ് റിപ്പോര്ട്ട്.
മനസും ശരീരവും നിയന്ത്രിക്കുന്നതിന് വേണ്ടിയുള്ളതാണ് വിപാസന ധ്യാനം. ഈ മാസം അവസാനത്തോടെ രാഹുല് മടങ്ങിയെത്തുമെന്നാണ് കരുതുന്നത്. തിരികെ വന്നാല് എഐസിസി സമ്മേളനത്തിന്റെ തീയതി തീരുമാനിക്കും.
സമ്മേളനത്തില് രാഹുലിനെ അദ്ധ്യക്ഷ സ്ഥാനത്തേക്ക് കൊണ്ടുവരുന്ന പ്രഖ്യാപനവും ഉണ്ടായേക്കും. രാഹുലിന് പകരം പ്രിയങ്കയെ നേതൃസ്ഥാനത്തേക്ക് കൊണ്ടു വരണമെന്ന് ആവശ്യപ്പെട്ട് നേരത്തെ അലഹബാദില്ല് കോണ്ഗ്രസ് പ്രവര്ത്തകര് പോസ്റ്ററുകള് പതിച്ചിരുന്നു.
