ഇസ്ലാമാബാദ്: പാകിസ്ഥാനില് നാലു കുറ്റവാളികളുടെ വധശിക്ഷ കൂടി നടപ്പാക്കി. കുട്ടിക്കുറ്റവാളിയുടെ വധശിക്ഷ മാറ്റിവച്ചതായും അധികൃതര് അറിയിച്ചു. വ്യാഴാഴ്ച പുലര്ച്ചെയാണു വധശിക്ഷ നടപ്പിലാക്കിയത്. സഹോദരങ്ങളായ മുഹമ്മദ് അസ്ഗര്, ഗുലാം മുഹമ്മദ് എന്നിവരെയും ഗുലിസ്ഥാന് സമാന്, അബ്ദുള് സത്താര് എന്നിവരെയുമാണു തൂക്കിലേറ്റിയത്.
ആദ്യ മൂന്നു പ്രതികളുടെയും ശിക്ഷ അദിയാല് ജയിലില് നടപ്പാക്കിയപ്പോള് അബ്ദുള് സത്താറിനെ മെയ്ന്വാലി ജയിലില് തൂക്കിലേറ്റി.അതേസമയം കടുത്ത പ്രതിഷേധത്തെ തുടര്ന്ന് കുട്ടി കുറ്റവാളികളുടെ ശിക്ഷ 30 ദിവസത്തേക്ക് മരവിപ്പിച്ചിരിക്കുന്നത്. 2004ല് ഒരു കുട്ടിയെ കൊലപ്പെടുത്തിയ കേസില് അറസ്റ്റിലായ ഷഫ്ഖത്ത് ഹുസൈന് എന്ന യുവാവിന്റെ വധശിക്ഷ നടപ്പാക്കുന്നതാണ് പാക്കിസ്ഥാനില് വിവാദമായത്.
എന്നാല് കറാച്ചി പൊലീസ് ഷഫ്ഖത്തിനെ ക്രൂരമായി പീഡിപ്പിച്ചാണ് കുറ്റം സമ്മതിപ്പിച്ചതെന്നും അന്ന് വെറും 14 വയസ് മാത്രമായിരുന്നു ഷഫ്ഖത്തിന്റെ പ്രായമെന്നും ബന്ധുക്കള് ആരോപിച്ചു. ഇതെല്ലാം ചൂണ്ടിക്കാട്ടി സിന്ധ് ഹൈക്കോടതിയില് അപ്പീല് നല്കിയെങ്കിലും കോടതി ഇത് തള്ളുകയായിരുന്നു.
ഷഫ്ഖത്ത് ഹുസൈന്റെ ദയാഹര്ജി കഴിഞ്ഞ ദിവസം തള്ളിയിരുന്നു. കുറ്റം ചെയ്യുമ്പോള് 18 വയസ്സിനു താഴെ പ്രായമുള്ളയാളാണെങ്കില് വധശിക്ഷ നടപ്പാക്കാന് പാടില്ലെന്നാണ് നിയമം. ഇതു ലംഘിച്ചാണ് ശിക്ഷ നടപ്പാക്കാന് അധികൃതര് ഒരുങ്ങുന്നതെന്ന് ഷഫ്ഖത്ത് ഹുസൈന്റെ അഭിഭാഷകര് വാദിച്ചെങ്കിലും ഫലമുണ്ടായിരുന്നില്ല.
കഴിഞ്ഞ ഡിസംബര് 16നു കറാച്ചിയിലെ സൈനിക സ്കൂളിനു നേരെയുണ്ടായ ഭീകരാക്രമണത്തിനു പിന്നാലെയാണു പാക്ക് സര്ക്കാര് വധശിക്ഷയ്ക്ക് ഏര്പ്പെടുത്തിയിരുന്ന മൊറട്ടോറിയം പിന്വലിച്ചത്. ആക്രമണത്തില് കുട്ടികള് ഉള്പ്പടെ 150 പേര് മരിച്ചിരുന്നു. ഇതിനു ശേഷം 54 വധശിക്ഷകളാണു പാക്കിസ്ഥാന് നടപ്പാക്കിയത്.
