ശ്രീ മൂകാംബികാ സഹസ്രനാമസ്‌തോത്രം

കൃത്തികാ കൃച്ഛ്രലബ്ധാ ച കൃത്യാകൃത്യ വിവേചിനീ

കൈശികീ കേവലാ ശിഷ്ടാ കൈവല്യപദദായിനീ

281 . കൃത്തികാ – ദേവിയുടെ ഒരു മൂര്‍ത്തി. ആറു കൃത്തികകളായി പാര്‍വതീദേവി രൂപം ധരിച്ചു. കൃത്തികമാരാണ് സുബ്രഹ്മണ്യനെ വളര്‍ത്തിയത്. സുബ്രഹ്മണ്യം ശരവണക്കാട്ടില്‍ ജനിച്ചപ്പോള്‍ പാര്‍വതീദേവി ആറു കൃത്തികമാരെ സൃഷ്ടിച്ച് ശിശുവിനെ സംരക്ഷിക്കാന്‍ നിയോഗിച്ചു. ആറുപേരും ഒരുമിച്ച് ശിശുവിനെ മുലയൂട്ടാന്‍ ആഗ്രഹിച്ചപ്പോള്‍ ശിശു ആറുമുഖങ്ങളുണ്ടാക്കി ആറുപേരുടെയും മുല കുടിച്ചുവെന്നും അതുകൊണ്ട് ഭഗവാന്‍ ആറുമുഖനായെന്നും പുരാണങ്ങള്‍. കൃത്തികമാര്‍ വളര്‍ത്തിയതുകൊണ്ട് ഭഗവാനു കാര്‍ത്തികേയന്‍ എന്നുപേരുണ്ടായി. കൃത്തികമാര്‍ ദേവിയുടെ മൂര്‍ത്തികളാണ്.

282 . കൃച്ഛ്രലബ്ധാ – പ്രയാസപ്പെട്ടു പരിശ്രമിച്ചാല്‍ ലഭിക്കുന്നവള്‍. ദേവിയെ സാക്ഷാത്കരിക്കാന്‍ ക്ലേശകരമായ സാധനകള്‍ വേണം. പൂര്‍വജന്മങ്ങളില്‍ നേടിയ പുണ്യംകൊണ്ടാണ് ദേവിയെ ആരാധിക്കാനുള്ള പ്രേരണ ഉണ്ടാകുന്നത്. സാക്ഷാത്കരിക്കാന്‍ പല ജന്മങ്ങള്‍ നീണ്ട പരിശ്രമം വേണം.

283 . കൃത്യാകൃത്യവവേചിനീ – കൃത്യവും അകൃത്യവും വേര്‍തിരിക്കുന്നവള്‍. ധര്‍മ്മമേത് അധര്‍മ്മമേത് എന്നു നിര്‍ണയിക്കുന്നത് പരാശക്തിയായ ദേവിയാണ്. ഓരോരുത്തരുടെയും ഹൃദയത്തില്‍ സദാ ഇതു ചെയ്യാവുന്നത്, ഇത് അരുതാത്തത് എന്ന് ഉപദേശിക്കും. അഹങ്കാരവിമൂഢാത്മാക്കളായ വ്യക്തികള്‍ ഉള്ളിലുണരുന്ന ദേവിയുടെ ഉപദേശം അവഗണിക്കുമ്പോള്‍ ഉപദേശം ക്രമമായി അവ്യക്തമാകും. ഭക്തിയും വിനയവുമുള്ള ഭാഗ്യവാന്മാര്‍ ആ നിര്‍ദ്ദേശങ്ങള്‍ അനുസരിക്കും. അങ്ങനെയുള്ളവരെ ദേവി അനുഗ്രഹിക്കും.

ധര്‍മ്മവും അധര്‍മ്മവും വേര്‍തിരിച്ചറിയാന്‍ എല്ലാവര്‍ക്കും കഴിയും. കൃത്യാകൃത്യ വിവേചിനിയായ ദേവി അന്തര്യാമിയായി എല്ലാവനില്ലെന്നു നാം കരുതുന്ന വസ്തുക്കളില്‍കൂടി കൃത്യാകൃത്യങ്ങള്‍ നിര്‍ദ്ദേശിക്കുന്ന ദേവീകാരുണ്യം കുടികൊള്ളുന്നുണ്ട്.

284. കൈശികീ – ശൃംഗാരരസപ്രധാനമായ ഭാവമാണു കൈശികീവൃത്തി. കാമേശനായ ശ്രീപരമേശ്വരന്റെ സാമീപ്യത്തില്‍ ശൃംഗാരരസാനുഭൂതിക്കു ചേര്‍ന്നവിധത്തില്‍ ചേഷ്ഠിക്കുന്ന ദേവിക്ക് കൈശികി എന്നുപേര്. കൈശികി ഒരു ഭാവമായി എല്ലാ സ്ത്രീകളെയും അനുഗ്രഹിക്കുന്നുവെന്നും സ്ത്രീകളില്‍ ശൃംഗാരഭാവം ഉണരുന്നതു കൈശികീദേവിയുടെ ആവേശം കൊണ്ടാണെന്നും സൃഷ്ടി ചോദന കൈശികീദേവിയാണെന്നും ആചാര്യമതം.

285 . കേവലാ – ഏകയായവള്‍. എല്ലാത്തിനും ആധാരമായ ഏകചൈതന്യം പരാശക്തി മറ്റൊന്നിനോടും ചേരാതെയും മറ്റൊന്നിനെയും ആശ്രയിക്കാതെയും സ്വയം പൂര്‍ണ്ണയായവള്‍. ഈ പ്രപഞ്ചത്തിലുള്ള ഒന്നിനും മറ്റൊന്നിനെ ആശ്രയിക്കാതെ നിലനില്‍പ്പില്ല. എല്ലാത്തിനും ആശ്രയവും ആധാരവും ആയിരിക്കെത്തന്നെ ഒന്നിനോടും ബന്ധമില്ലാത്തവളാണു മൂകാംബിക. എല്ലാത്തിനും രൂപം, ഗുണം തുടങ്ങിയ ധര്‍മ്മങ്ങളുണ്ട്. ദേവിക്കു രൂപവും ഗുണവും നാമവുമൊക്കെ നാം ആരോപിക്കാനുണ്ടെങ്കിലും ദേവി അവയ്‌ക്കെല്ലാം അതീതയാണ്.

286. ശിഷ്ടാ – സര്‍വശ്രേഷ്ഠയായവള്‍. എല്ലാ ജ്ഞാനവും രൂപമായവളും എല്ലാത്തിനും അധീശ്വരിയും ഏറ്റവും കീര്‍ത്തിക്ക്‌പെട്ടവളുമാകയാല്‍ ശിഷ്ടാ.

പ്രപഞ്ചവും അതിലുള്ള ജീവിയും ജഡവും എല്ലാം നശിക്കുന്ന കാലത്തും നശിക്കാതെ ശേഷിക്കുന്നവളാകയാല്‍ ശിഷ്ടാ എന്നും വ്യാഖ്യാനിച്ചു കാണുന്നു.

287 . കൈവല്യപദദായിനീ – കൈവല്യപദവി തരുന്നവള്‍. എല്ലാ ബന്ധങ്ങളില്‍നിന്നും മുക്തമായി ജീവാത്മാവ് പരമാത്മാവില്‍ ലയിക്കുന്ന അവസ്ഥയാണു കൈവല്യം. മോക്ഷം എന്നുപറയാമെങ്കിലും മോക്ഷത്തില്‍ ജീവാത്മാവിന് വ്യക്തിത്വബന്ധമുണ്ട്. അതും ഇല്ലാകാതുന്ന അവസ്ഥയാണു കൈവല്യം. തന്റെ ഭക്തര്‍ക്ക് അനായാസമായി കൈവല്യപദം ദേവി കൊടുക്കുന്നു.

…. തുടരും